Wavaka-Loma 11:1-36
11 Jino nanguhulisa ngwami, uno Kalunga nakane vatu jenyi numba?+ Nduma. Mwomwo nayami nawa ngukaIsalele, ngumuka-tanga* yaApalahama, nguwakumuyachi waMbenjamine.
2 Kalunga kakanyine vatu jenyi vaze atachikijile hakavangako.+ Enu kumana kamwatachikijile muze chahanjika chisoneka hali Elija, omu alembelelele Kalunga nakuyayavala hali vaIsaleleko nyi?
3 “Ove Yehova,* vanajihi vapolofweto jove, vanasande majiko ove akulumbila, ami yami kaha ngunasaleho, kaha oholyapwa vali nakusaka kungujiha nayami.”*+
4 Oloze mazu aKalunga ambile ngachilihi kuli ikiye? Ambile ngwawo: “Nguchili namalunga 7,000 vaze kavalifukwile kuli Mbaleko.”+
5 Chochimwe nawa nahalwola luno, kuvali nawa ava vasalaho+ nge mwaya kusakula chaKalunga mwomwo yalikoji lyalinene.
6 Hakuwana nge kusakula chenyi cheza mwomwo yalikoji lyalinene,+ kahanyi kacheshi kwiza mwomwo yamilimoko,+ mokomoko likoji lyalinene kaveshi kulivuluka cheka ngwavo hilikoji lyalineneko.
7 Jino ngwetu ngachilihi? Chuma chize ali nakutondatonda chikuma Isalele, kachiwanyineko, oloze vaze vasakula vachiwanyine.+ Kaha vakwavo veka vahonene uhashi wakushinganyeka kanawa,+
8 nge muze vasoneka ngwavo: “Kalunga navalingisa vasavale tulo twatuvulu,+ navahane meso akuhona kumona, namatwitwi akuhona kwivwa, palanga nakulikumbi lyalelo.”+
9 Kaha nawa Ndavichi ambile ngwenyi: “Mesa yavo yipwenga muheto, nakupwa chiliva, nakupwa chimbunji chakuhukanyisa, nakupwa fweto yakuvashishishilamo.
10 Meso avo elave wi mangana vahone kumona, nakuzembeka mitanda yavo shimbu yosena.”+
11 Shikaho nanguhulisa ngwami, Kutala vahukanyine nakulimbuka chikupu nyi? Nduma. Oloze hakuhenga chavo hakiko hanejila ulwilo kuvatu vakumafuchi eka, mangana chivevwise vakiko lisungu.+
12 Jino kachi nge kuhenga chavo chinapu luheto kukaye, kaha nawa kukeha chavo chinapu luheto kuvatu vakumafuchi eka,+ kahanyi kuvula chavo vosena nachikapwa luheto lwaluvulu chikuma.
13 Jino nguli nakuhanjika kuli enu vatu vakumafuchi eka. Hakuwana nge ngukaposetolo kuli vaka-mafuchi eka,+ ngweji kutohwesanga mulimo wami,+
14 mangana ngwami pamo nguhase kwivwisa lisungu vaze vanapu vatu jami,* nakulwila vamwe vamuli vakiko.
15 Mwomwo kachi nge kumbila vavambilile+ chinalingisa kaye vakawanyise naKalunga, kahanyi kuvetavila chavo nachikapwa chikupu kuyoya kufuma kuvafu.
16 Kaha nawa, kachi nge chihanda chamuunga vanahane kupwa mihako yatete chinapu chajila, kaha namuunga wosena nawa wajila. Kachi nge mwiji wamutondo unapu wajila, kaha namitango nawa yajila.
17 Jino kachi nge mitango yimwe vayinongele, kaha ove numba tuhu umulive wamuchipapa, vakunungile mukachi kayo nakunganyalila hamwe vyuma vyakufuma kumwiji wamulive kana,
18 kaha kanda ulivwimba kumitangoko. Mwomwo numba naulivwimba kumitango,+ anuka ngwove keshi yove unasokesa mwijiko, oloze mwiji ukiko vene unasokesa ove.
