Wavaka-Loma 1:1-32
1 Ami Paulu, ndungo yaKulishitu Yesu, ami vasanyika ngupwenga kaposetolo, ami vahandwila kumujimbu wamwaza waKalunga,+
2 mujimbu uze Kalunga ashikile chimweza muVisoneka vyajila kuhichila muli vapolofweto jenyi,
3 wakuvuluka Mwanenyi uze afumine kutanga* yaNdavichi+ nge omu mwaya mujimba wanyama,
4 oloze mungolo jashipilitu yajila, vamuvulukile ngwavo MwanaKalunga+ hakumusangula kuvafu—,+ ikiye vene Yesu Kulishitu Mwata wetu.
5 Muli ikiye mukiko vene vatusolwelele likoji lyalinene nakutuhana uposetolo,+ mangana vaka-mafuchi vosena vononoke+ hakupwa nalufwelelo mwomwo yalijina lyenyi,
6 kaha hali vaka-mafuchi kana hakiko nayenu nawa vamisanyika mupwenga vakuli Yesu Kulishitu—
7 kuli enu muvosena muli muLoma, enu vazanga kuli Kalunga, enu vasanyika nakupwa vaka-kujila:
Likoji lyalinene nakuunda vyakuli Kalunga Setu naMwata Yesu Kulishitu vipwenga nayenu.
8 Chatete, nguli nakumusakwilila Kalunga kami kuhichila muli Yesu Kulishitu hali enu muvosena, mwomwo lufwelelo lwenu vali nakuluhanjika kwahita kaye kwosena.
9 Mwomwo Kalunga ou ngweji kuzachilanga mulimo wajila nashipilitu yami hakwambulula mujimbu wamwaza wakuvuluka Mwanenyi, napu chinjiho chami omu ngweji kumivulukanga shimbu yosena mukulomba chami+
10 nakulembelela ngwami, kachi nge vyuma navitambuka kanawa, nangwiza kuli enu, nge omu mukiko munayi muchima waKalunga.
11 Mwomwo ngunafwila kumimona, mangana ngwami ngumihaneko wana wakushipilitu, mangana nayenu muzame mbe,
12 mokomoko ngwami mangana tuhase kulikolezeza,+ mutu himutu nalufwelelo lwamukwavo, elu lwayenu nalwelu lwayami.
13 Enu vandumbwami, ami ngunasake ngwami mutachikize ngwenu ngwajinyine kakavulu kwiza kuli enu, oloze jino kunapunga vyuma vimwe vinanguhonesa palanga nakulelo. Ngwasakile kwiza okwo mangana ngwami ngwahengako mihako yimwe namuli enu nawa, nganomu ngunahe lyehi mihako muli vaka-mafuchi eka.
14 Ami ngumuka-mukuli kuli vaHelase nakuli vamwiza,* nakuli vaka-mangana nakuli vaka-kuhona mangana.
15 Ngocho, nguli nakufwila kwiza nakuvilika mujimbu wamwaza nakuli enu nawa muli muLoma.+
16 Mwomwo ami kangwevwila sonyi mujimbu wamwazako,+ mwomwo unapu chikupu ngolo jaKalunga jakuneha ulwilo kuli weshowo ali nalufwelelo,+ chatete kuli vaYuleya,+ kaha nakuli vaHelase.+
17 Kaha muukiko, kwoloka chaKalunga chili nakusoloka kuhichila mulufwelelo mwomwo yakupwa nalufwelelo,+ nge muze vasoneka ngwavo: “Muka-kwoloka mwayoyanga hakupwa nalufwelelo.”+
18 Mwomwo utenu waKalunga+ unasoloka kufuma mwilu havilinga vyosena vyakuhona kumwivwa Kalunga woma nahavilinga vyakuhenga vyavatu vaze vali nakutangikanga muchano+ mujila yakuzeneka kwoloka,
19 mwomwo vyeshovyo vatachikiza hali Kalunga vinasoloka hatoma muli vakiko, mwomwo Kalunga avisolwele kuli vakiko.+
20 Mwomwo vilinga vyenyi evi vahona kumona, nangolo jenyi jahaya myaka yosena+ nauKalunga wenyi,+ vyasoloka hatoma kufuma vene kukutenga chakaye nakuya kulutwe, mwomwo vavimwena kuvyuma atenga,+ mangana vakazeneke kuwana mwakulipatungwila.
