Wavaka-Kolinde 2 2:1-17
2 Mwomwo ami ngunajinyi mumuchima wami ngwami, kangweshi nakusaka ngwizenga kuli enu nakumivwisa chinyengoko.
2 Mwomwo kachi nge ami nangumivwisa chinyengo, kaha iyaze mwangwivwisa kuwaha, ngwetu shina you vene ngunevwisa chinyengo?
3 Ngwasonekele chuma kanechi, mangana omu nangwiza okwo, vatu vaze ngwatela kuwahilila navo vazeneke kungwivwisa chinyengo, mwomwo ngunafwelela ngwami vyuma vize vyeji kungwivwisanga kuwaha, vikiko vene vyeji kumivwisanga nayenu muvosena kuwaha.
4 Mwomwo yaluyando lwalunene nakulyonyinga chamuchima wami, shikaho ngwasonekele kuli enu namasoji amavulu, keshi nge mangana ngwami ngumivwise chinyengoko,+ oloze mangana mutachikize ngwenu ngwamizanga chikuma.
5 Jino kachi nge mutu umwe nevwisa vakwavo chinyengo,+ kaha kevwishile ami chinyengoko, oloze nevwisa muvosena chinyengo kuseteko yimwe. Olozenyi ami kangwasakile kumilweza vyumevi nautenuko.
6 Kuzangamisa vanazangamisa mutu wangocho kuli vavavulu chinatemo.
7 Ngocho mwatela kumukonekela namuchima wosena nakumuvendejeka,+ kuchina pamo mutu kana mwahomba nachinyengo chachinene.+
8 Shikaho ngunamilembelela mumusolwele cheka zangi.+
9 Mwomwo evi vikiko ngwamisonekelele mangana ngumone numba nge namwononoka muvyuma vyosena.
10 Kachi nge namukonekela mutu chuma, nayami nawa nangumukonekela. Mwomwo cheshocho ngunakonekela (kachi nge ngunakonekela chuma chimwe), ngunachilingi mwomwo yayenu kumeso aKulishitu,
11 kuchina Satana mwatufungulula,+ mwomwo etu twatachikiza tufuta twenyi.*+
12 Jino omu ngwahetele muTolowa+ nakuvilika mujimbu wamwaza waKulishitu, oku nawa chikolo chakuzata milimo hivanangusokolwelacho lyehi muli Mwata,
13 shipilitu yami kayanokeleko mwomwo ndumbwami Chituse+ kangwamuwanyineko. Ngocho ngwavasalishile, kaha ngwafumine kuze nakuya kuMasetonya.+
14 Oloze vamusakwililenga Kalunga uze eji kututwaminyinanga shimbu yosena muchendo chavaka-kufungulula vaze vali nakulisamba hakulikata naKulishitu. Kuhichila muli etu ali nakulingisa livumba lyachinyingi chakumutachikiza ikiye lihete kuvihela kwosena.
15 Mwomwo kuli Kalunga etu tunapu tulivumba lyamwaza lyaKulishitu muli vaze vali nakulwila, namuli vaze vali nakunonga.
16 Kaha kuli vaze vali nakunonga, tunapu tulivumba* lyakufwa lyakutwala kukufwa,+ kaha kuli vaze vali nakulwila, tunapu tulivumba lyakuyoya lyakutwala kukuyoya. Iyaze natemo chikupu kuzata vyuma kanevi?
17 Yetu vene, mwomwo katweshi tuvaka-kusekasana* mazu aKalunga+ nganomu vapwa vatu vavavuluko, oloze tweji kuhanjikanga mwamwenemwene hakupwa tuvatu vatuma kuli Kalunga vaze vali kumeso aKalunga, vaze valikata naKulishitu.
Kwinyikila Chamwishi
^ Chipwe “twatachikiza vishinganyeka vyenyi; twatachikiza kujina chenyi.”
^ Chipwe “tulivumba lyalupengopengo.”
^ Chipwe “katweshi tuvaka-kulanjisa; katweshi kunganyalila.”
