Wavaka-Kolinde 1 7:1-40
7 Jino kutalisa kuvyuma vize mwasonekele, chinawahe kuli lunga kachi kanda akwata* hapwevoko.
2 Oloze mwomwo yakulisala chaujila,* lunga hilunga apwenga napwevo lyenyi,+ kaha nawa pwevo hipwevo apwenga nalunga lyenyi.+
3 Lunga ahanenga pwevo lyenyi ovyo vyatela kumuhana, kaha napwevo nawa alingenga mwomumwe kuli lunga lyenyi.+
4 Pwevo keshi nangolo hamujimba wenyi iveneko, oloze lunga lyenyi ikiye ali najo. Chochimwe nawa, lunga keshi nangolo hamujimba wenyi iveneko, oloze pwevo lyenyi ikiye ali najo.
5 Kanda namuliminanga ovyo mwatela kulihanako, shina kuvanga muvosena munalivwasana ngocho hatando yimwe, mangana muhase kuzachisa lwola kukulomba, nakuhasa nawa kuliwana cheka, kuchina Satana mwamyesekanga hakuhona chenu kupwa namuchima wakulikanyisa.
6 Ami ngunamitavisa mulinge ngocho, keshi nge kumihana lushimbiko.
7 Oloze ngunasake ngwami vatu vosena kachi vapwanga nganomu ngwapwa ami. Chipwe ngocho, mutu himutu ali nawana wenyi+ vamuhana kuli Kalunga, ou mweka ou mweka.
8 Jino nangwamba kuli vajike nakuli vatuliwe ngwami, chinawahe kachi nge navakiko navatwama nganomu ngwatwama ami.+
9 Oloze kachi nge kaveshi namuchima wakulikanyisako, kaha vengile tuhu muulo, mwomwo chinawahe kwingila muulo kuhambakana kuwema napeha yakufwila kulisavala.+
10 Nguli nakuhana jindongi vaze valimbata, oloze keshi yamiko, shina Mwata, ngwami pwevo kanda ahandunuka kuli lunga lyenyiko.+
11 Oloze kachi nge mwahandunukako, kaha atwamenga lika chakuhona kusomboka, mokomoko ahiluke kuli lunga lyenyi. Kaha lunga katela kuseza pwevo lyenyiko.+
12 Oloze kuli veka, ami, keshi nge Mwatako,+ nangwamba ngwami: Kachi nge ndumbwetu umwe ali napwevo lyenyi uze ketavako, oloze uze pwevo netavila kutwama nenyi, kaha lunga kanda akaseza uze pwevo lyenyiko.
13 Kachi nge pwevo ali nalunga lyenyi uze ketavako, oloze uze lunga netavila kutwama nenyi, kaha kanda akaseza uze lunga lyenyiko.
14 Mwomwo lunga uze ketavako vanamulingisa kupwa wajila hali pwevo lyenyi, kaha pwevo uze ketavako vanamulingisa kupwa wajila hali lunga lyenyi muka-kwitava, mokomoko vana venu kachi navapwa vamajilo, oloze jino vanapu vajila.
15 Oloze kachi nge uze ketavako mwasaka kufumako,* afumeko tuhu, kaha ndumbwetu walunga chipwe ou wapwevo kakashiwile hachuma kanako, oloze enu Kalunga namihane kuunda.+
16 Mwomwo ove pwevo, ove kawatachikijile ngwove pamo mukalwila lunga lyoveko nyi?+ Chipwe ove lunga, ove kawatachikijile ngwove pamo mukalwila pwevo lyoveko nyi?
17 Chipwe ngocho, mutu himutu atambukenga kweseka namuze Yehova* namuhanyina chazano chenyi, kweseka namuze nawa vanamusanyikila kuli Kalunga.+ Omu mukiko vene ngunalweze vikungulwilo vyosena.
18 Uno kuli mutu umwe vasanyikile oku wakujihana lyehi tahi?+ Kaha kanda mwalilingisa kupwa chilimako. Uno kuli mutu umwe vasanyikile oku chilima tahi? Kaha kanda vamujihanako.+
19 Ungalami wamokomoko, kaha ulima nawa wamokomoko,+ oloze chachilemu shina kulamanga jishimbi jaKalunga.+
20 Mweshomwo apwile mutu himutu omu vamusanyikile, atwamenga vene ngocho.+
21 Uno vakusanyikile oku undungo tahi? Kaha kanda ulizakamina hachuma kanako.+ Oloze kachi nge nauhasa kulilingisa kupwa uwakulihehwa, kaha linga vene ngocho.
22 Mwomwo weshowo vasanyikile muli Mwata oku ndungo, napu mutu wakusokoka waMwata.+ Chochimwe nawa, weshowo vasanyikile oku wakulihehwa, napu ndungo yaKulishitu.
