Wavaka-Kolinde 1 5:1-13
5 Chinevwakana ngwavo muli enu muli ujila,*+ ngwavo mutu umwe ali nakulinga ujila* napwevo lyaise,+ kaha ujila kana chipwe muli vaka-mafuchi wauchimo.
2 Uno munevu kuwaha hachuma kana tahi? Kutala kamwatela kulishona,+ mangana mutu uze nalingi chuma kana vamufumise muli enuko nyi?+
3 Numba tuhu kumujimba kangweshi nayenuko, oloze kushipilitu nguli nayenu, kaha ngunasopesa lyehi mutu nalingi chuma kana, kwijiva nge ngwapwanga nayenu hamwe.
4 Omu namukungulukila hamwe mulijina lyaMwata wetu Yesu, nakutachikiza ngwenu nayami nawa nguli nayenu hamwe mushipilitu nangolo jaMwata wetu Yesu,
5 mwatela kuhana mutu wangocho kuli Satana+ mangana tato yamujimba yinonge mangana nawa shipilitu vakayilwile mulikumbi lyaMwata.+
6 Kulisasa chenu kacheshi chamwazako. Uno kamwatachikijile ngwenu chimbalwila chachindende cheji kufutunwisanga muunga wosenako nyi?+
7 Shikaho fumisenu chimbalwila chamwaka muli enu, mangana mupwenga mumuunga wauhya, nganomu mwapwa lyehi muvakuzeneka chimbalwila. Mwomwo Kulishitu ou apwa mwanamukoko+ wetu waPaseka, vanamuhane lyehi kupwa chimuna wakuvatula.+
8 Shikaho tulamenunga chiwanyino,+ keshi nachimbalwila chamwakako, chipwe nachimbalwila chavilinga vyavipi navyevi vyakuhukako, oloze najimbolo jakuzeneka chimbalwila, jikiko kushishika namuchano.
9 Ngwamisonekelele mumukanda wami ngwami mulitwamine kulikatanga navaka-ujila.*
10 Ami kangweshi nakuvuluka vaka-ujila* vamukaye kano,+ chipwe vaka-chipululu, chipwe vaka-kulyapula, chipwe vaka-kulemesa makombeloko. Mwomwo nge chapwanga ngocho, kahanyi kuvanga mufume mukaye.+
11 Oloze jino nguli nakumisonekela ngwami mulitwamine kulikata+ naweshowo mutu vavuluka ngwavo ndumbwetu uze napu muka-ujila,* chipwe muka-chipululu,+ chipwe muka-kulemesa makombelo, chipwe muka-kusaula,* chipwe muka-kupenda,+ chipwe muka-kulyapula,+ ngwami mutu wangocho chipwe kulya kanda namukalya nenyiko.
12 Uno kusopesa vaze vali kuweluka himilimo yami numba? Kumana enu kamweshi kusopesa vaze vali mukachiko nyi?
13 Uno Kalunga keshi kusopesa vaze vali kuwelukako numba?+ “Mufumisenu owo muka-kuhuka muli enu.”+
Kwinyikila Chamwishi
^ MuchiHelase, por·neiʹa. Tala Mukana waMazu.
^ MuchiHelase, por·neiʹa. Tala Mukana waMazu.
^ Tala Mukana waMazu, “Ujila.”
^ Tala Mukana waMazu, “Ujila.”
^ Tala Mukana waMazu, “Ujila.”
^ Chipwe “muka-kasautu.”