19 Jino nawamba ngwove: “Mitango vayinongele mangana vangunungileko ami.”+
20 Omu mukiko vene. Vayinongele+ mwomwo yakuhona chavo lufwelelo, oloze ove unemana mwomwo yalufwelelo.+ Shikaho kanda ulivwimbako, oloze ivwanga woma.
21 Mwomwo kachi nge Kalunga katetelele mitango yivene yakumutondoko, kaha chipwe ove nawa keshi kukutetelako.
22 Achishinganyeke omu lyapwa likoji lyaKalunga+ nautenu wenyi. Vaze valimbukile vamwene utenu wenyi,+ oloze ove mumona likoji lyaKalunga, chikalu kaha nge nautwamanga mulikoji lyenyi, mokomoko nayove nawa navakakutetako.
23 Kaha navakiko nawa, kachi nge navapwa nalufwelelo, kaha navakavanungilako,+ mwomwo Kalunga nahase kuvanungilako cheka.
24 Mwomwo kachi nge ove vakutetele kumulive wakulisokela muchipapa nakukunungila kumulive wakutumba kuze wazenekele ove kusokela, kahanyi mitango yakumulive uvene wakulima nayihambakana chikuma kuwaha kuyinungila cheka kumulive wayo uvene.
25 Mwomwo enu vandumbwami, ami kangwasakile ngwami muhone kutachikiza evi vyuma vyajila vyakuswekako,+ kuchina namulimona kupwa muvaka-mangana: Muli vaIsalele kamweshi chikuma uhashi wakushinganyeka kanawako, kuvanga kuvula chosena chavatu vakumafuchi eka chinatemo.
26 Ngocho mujila kaneyi, vaIsalele vosena+ navakavalwila. Nge muze vasoneka ngwavo: “Muka-kuyovola* mwakalovoka muZeyone,+ kaha mwakafumisa vilinga vyakuzamukila Kalunga muli Yakova.
27 Kaha echi chikiko vene chivwasano chami nangukalivwasana navo+ omu nangukafumisa jishili javo.”+
28 Kutalisa kumujimbu wamwaza, vakiko vanapu vaka-kole mangana enu mutokwelemo, oloze kutalisa kukusakula chaKalunga, vakiko vavazanga mwomwo yavakakuluka javo.+
29 Mwomwo Kalunga keshi kukevwila kupihya mawana enyi ahana nakusanyika chenyi asanyika vamweko.
30 Mwomwo nge muze mwalikangile enu kuli Kalunga+ halwola lumwe, oloze vanamitetela jino+ mwomwo yakulikanga chavo,+
31 ngocho navava nawa muholyapwa vanalikange nakumilingisa enu vamitetele, mangana navakiko nawa vahase jino kuvatetela.
32 Mwomwo Kalunga nasokelela vosena hamwe mukulikanga,+ mangana ngwenyi akavatetele vosena hamwe.+
33 Omwo lwajiminyina luheto lwaKalunga namangana enyi nachinyingi chenyi! Omwo kusopesa chenyi vahona kuchihehula nomu jijila jenyi vahona kujilengeza.
34 Mwomwo “iyaze natachikiza vishinganyeka vyaYehova,* mokomoko iyaze napu muka-kumulweza mangana?”+
35 Mokomoko “iyaze alivangile kumuhana chuma mangana ikiye amushishishilemo cheka?”+
36 Mwomwo vyuma vyosena vyafuma kuli ikiye, vyapwako kuhichila muli ikiye, kaha vyapwako mwomwo yaikiye. Kuli ikiye kupwenga upahu haya myaka yosena. Amene.
Kwinyikila Chamwishi
^ Hela., “ngumbuto.”
^ Tala Chihande A5.
^ Chipwe “nakusaka kujiha mwono wami.”
^ Hela., “vanapu mujimba wami.”
^ Chipwe “Mulwilo.”
^ Tala Chihande A5.
