Wavaka-Loma 13:1-14
13 Mutu himutu aluukenga* kuli vaze vali nawata,+ mwomwo kakweshi wata vazeneka kwitavisa kuli Kalungako,+ kaha mawata aze aliko vawahaka muvihela vyawo vize vetavisa kuli Kalunga.+
2 Shikaho weshowo mwalikanga kuli vaze vali nawata ali nakulikanga kuvyuma alongesa Kalunga, kaha vaze vanalikange kuvyuma alongesa Kalunga navakavasopesa.
3 Mwomwo ava vaka-kuyula veji kuvevwanga woma kuli vaka-kulinga vyavipi,+ keshi kuli vaka-kulinga vyamwazako. Kutala nausaka kutwama chakuzeneka kwivwa woma vaze vali nawata tahi? Linganga lika mwamwaza,+ kaha navakwalisanga,
4 mwomwo vanapu vangamba jaKalunga vakukuzachila ove mangana vakukafwenga. Oloze kachi nge uli nakulinganga vyuma vyavipi, kaha ivwa woma, mwomwo vatu kana kavambata tuhu poko yamukwale chamumbachilako. Vanapu vangamba jaKalunga, vaka-kulinga sambanjinga nakusolola utenu kumutu* uze eji kulinganga vyuma vyavipi.
5 Shikaho chatela kuli enu kwononokanga, keshi mwomwo yautenu kahako, oloze mwomwo yachivezu chenu nawa.+
6 Shikaho muli nakufwetelanga nawa mitelo, mwomwo vaze vali nakuyula vanapu vangamba jaKalunga vakuzachila vatu, vaze vali nakuzata milimo kaneyi shimbu yosena.
7 Hanenu vosena vize vyatela kuvahana: uze mwasaka mutelo,+ muhanenu mutelo, uze mwasaka mulambu, muhanenu mulambu, uze mwasaka kumwivwa woma, mwivwenu woma,+ uze mwasaka kumuvumbika, muvumbikenu.+
8 Kanda namukatwama namukuli wamutu numba umweko, shina ou kaha wakulizanga navakwenu,+ mwomwo ou azanga mukwavo natesamo lyehi jishimbi.+
9 Mwomwo jishimbi jakwamba ngwavo, “Kanda mukalinga ukojiko,+ kanda mukajiha mutuko,+ kanda mukevako,+ kanda mukevwa lwisoko,”+ nalwesholwo lushimbi lweka luliko nawa, josena vanajiwanyisa hamwe mumazu ano ngwavo: “Zangenunga vakwenu nganomu mwalizanga enu vavene.”+
10 Zangi kayeshi kulinga vyuma vyavipi kumutuko,+ shikaho zangi yikiko yatesamo jishimbi.+
11 Lingenunga ngocho mwomwo enu munatachikiza lwola luno, ngwenu ola yinahete lyehi mangana mutone kutulo twenu,+ mwomwo oholili ulwilo wetu uli mwakamwihi kuhambakana halwola luze twalumukile nakupwa vaka-kwitava.
12 Ufuku hinauya nakukuma, kaha musana kalinwomu wizenga. Shikaho tumbilenu milimo yamilima,+ kaha tuvwalenu jino vitwa vyajita vyakumusana.+
13 Tutambukenunga mwamwenemwene+ nge tuli mumusana, keshi muviwanyino vyaliuya namukupendako, keshi muujila, namuvilinga vyakuzungumako,*+ keshi muvikokojola namulisunguko.+
14 Oloze vwalenu Mwata Yesu Kulishitu,+ kaha kanda namushinganyekelanga chimweza mwakulingila vyuma wafwila mujimbako.+
Kwinyikila Chamwishi
^ Chipwe “Mwono himwono uluukenga.”
^ Chipwe “nakuzangamisa mutu.”
^ Chipwe “namuvilinga vyakwivwisa sonyiko.” MuchiHelase, a·selʹgei·a. Tala Mukana waMazu.
