Wavaka-Kolose 4:1-18
4 Enu vakaka javo, lingenunga mwakwoloka kuli vandungo jenu nakutwama navo kanawa, hakutachikiza ngwenu nayenu nawa muli naKaka yenu mwilu.+
2 Lombenunga naluzema,+ nakupwanga lika vakuvanguluka hakulomba nakusakwilila.+
3 Kaha tulombelenungako nayetu nawa,+ mangana Kalunga atusokolwele chikolo twambulule mazu, mangana tuvilike vyuma vyajila vyakusweka vyakuvuluka Kulishitu, vize vene vanangukashila mumalenge,+
4 mangana nguvilike kanawa nge omu ngwatela kuvilumbununa.
5 Tambukenunga lika mumangana kumeso avaze vali kuweluka, nakuzachisanga kanawa lwola lwenu.*+
6 Mazu enu apwenganga akukokweza shimbu yosena, akutova mungwa,+ mangana mutachikize omu mwatela kukumbulula mutu himutu.+
7 Ndumbwami ngwazanga Tukiku,+ uze apwa muka-kuzata wakushishika, kaha nawa mukwetu ndungo muli Mwata, mwakamilweza vyuma vyosena vinasolokanga kuli ami.
8 Nguli nakumutuma kuli enu mangana mutachikize omu tuli, mangana avendejeke michima yenu.
9 Ali nakwiza naOneshimu,+ ndumbwami wakushishika ngwazanga, uze afuma kuli enu. Kaha navakamilweza vyuma vyosena vili nakusoloka kuno.
10 Alishitaku+ mukwetu funge namimenekako, naMako+ nawa, musonyi waMbalanape namimenekako, (uze ngwavulukile omu ngwamituminyine mazu ngwami mumutambule kanawa+ nge mweza kuli enu),
11 naYesu nawa ou vavuluka ngwavo Yushitu, vaze vapwa vangalami. Ava vakiko kaha vakwetu mutwazachila milimo yaWangana waKalunga, kaha vanapu vaka-kunguvendejeka.*
12 Epafwase,+ ndungo yaKulishitu Yesu, uze afuma kuli enu, namimeneka. Ikiye eji kuzatanga nangolo shimbu yosena nakumilombelako enu mukulomba chenyi, mangana ngwenyi mukemane muvamuhwila, nakukunyuka mwosena mwaya muchima waKalunga.
13 Mwomwo nguli nakumuhakwila ngwami eji kumihundanganyinanga chikuma navaze vali kuLauchiseya nakuHelapole.
14 Luka,+ ou chimbuke twazanga namimenekako, naNdemase+ namimenekako.
15 Ngumenekelenu vandumbwetu vaze vali muLauchiseya nandumbwami wapwevo Numufwa nachikungulwilo chize chili muzuvo yenyi.+
16 Omu namukumisa kutanga uno mukanda, wahisenu vyuma mangana vakautange+ nawa kuchikungulwilo chavaka-Lauchiseya, kaha nayenu nawa mukatange uze naukafuma kuLauchiseya.
17 Kaha nawa lwezenu Alakipu+ ngwenu: “Haka mangana kumulimo uze wetavilile muli Mwata mangana uutesemo.”
18 Ami Paulu ngunamimenekako namazu awa ngunasoneka nalivoko lyami.+ Anukenunga muze vangukashile mumalenge.+ Likoji lyalinene lipwenga nayenu.
