Wavaka-Loma 10:1-21
10 Enu vandumbwami, vyuma nguli nakufwila mumuchima wami, nakulembelela echi nguli nakuvalembelelako kuli Kalunga, vinapu chikupu vyaulwilo wavo.+
2 Mwomwo ngunahane unjiho ngwami, vali natwima yakumuzachila Kalunga,+ oloze keshi nge mwaya chinyingi chakwolokako.
3 Mwomwo, hakuzeneka kutachikiza kwoloka chaKalunga,+ nahakusaka ngwavo vazamise kwoloka chavo vavene,+ shikaho kavaliluwile kukwoloka chaKalungako.+
4 Mwomwo Kulishitu ikiye napu kukuma chaJishimbi,+ mangana weshowo mwasolola lufwelelo apwenga wakwoloka.+
5 Mwomwo Mose asoneka vyakwoloka chaJishimbi ngwenyi: “Mutu uze mwalinga vyumevi mwayoyanga.”+
6 Oloze kwoloka chakufuma halufwelelo chahanjika ngwacho: “Kanda namwamba mumichima yenuko ngwenu,+ ‘Iyaze mwaya mwilu?’+ kulumbununa nge, kuneha Kulishitu hamavu.
7 Chipwe ngwenu, ‘Iyaze mwashikumuka muwina wakuzeneka kukuma?’+ kulumbununa nge, kusangula Kulishitu kuvafu.”
8 Oloze chisoneka chahanjika ngwacho ika? Ngwacho: “Mazu ajishimbi eji ali hakamwihi nayenu, ali mutunwa twenu namumichima yenu,”+ akiko vene “mazu” alufwelelo, awa tuli nakwambulula.
9 Mwomwo kachi nge namuhanjika hatoma kumeso avatu natunwa twenu ngwenu Yesu ikiye Mwata,+ nakufwelela mumichima yenu ngwenu, Kalunga amusangwile kuvafu, kaha navamilwila.
10 Mwomwo mutu eji kusololanga lufwelelo namuchima wenyi mangana apwenga wakwoloka, oloze eji kuhanjikanga hatoma nakanwa+ mangana awane ulwilo.
11 Mwomwo chisoneka chamba ngwacho: “Naumwe wauchi mwamufwelela mwakapayako.”+
12 Mwomwo hali kaYuleya nahali kaHelase kaheshi chihandwako.+ Vosena Mwata wavo youmwe kaha, uze eji kukisulanga* vosena vaze navamusanyikanga.
13 Mwomwo “weshowo mwasanyika halijina lyaYehova* navakamulwila.”+
14 Oloze navahasa kumusanyika ngachilihi kachi nge kavamufwelelako? Kaha navahasa ngachilihi kufwelela ou vazeneka kwivwa? Kaha nawa navahasa ngachilihi kwivwa chakuzeneka mutu wakuvambulila?
15 Kaha navahasa ngachilihi kwambulula kachi nge kavavatumineko?+ Nge muze vasoneka ngwavo: “Omu awaha mahinji avaze veji kuvilikanga mujimbu wamwaza wavyuma vyamwaza.”+
16 Chipwe ngocho, vosena kavononokele kumujimbu wamwazako. Mwomwo Isaya ambile ngwenyi: “Ove Yehova,* iya nafwelela vyuma vize nevu kuli etu?”*+
17 Ngocho lufwelelo lweji kwizanga havyuma nevu mutu.+ Kaha mutu eji kwivwanga vyuma kuhichila mumazu akuvuluka Kulishitu.
18 Oloze nangwihula ngwami, Uno kavevwileko nyi? Chikupu vene, “chivumo chavyo chahetele kumavu kwosena, mujimbu wavyo waheta kwalenga mavu kwosena.”+
19 Oloze nangwihula ngwami, uno vaIsalele kavatachikijileko nyi?+ Chatete Mose ambile ngwenyi: “Nangukamivwisa lisungu hakuzachisa vaze kavapwa muyachiko, nangukamisowangiza mukevwe matoto hakuzachisa muyachi wakuhulama.”+
20 Oloze Isaya omikile chikuma nakwamba ngwenyi: “Vanguwanyine kuli vaze vazenekelenga kungutonda,+ vangutachikijile kuli vaze vazenekelenga kungwihula.”+
21 Oloze hakuvuluka vaIsalele, nambe ngwenyi: “Ngunolola mavoko ami likumbi lyosena kuli vatu vakulikanga, vakunjinjavala.”+
Kwinyikila Chamwishi
^ Chipwe “uze apwa muka-kuhana.”
^ Tala Chihande A5.
^ Tala Chihande A5.
^ Chipwe “nafwelela mujimbu tunambulula?”
