Wavaka-Kolinde 2 12:1-21
12 Ngwatela vene kulisasa. Echi kacheshi kunganyalisako, oloze nanguvuluka vyakumwenesa vyakukomwesa,+ navize nawa vanangusolwela kuli Mwata.+
2 Ngunatachikiza mutu umwe uze alikachile naKulishitu, uze vahukwile nakumutwala kulilu lyamuchitatu kafwe myaka 14 kunyima, numba valingile wakuhukula namujimba wenyi, nyi kavamuhukwile namujimba wenyiko, ami kangwatachikijileko, oloze Kalunga ikiye natachikiza.
3 Mutu kana ngunamutachikiza, numba valingile wakuhukula namujimba wenyi, nyi kavamuhukwile namujimba wenyiko, ami kangwatachikijileko, oloze Kalunga ikiye natachikiza.
4 Mutu kana vamuhukwile nakumutwala mupalachise, kaha evwile mazu navahona kwambulula, aze nawa kavetavisa mutu kuwahanjikako.
5 Hali mutu kanou hakiko vene nangulisashila, oloze hali ami ivene kangweshi kulisashilahoko, shina hakuhehela chami kaha.
6 Mwomwo numba nge nangusaka ngwami ngulisase, kangweshi kukaluhwisa muchimako, mwomwo nanguhanjika muchano. Oloze kangweshi nakusaka kulinga ngochoko, kuchina mutu umwe mwangwalisa chikuma kuzomboka havyuma amona muli ami, navize evwa,
7 mwomwo yavyuma vyakukomwesa vize vangusolwelele.
Hakusaka nguhone kulivwimba chikuma, vanguhanyine mungonga mumujimba wami,+ kangelo kaSatana, mangana anguvetenga kuchina nangulivwimbanga chikuma.
8 Ngwamulembelelele Mwata mapapa katatu ngwami mungonga kanou ungufume.
9 Oloze ikiye ambile kuli ami ngwenyi: “Likoji lyami lyalinene linatemo hali ove, mwomwo ngolo jami vanajikupwisa mukuhehela chove.”+ Ngocho nanguwahilila chikuma nakulisashila muvyuma ngwahehela ami, mangana ngolo jaKulishitu jipwenga hali ami kwijiva nge mbalaka.
10 Shikaho ngweji kwivwilanga kuwaha kuhehela chami, namatuka, nalwola lwakukalikiza, nakunguyanjisa, nakumona vihuli, mwomwo yaKulishitu. Mwomwo nge ngunahehela, kaha ngunakwate ngolo.+
11 Ami ngunakaluhwisa lyehi muchima. Enu yenu munangukanjikizamo, mwomwo enu yenu mwatelanga kungwalisa ami. Mwomwo ami kangwakuminamo kuli vaposetolo jenu vakukangana kuchuma numba chimweko, numba tuhu nguwamokomoko.+
12 Chikupu vene, unjiho wauposetolo wami ngwausolwele muli enu nakukakachila chikuma,+ navinjikizo, navyuma vyakukomwesa, namilimo yangolo.+
13 Uno mujila mukaze mwapwile muvakukuminamo kumisolwela uselewa kuhambakana vikungulwilo vyeka vikwavo? Ngwetu shina muze kaha ngwahonene kupwa nguchiteli kuli enu.+ Ngukonekelenuko namuchima wosena hakuhengesa kanechi.
14 Talenu! Aka kanapu jino kamuchitatu ngunalizange kwiza kuli enu, oloze kangweshi kukapwa nguchiteli kuli enuko. Ami kangweshi nakusaka luheto lwenuko,+ oloze shina yenu kaha. Mwomwo vana+ kavatela kulaminanga vyuma visemi javoko, oloze visemi vakiko vatela kulaminanga vyuma vana vavo.
15 Mwomwo ami kwami nanguwahilila chikuma kuzachisa vyuma vyami nakulihana ami ivene mwosena hali enu.*+ Kachi nge ami ngwamizanga chikuma, kaha enu munguzange chachindende numba?
16 Numba chipwa ngocho, ami kangwamilemuwishileko.+ Oloze enu ngwenu ngwapwile “nguwakulunguluka” kaha nawa ngwenu ngwamyozele hakuzachisa “tufuta.”
17 Uno ngwamizangaminyine kuhichila muli mutu umwe hali vaze ngwatumine kuli enu tahi?
18 Ami ngwakolezezele Chituse, kaha ngwamutumine okwo nayou ndumbwetu. Uno Chituse amizangaminyine numba?+ Kutala katwatambukile mwaya shipilitu yoyimweko tahi? Kutala katwatambukile mujitambo jojimweko numba?
19 Uno munapunga nakushinganyeka lika ngwenu etu tunapunga nakulihakwila etu vavene kuli enu tahi? Etu tuli nakuhanjika kumeso aKalunga nge vatu valikata naKulishitu. Oloze enu ngwazanga, vyuma vyosenevi tweji kulinganga vinapu vyakumitunga.
20 Mwomwo ngunalizakamina ngwami pamo omu nangukeza okwo, kangweshi kukamiwana nge omu ngunashinganyekako, kaha ami nawa kangweshi kukapwa nge omu munashinganyekako, oloze pamo nakukapwa vikokojola, nalwiso, namatoto, nakulikindwojokela, nakulitungula, najisaki,* nakulivwimba, najipindangano.
21 Pamo omu nangukeza cheka okwo, Kalunga kami mwakangwinyisa kumeso enu, kaha nangukalishona hali vavavulu vaze valingile shili kunyima, oloze kavapihililile nakwalumuka kuvilinga vyavo vyamajilo, nakuujila* wavo, nakuvilinga vyakuzunguma* vize vanalingingako.
Kwinyikila Chamwishi
^ Chipwe “hamyono yenu.”
^ Chipwe “nakuliyongola.”
^ MuchiHelase, por·neiʹa. Tala Mukana waMazu.
^ Chipwe “nakuvilinga vyakwivwisa sonyi.” MuchiHelase, a·selʹgei·a. Tala Mukana waMazu.
