Wavaka-Kolinde 2 1:1-24
1 Ami Paulu, kaposetolo kaKulishitu Yesu nge omu mwaya muchima waKalunga, nguli hamwe nandumbwetu Chimoteu,+ kaha nguli nakusonekela enu muli kuchikungulwilo chaKalunga chize chili muKolinde, nakuli vaka-kujila vosena vali muAkaya+ mwosena:
2 Likoji lyalinene nakuunda vyakuli Kalunga Setu naMwata Yesu Kulishitu vipwenga nayenu.
3 Vamwalisenga Kalunga, Ise yaMwata wetu Yesu Kulishitu,+ Setu muka-kutetela,+ kaha nawa Kalunga muka-kuvendejeka chosena,+
4 uze eji kutuvendejekanga* muvyeseko vyetu vyosena,*+ mangana nayetu nawa tuhase kuvendejeka vaze vali muvyeseko vyakulisezaseza*+ nakuvendejeka chize veji kutuvendejekanga kuli Kalunga.+
5 Mwomwo nganomu vinavulu vihuli tuli nakumona hali Kulishitu,+ nakuvendejeka vali nakutuvendejeka kuhichila muli Kulishitu nawa chinavulu.
6 Ngocho kachi nge tuli nakuhita muvyeseko,* kahechi chatela kumivendejeka nakumilwila, kachi nge etu vali nakutuvendejeka, kahechi chatela kumivendejeka enu mangana chimikafwe mukakachile hakuhita muvihuli vyovimwe vize tuli nakumona nayetu.
7 Kaha lutalililo lwetu tuli nalwo hali enu lunazame mbe, mwomwo tunatachikiza ngwetu, nganomu muli nakwazana nayetu hamwe muvihuli, mukiko vene namwazanyina nayetu hamwe mukuvendejeka nawa.+
8 Mwomwo enu vandumbwami, etu katwasakile ngwetu muhone kwijiva luyando lwetu luze twamwene mungalila yaAjako.+ Vatushinyinyikile chikuma kuhambakana hakumina ngolo jetu, ngocho katwatachikijile nge natuyoyako.+
9 Kaha twamwene ngwetu vanatutongwela kufwa. Echi chapwile ngocho mangana tuhonenga kulifwelela etu vavene, oloze tufwelelenga Kalunga+ uze eji kusangulanga vafu.
10 Ikiye atuyowele kuponde yize yambile kutujiha, kaha mwatuyovola nawa. Tunatalilila nawa kuli ikiye ngwetu mwatuyovolanga lika.+
11 Nayenu nawa munahase kutukafwako nakulembelela chenu,+ mangana vatu vavavulu vatulombelengako kuli Kalunga nakulomba chakusakwilila, hauselewa eji kutwivwilanga omu eji kukumbululanga kulomba chavatu vavavulu.+
12 Mwomwo chuma tweji kulisashilanga shina echi ngwetu, vivezu vyetu nawa vinahane unjiho nge kutwama tunatwamenga mukaye chikumanyi nayenu chinapunga chajila, kaha nawa tunapunga namuchima wamwenemwene wakufuma kuli Kalunga, keshi nge namangana autuko,+ oloze nalikoji lyalinene lyaKalunga.
13 Mwomwo etu katweshi nakumisonekela vyuma vyekako shina vize munahase kutanga,* vize navimilumbunukila. Kaha ngunafwelela ngwami vyumevi navimilumbunukila chikuma,*
14 nge omu chinamilumbunukila ngwenu etu tunapu tuvatu vaze muli nakulisashilaho, mukiko nawa munamukapwa enu kuli etu mulikumbi lyaMwata wetu Yesu.
15 Ngocho, hakupwa nalufwelelo kanelu, ngwasakile ngwami nguvangile kwiza okwo kuli enu, mangana muwahilile kamuchivali.*
16 Mwomwo ngwasakile kumitambukila hakuya ungeji wami wakuMasetonya, nahakufuma nawa kuMasetonya, numba mukangushinjikize jino hakuya kuYuleya.+
17 Omu ngwasakile kulinga ngocho, kutala ngwapwile nakuseseka numba? Kutala ngweji kujinanga vyuma kweseka nomu vashinganyeka vatu, nakwitavilanga kaha ngwami “Eyo, eyo,” chipwe ngwami “Nduma, nduma” tahi?
18 Oloze hakuwana nge Kalunga twamufwelela, ngocho mazu etu kuli enu kaweshi “eyo” okunyi “ndumako.”
19 Mwomwo MwanaKalunga, Yesu Kulishitu uze twamyambulilile etu, uze twamyambulilile naShilivanu,* naChimoteu,+ ikiye kapwile “eyo” okunyi “ndumako,” oloze “eyo” yinapu “eyo” kuli ikiye.
20 Mwomwo numba jishiko jaKalunga jivula tuhu ngachilihi, josena jinapu “eyo” kuhichila muli ikiye.+ Shikaho kuhichila muli ikiye mukiko vene tuli nakwambila ngwetu “Amene” kuli Kalunga,+ nakumutohwesa kuhichila muli etu.
21 Oloze Kalunga+ ikiye atushika ngwenyi, enu nayetu tuvakuli Kulishitu, kaha nawa ikiye vene atuwavishile.
22 Ikiye nawa ou nahake katachikijilo kenyi hali etu,+ kaha natuhane lyehi chijikilo chavyuma navikeza kulutwe, yikiko vene shipilitu,+ mumichima yetu.
23 Jino nangulishinga Kalunga kupwa chinjiho chami* ngwami, chuma chinangulingisa nguhone kwiza okwo kuKolinde, shina ngwami nguhone kumivwisa chinyengo chikuma.
24 Kangweshi nakwamba ngwami etu tuvamyata halufwelelo lwenuko,+ oloze tunapu tuvakwenu mutwazachila hamwe mangana mupwenga vakuwahilila, mwomwo halufwelelo lwenu hakiko vene munemanyina.
Kwinyikila Chamwishi
^ Chipwe “kutukolezezanga.”
^ Chipwe “muluyando lwetu lwosena.”
^ Chipwe “muluyando lwakulisezaseza.”
^ Chipwe “muluyando.”
^ Chipwe pamo “vize mwatachikiza kanawa.”
^ Hela., “navimilumbunukila palanga nakusongo.”
^ Chipwe pamo, “mangana munganyale kavali.”
^ Vamuvuluka nawa ngwavo Shilase.
^ Chipwe “chinjiho chamwono wami.”
