Wavaka-Kolinde 1 6:1-20
6 Kachi nge muli enu muli mutu umwe ali nachihande namukwavo,+ kutala eji kuyanga kuzango yakusopela kumeso avaka-kuhenga, mukutela kuya kuli vaka-kujila tahi?
2 Uno kamwatachikijile ngwenu vaka-kujila navakasopesa kayeko nyi?+ Kaha kachi nge enu yenu namukasopesa kaye, kutala kamwatelemo kusopa tumilonga twatundendeko tahi?
3 Uno kamwatachikijile ngwenu natukasopesa vangeloko nyi?+ Nyi natuhonena ika kusopa vihande vyamukuyoya chino?
4 Jino kachi nge muli navihande vyamukuyoya chino vize mwatela kusopa,+ kutala vatu vaze mwamona enu vaka-chikungulwilo kupwa vamokomoko vakiko namuneha vapwenga vaka-kusopa tahi?
5 Nguli nakuhanjika ngocho mangana ngumivwise sonyi. Uno chikupu vene muli enu kamweshi muka-mangana umwe mwahasa kuyula mulonga uze uli mukachi kavandumbwenyiko nyi?
6 Oloze namuwana ndumbwetu mwatwala ndumbwenyi kuzango yakusopela nakwimana kumeso avatu vaze kavetavako.
7 Chikupu vene nge muli nakulitwala navakwenu kujizango jakusopela milonga, kaha munahono lyehi. Ikaze namukanyina kwecha tuhu vamivulumune milonga?+ Ikaze namukanyina kwecha tuhu vamilyapule?
8 Mwomwo nayenu vene mweji kuvulumunanga nakulyapulanga vakwenu, vakiko nawa hivandumbwenu.
9 Uno kamwatachikijile ngwenu vaka-kuhenga kaveshi kukaswana Wangana waKalungako nyi?+ Kanda navamihungumwisako.* Mwomwo vaka-ujila,*+ navaka-kulemesa makombelo,+ navaka-ukoji,+ namalunga valihana vavasavale kuvakwavo malunga,+ namalunga vaka-kusavala vakwavo malunga,+
10 naveji, navaka-chipululu,+ navaka-kupenda,+ navaka-kusaula,* navaka-kulyapula, kaveshi kukaswana Wangana waKalungako.+
11 Omu mukiko mumwapwilenga nayenu vamwe. Oloze vanamisanyisa lyehi nakumitomesa,+ vanamilingisa lyehi kupwa vajila,+ vanamivulukila lyehi kwoloka+ mulijina lyaMwata wetu Yesu Kulishitu namushipilitu yaKalunga ketu.
12 Vyuma vyosena vangwitavisavyo mujishimbi, oloze keshi vyuma vyosena vika-kunganyalisako.+ Vyuma vyosena vangwitavisavyo mujishimbi, oloze kangweshi kwitavila chuma numba chimwe chipwenga nangolo hali amiko.*
13 Vyakulya vinapu vyalijimo, kaha lijimo linapu lyavyakulya, oloze Kalunga mwakanongesa nalijimo navyakulya.+ Mujimba kawapwa waujilako,* oloze wapwa wambala waMwata,+ kaha Mwata apwa wambala wamujimba.
14 Oloze Kalunga asangwile Mwata kuvafu,+ kaha nayetu nawa mwakatusangula+ nangolo jenyi.+
15 Uno kamwatachikijile ngwenu mijimba yenu yinapu vilyo vyaKulishituko nyi?+ Jino ami ngumbate vilyo vyaKulishitu nguvinungile kuli pwevo muka-ujila nawa? Chijilocho.
16 Uno kamwatachikijile ngwenu weshowo nalinungu napwevo muka-ujila napu mujimba umwe naikiyeko nyi? Mwomwo ikiye ngwenyi: “Ava vavali navapwanga mujimba umwe.”+
17 Oloze weshowo nalinungu naMwata napu shipilitu yimwe naikiye.+
18 Chinenu ujila.*+ Yeshoyo shili mwalinga mutu yili kuweluka wamujimba wenyi, oloze weshowo mwalinga ujila ali nakulinga shili kumujimba wenyi ivene.+
19 Uno kamwatachikijile ngwenu mujimba wenu unapu tembele+ yashipilitu yajila yili muli enu, eyi muli nayo yakufuma kuli Kalungako nyi?+ Kaha nawa, enu kamwaliheta enu vaveneko,+
20 mwomwo vamilanjile nandando.+ Ngocho tohwesenunga Kalunga+ mumijimba yenu.+
Kwinyikila Chamwishi
^ Tala Mukana waMazu, “Ujila.”
^ Chipwe “Kanda navamyongako.”
^ Chipwe “navaka-kasautu.”
^ Chipwe “chuma numba chimwe chingwonononeko.”
^ MuchiHelase, por·neiʹa. Tala Mukana waMazu.
^ MuchiHelase, por·neiʹa. Tala Mukana waMazu.
