Wavaka-Kolinde 2 10:1-18
10 Jino ami ivene Paulu, ngunamilembelela hamuchima wauvwovu waKulishitu nahalikoji lyenyi,+ numba tuhu ngwapwa nguwakuzeya nge nguli kuli enu,+ oloze nge nguli kweka ngwapwa nguwakumika kuli enu.+
2 Ngunamilembelela ngwami, omu nangukeza okwo, ngukahone kuhanjika nakumika, nakuhamuka nganomu ngunajinyi hakulitalasana navatu vamwe vaze vatumona kwijiva nge twatambukilenga nge omu mwaya vishinganyeka vyautu.*
3 Mwomwo numba tuhu twatambuka mwaya mujimba, oloze katweshi nakulwa jita nge omu twapwa kumujimbako.
4 Mwomwo vitwa vyajita yetu kavyeshi vyakumujimbako,+ oloze vyangolo jakuli Kalunga+ vyakukatumwisa vyuma vize vyazama chikuma.
5 Mwomwo tweji kukatumunanga vishinganyeka vyavo, navyuma vyosena vyakuzezuka helu vyakuzungisa chinyingi chaKalunga,+ kaha tuli nakutwalanga vishinganyeka vyosena muufunge mangana vyononokenga kuli Kulishitu.
6 Twalizanga lyehi kuzangamisa vosena vaze navalikanga+ omu namulinga enu himunasolola lyehi kwononoka chenu.
7 Enu mweji kumonanga vyuma kweseka nomu vyasoloka kuweluka kaha. Kachi nge mutu nalifwelela ngwenyi apwa wakuli Kulishitu, kaha atela kwanuka nawa ngwenyi: Nganomu ikiye apwa wakuli Kulishitu, ngocho mutwapwa nayetu nawa.
8 Mwomwo numba ngulisasa chikuma hawata uze atuhana Mwata mangana tumitungenga keshi nge kumishiulako,+ kangweshi kwivwa sonyiko.
9 Mwomwo kangwasakile ngusoloke kwijiva nge nguli nakumivwisa woma namikanda yamiko.
10 Mwomwo veji kwambanga ngwavo: “Mikanda yenyi yapwa yayilemu kaha nawa yangolo, oloze nge ali kuno asoloka kupwa wakuhehela, kaha hanjikiso yenyi yamokomoko.”
11 Mutu wangocho atela kwijiva ngwenyi, vyuma tweji kuhanjikanga* mumikanda yetu omu tuli kweka, vikiko vene natukalinga* nge tuneza okwo.+
12 Mwomwo etu katweshi kuhasa kulilavila etu vavene kuli vamweko, chipwe kulyesekesa etu vavene kuli vamwe vaze veji kulitohwesanga vaveneko.+ Oloze vakiko hakulipima mwavomwavo, kaha nawa hakulyesekesa mwavomwavo, kavamona mwalumbunukila vyumako.+
13 Oloze etu katweshi kulisasa havyuma vili kuweluka wangalila vatuhanako, oloze natulisashila havyuma vili mungalila yize atupulila* Kalunga, yize yaheta nakuli enu.+
14 Mwomwo katweshi nakulikanya chikuma kwijiva nge katwaheta lyehi kuli enuko, mwomwo etu yetu vapwile vatete kuheta kuli enu namujimbu wamwaza wakuvuluka Kulishitu.+
15 Kaha nawa katweshi nakulisasa havyuma vili kuweluka wangalila vatuhana vize vali nakuzata kumutu wekako, oloze tunafwelela ngwetu, omu lufwelelo lwenu luli nakuya nakutohwa, mulimo tunazate nautohwa mungalila yetu vatuhana. Kaha natuzata chikuma,
16 mangana tuhase kuvilika mujimbu wamwaza kumafuchi eka ali kulutwe lwenu, mangana tukahone kulisashila havyuma vanalingi lyehi mungalila yamutu weka.
17 “Oloze ou eji kulisasanga alisashile muli Yehova.”*+
18 Mwomwo keshi ou eji kulijimbulanga ivene ikiye vevwila kuwaha+ kuli Yehovako,* shina ou kaha veji kujimbulanga kuli Ikiye.+
Kwinyikila Chamwishi
^ Hela., “nge omu mwaya mujimba.”
^ Hela., “atela kwijiva ngwenyi, omu twapwa mumazu.”
^ Hela., “mukiko vene munatukapwa namuvilinga.”
^ Chipwe “yize atuhana.”
^ Tala Chihande A5.
^ Tala Chihande A5.
