Wavaka-Kolose 2:1-23
2 Ami ngunasake ngwami mutachikize omu nguli nakuhundangana chikuma hali enu, nahali vaze vali kuLauchiseya,+ nahali vosena vaze kanda vachingumonengaho lyehi.*
2 Ngunasake ngocho mangana michima yavo vayivendejeke,+ mangana valinunge kanawa hamwe muzangi,+ mangana vahase kupwa naluheto lwosena lwakufuma hakunangakana chavo vavafwelelesa, mangana vapwenga nachinyingi chakwoloka chakutachikiza vyuma vyajila vyakusweka vyaKalunga, vikiko vene Kulishitu.+
3 Muli ikiye mukiko vasweka kanawa luheto lwosena lwamangana nachinyingi.+
4 Ami nguli nakuhanjika ngocho mangana kuzeneke kupwa mutu umwe mwamitangisa namazu achilembekeshi.
5 Numba tuhu kangweshi nayenu hamwe kumujimbako, oloze nguli nayenu hamwe kushipilitu, kaha ngunawahilila hakumona kulonga chenu+ nakuzama chalufwelelo lwenu muli Kulishitu.+
6 Nganomu munetavila Kulishitu Yesu Mwata wetu, shikaho tambukenunga lika nakulikata naikiye,
7 muvakuzamika miji muli ikiye, muvakutunga muli ikiye+ kaha nawa muvakuzama mbe mulufwelelo+ ngana muze vaminangwile, nakusakwilila chikuma.+
8 Zangamenu kuchina nakupwa mutu umwe mwamitwala muundungo* namangana autu, nakutangisa chamokomoko+ nge omu mwaya visemwa vyavatu, nge omu mwaya vyuma vyamaputukilo vyakaye, oloze keshi nge omu atwala Kulishituko,
9 mwomwo muli ikiye mukiko mwazalilila chikuma vilinga vyaKalunga.+
10 Ngocho enu munapu muvakuzalilila kuhichila muli ikiye, uze apwa mutwe wajifulumende josena namawata osena.+
11 Hakupwa nausoko naikiye, nayenu nawa vamijihanyine nakujihana chakuzeneka kuzachisa mavoko hakuzula mujimba wanyama,+ nakujihana chakuli Kulishitu.+
12 Mwomwo enu vamifunjile naikiye hamwe mulumbapachiso lwenyi,+ kaha hakupwa nausoko naikiye, nayenu nawa vamisangwile+ naikiye hamwe mwomwo yakufwelela mumilimo yangolo yaKalunga, uze amusangwile kuvafu.+
13 Kaha nawa, numba tuhu mwapwile muvakufwa kuvilinga vyenu vyakuhenga, nakuulima wamujimba wenu, oloze Kalunga amilingishile kupwa muvavatonyi naikiye hamwe.+ Kaha mulikoji lyenyi atukonekelele vilinga vyetu vyakuhenga vyosena+
14 nakujimbangana mukanda wakusoneka namavoko+ uze wapwile najishimbi,+ uze wakutwimanyina etu nakole.+ Ikiye naufumisako hakuupapalila hachitondo chakuyanjishila.*+
15 Ikiye nazulu jifulumende namawata uselesele, nakuvisolola hatoma nge vanavifungulula,+ nakwiza navyo muchendo chavaka-kufungulula vaze vali nakulisamba hakufungulula nachitondo chakuyanjishila.*
16 Shikaho kanda nakupwa mutu mwamisopesa havyuma namulya nakunwa,+ chipwe kutalisa kukulama chiwanyino, chipwe chiwanyino chakumweka chakakweji,+ chipwe chasambatako.+
17 Vyuma kana vinapu muvwimbimbi wavyuma vize vyapwile nakwiza,+ oloze vyuma vivene vinapu vyakuli Kulishitu.+
18 Kanda nakupwa mutu mwamihonesa kutambula fweto yenuko,+ mutu uze evwila kuwaha kulinyisa chamakuli, nakulemesa chavangelo, “nakukava” vyuma vize namono. Mutu kana nalivwimbi tuhu chamokomoko havishinganyeka vyenyi vyakumujimba,
19 kaha keshi nakulinjilila kuli uze apwa mutweko,+ uze kuhichila muli ikiye mujimba wosena uli nakutambwila vyuma vyasakiwa nakuunungasana kanawa hamwe namanungililo awo namishisa yawo, nakuulingisa ukule hakuukulisa kuli Kalunga.+
20 Kachi nge mwafwile naKulishitu hamwe kuvyuma vyamaputukilo vyakaye,+ ikaze muli nakuyoyela kwijiva nge muchili mukaye, hakuliluula lika kujishimbi jakwamba ngwavo:+
21 “Kanda kumbata chumako, chipwe kumakila chumako, chipwe kukwata kuchumako,”
22 vyuma vize vyeji kunonganga nge vanavizachisa lyehi nge omu mwaya jishimbi javatu nakunangula chavo?+
23 Numba tuhu vyuma kanevi vyasoloka nge vyamangana mukulemesa chakulitakila mutu ivene, namukulinyisa chamakuli, namukuyanjisa chikuma mujimba,+ vikiko kavyeshi vyavilemuko numba vihase kufungulula vyuma wafwila mujimba.
Kwinyikila Chamwishi
^ Hela., “vaze kanda vamonengaho lyehi chihanga chami.”
^ Chipwe “mutu umwe mwamimbata akamilye.”
^ Tala Mukana waMazu.
^ Chipwe pamo, “hakufungulula kuhichila muli ikiye.”