23 Enu vamilanjile nandando,+ litwaminenu kupwanga vandungo javatu.
24 Enu vandumbwami, mweshomwo apwile mutu himutu omu vamusanyikile, atwamenga vene ngocho kuli Kalunga.
25 Jino kutalisa kuli vajike,* kangweshi nalushimbi lwakuli Mwatako, oloze nangumilweza omu ngwashinganyeka ami,+ hakupwa ngumutu uze vatetelelele kuli Mwata mangana ngupwenga nguwakushishika.
26 Shikaho kweseka nakukaluhwa chamakumbi ano, ngunashinganyeka ngwami nachiwaha kuli mutu kutwama mweshomwo vene apwa.
27 Uno unakashiwa kuli pwevo tahi? Litwamine kutondatonda jila yakukasunukilamo.+ Uno unakasunuka kuli pwevo tahi? Litwamine kutondatonda pwevo.
28 Oloze numba nge nawingila muulo, kaweshi kulinga shiliko. Kaha nawa kachi nge mujike mwengila muulo, keshi kulinga shiliko. Oloze vaze navalinga ngocho navamonanga luyando mumijimba yavo. Kaha ami ngunasake ngwami ngumikinge.
29 Kaha nawa enu vandumbwami, nangwamba ngwami lwola lunalituluko lunakehe.+ Kufuma oholili, vaze vali namapwevo vapwenga nge kaveshi navoko,
30 kaha vaze veji kulilanga vapwenga nge vaze kaveshi kulilako, kaha vaze veji kuwahililanga vapwenga nge vaze kaveshi kuwahililako, kaha vaze veji kulandanga vapwenga nge vaze kaveshi navyumako,
31 kaha vaze vali nakuzachisa kaye kano, vapwenga nge vaze kaveshi nakukazachisa chikumako, mwomwo vyuma vili nakulingiwa mukaye kano vili nakwalumuka.
32 Ngunasake chikupu ngwami mutwamenga chakuhona kulizakamina. Lunga uze kambatako, eji kuzakamanga vyuma vyaMwata mangana awane mwakwivwishila Mwata kuwaha.
33 Oloze lunga uze ambata, eji kuzakamanga vyuma vyakaye+ mangana awane mwakwivwishila pwevo lyenyi kuwaha,
34 kaha nalipangununa hakachi. Kaha nawa, pwevo uze kasombokako, nauze kanda achilisavaleho lyehi nalunga, eji kuzakamanga vyuma vyaMwata,+ mangana apwenga wajila nakumujimba nakushipilitu. Oloze pwevo asomboka, eji kuzakamanga vyuma vyakaye mangana awane mwakwivwishila lunga lyenyi kuwaha.
35 Nguli nakuhanjika ngocho mangana ngumikafwe, keshi mangana ngwami ngumishinyinyikeko,* oloze mangana ngwami ngumikolezeze mulingenga muze munatela, mangana mulihanenga shimbu yosena kuli Mwata chakuzeneka chuma chakumitangula.
36 Oloze kachi nge mutu nashinganyeka ngwenyi ali nakuyanjiwa kutwama ujike,* kachi nge nahichi hatwitwi yaukweze, jino namono ngwenyi omu mukiko chatela kupwa, alinge tuhu munayi muchima wenyi, keshi kulinga shiliko. Kaha vengile tuhu muulo.+
37 Oloze kachi nge mutu naundu mumuchima wenyi, kaha keshi nakuyanjiwako, oku nawa ali nangolo jakwononona muchima wenyi, kaha najinyi nawa mumuchima wenyi kutwama ujike,* mwalinga kanawa.+
38 Ngocho weshowo mwengila muulo mwalinga kanawa, oloze weshowo keshi kwingila muuloko mwalinga kanawa chikuma.+
39 Pwevo nakashiwa shimbu lunga lyenyi achili wamutonyi.+ Oloze kachi nge lunga lyenyi mwasavala tulo twakufwa, kaha pwevo napu wakulihehwa kusomboka cheka kuli weshowo mwazanga, shina muli Mwata kaha.+
40 Oloze kweseka navishinganyeka vyami, mwawahilila chikuma kachi nge mwatwama tuhu nganomu vene ali. Kaha ngunashinganyeka chikupu ngwami, nayami nawa nguli nashipilitu yaKalunga.
Kwinyikila Chamwishi
^ Kulumbununa, kulisavala nenyi.
^ MuchiHelase, por·neiʹa. Tala Mukana waMazu.
^ Chipwe “mwasaka valihandunune.”
^ Tala Chihande A5.
^ Lizu lyachiHelase vazachisa hano lyalumbununa vatu vaze kanda valisavaleho lyehi namapwevo chipwe namalungako.
^ Hela., “ngwami ngumitele muhetoko.”
^ MuchiHelase, ujike vanavuluka hano, shina kutwama chakuzeneka kulisavala namutu kufuma vene kukusemuka.
^ MuchiHelase, ujike vanavuluka hano, shina kutwama chakuzeneka kulisavala namutu kufuma vene kukusemuka.
