Wavaka-Kolinde 2 13:1-14
13 Aka kanapu jino kamuchitatu nguli nakwiza kuli enu. “Haunjiho wavatu* vavali chipwe vatatu, chihande chosena chizame mbe.”+
2 Ami ngwahanjikilemo lyehi hakavanga kuli vaze valingile shili kunyima nakuli vakwavo veka vosena, kaha nanguhanjikamo nawa, kwijiva nge nguli okwo nayenu hamwe kamuchivali, oloze kumana nguwauchiko, ngwami, kachi nge nangwiza cheka okwo, kangweshi kukavatetelako,
3 mwomwo enu muli nakusaka kumona unjiho wakusolola nge Kulishitu ali nakuhanjika kuhichila muli ami, Kulishitu uze kapwa wakuhehela kuli enuko, oloze uze apwa wangolo muli enu.
4 Chamuchano vene vamusukikile hachitondo mwomwo yakuhehela, oloze wamutonyi mwomwo yangolo jaKalunga.+ Chikupu vene nayetu nawa tunahehela nge ikiye, oloze natukayoyanga naikiye hamwe+ mwomwo yangolo jaKalunga jize jili nakuzata muli enu.+
5 Lyesekenunga enu vavene mumone numba nge muli mulufwelelo, lishishikenunga enu vavene mumone omu mwapwa.+ Uno kamwatachikiza ngwenu Yesu Kulishitu alikata nayenuko nyi? Kuvanganyi pamo vamikana.
6 Ngunafwelela chikupu ngwami enu namutachikiza kanawa ngwenu etu kavatukanako.
7 Jino etu natulomba kuli Kalunga ngwetu muhone kulinga chuma chakuhenga, keshi nge mangana tusoloke ngwetu vanatwitavilako, oloze mangana ngwetu mulingenga vyuma vyamwenemwene, numba tuhu etu natusoloka nge vatukana.
8 Mwomwo etu katweshi kuhasa kulinga chuma numba chimwe chakuzungisa muchanoko, oloze shina chakukundwiza muchano kaha.
9 Etu tweji kuwahililanga omu namulinga nge enu muli nangolo, oloze etu tunahehela. Kaha chuma tuli nakulombanga shina ngwetu vamyololenga.
10 Shikaho nguli nakumisonekela vyumevi shimbu nguchili kuno kweka, mangana omu nangukeza kuli enu, ngukahone kumitenukila chikuma hakuzachisa ngolo jami jize vanguhana kuli Mwata+ mangana ngumitunge keshi kumishiulako.
11 Ngocho enu vandumbwami, wahililenunga lika, nakwitavila vamyololenga, nakumivendejekanga,+ nakushinganyekanga mwomumwe,+ nakutwamanga mukuunda.+ Kaha Kalunga wazangi wakuunda,+ mwapwanga nayenu.
12 Limenekenu navakwenu nakulisweswenya chajila.
13 Vaka-kujila vosena vanamimenekako.
14 Likoji lyalinene lyaMwata Yesu Kulishitu, nazangi yaKalunga, nashipilitu yajila yize twatwama nayo tuvosena, vipwenga nayenu muvosena.
Kwinyikila Chamwishi
^ Hela., “Mutunwa twavinjiho.”