21 Mwomwo numba tuhu vamutachikijile Kalunga, kavamutohwesele ngwavo ikiye Kalungako, chipwe kumusakwilila nduma, oloze valumukile nakupwa vaka-kushinganyeka vyaufwefwelekete, kaha michima yavo yakuhona mangana yelavile wi.+
22 Numba tuhu valimwene kupwa vaka-mangana, oloze valumukile kupwa vileya,
23 kaha upahu waKalunga ou keshi kupolako vautambasanyine navifwanyisa vyavatu vaze veji kupolanga, navyevi vyatujila, navyuma vyamahinji awana awana, navyuma vyakuhalala hamavu.+
24 Shikaho, hakusaka kulinga mwayile kufwila chamichima yavo, Kalunga avechelele valilingile tuhu vilinga vyamajilo, mangana mijimba yavo yisauke hakachi kavo vavene.
25 Vakiko vatambasanyine muchano waKalunga nakwonga, kaha valemesele vyuma vyakutenga nakuvizachila mulimo wajila, muchishishisa chaTengi uze veji kwalisanga haya myaka yosena. Amene.
26 Shikaho Kalunga avechelele vevwenganga jipeha jajipi jakusaka kulisavala,+ mwomwo mapwevo vamuli vakiko vasezele kulinga muze vavatengelele nakulinga mweka muze kavavatengeleleko.+
27 Namalunga nawa vasezele kulisavala namapwevo ngana muze vavatengelele, oloze valikahukilile mwavomwavo, malunga navakwavo malunga,+ valingilenga vyuma vyaunyengwe, kaha vatambwile fweto yavo yosena yakuvazangamisa, kweseka nakuhenga chavo.+
28 Hakuwana nge kutachikiza Kalunga vachimwene kupwa chamokomoko,* shikaho Kalunga avechelele vapwenga navishinganyeka vize ahunga ikiye, mangana valingenga vyuma vize kavyatelamoko.+
29 Kaha vazalile navilinga vyakuhenga vyosena,+ navilinga vyakuhuka, nachipululu,*+ naupi, nakuzala nalushiushiu,+ nakujiha vatu,+ navikokojola, namakuli,+ namuchima wakufwila kupihisa vakwavo,+ nakupwa vaka-saki,*
30 vaka-kutungula vakwavo,+ vaka-kuhunga Kalunga, vaka-kasautu, vaka-kulivwimba, vaka-kulitukwojola, vaka-kutaka vyuma vyavipi, vaka-kulikanga kuli visemi,+
31 vaka-kuhona kumona mwalumbunukila vyuma,+ vaka-kuhokola vivwasano, vaka-kuzeneka kuzanga vakwavo, vaka-kuzeneka kutetela.
32 Numba tuhu vakiko vanatachikiza kanawa lushimbi lwakwoloka lwaKalunga lwakwamba ngwenyi, vaka-kulinga vyuma kanevi vatela kufwa,+ vakiko kavakumina hakuvilinga kahako, oloze veji kulikundwizanga nawa navaze veji kuvilinganga.
Kwinyikila Chamwishi
^ Hela., “kumbuto.”
^ Chipwe “nakuli vaze kavapwa vaHelaseko.”
^ Chipwe “Hakuwana nge kavasakile kupwa nachinyingi chakwoloka chakutachikiza Kalungako.”
^ Chipwe “vaka-kuyongola.”
^ Chipwe “nalwiso.”
