Wavaka-Loma 14:1-23
14 Tambulenu mutu ou nahehela mulufwelelo lwenyi,+ oloze kanda kusopesa mutu hakulihandununa chavishinganyekako.*
2 Mutu uze ali nalufwelelo, mwalya vyuma vyosena, oloze ou nahehela mwalya visakwola kaha.
3 Ou mwalya kanda alumbilisa ou mwakana kulyako, kahou mwakana kulya kanda asopesa ou mwalyako,+ mwomwo Kalunga natambula mutu kana.
4 Ove yove iyaze numba usopese ngamba yamutu weka?+ Numba emana, numba alimbuka, ocho chili kuli mwata wenyi ivene.+ Chikupu vene, mwemana, mwomwo Yehova* nahase kumulingisa emane.
5 Mutu umwe mwamona likumbi limwe ngwenyi linaleme kuhambakana likwavo,+ mutu mukwavo mwamona likumbi limwe ngwenyi linapu ngana mwamakumbi akwavo osena.+ Echenu mutu himutu akunyuke kanawa muvishinganyeka vyenyi.
6 Ou eji kulamanga likumbi, eji kulilamanga mwomwo yaYehova.* Kaha nawa ou eji kulyanga, eji kulyanga mwomwo yaYehova,* mwomwo eji kusakwililanga Kalunga,+ kahou eji kukananga kulya, eji kukananga kulya mwomwo yaYehova,* oloze eji kumusakwililanga Kalunga.+
7 Naumwe wauchi chikupu hali etu, eji kuyoyanga mwomwo yayiveneko,+ kaha nawa wauchi eji kufwanga mwomwo yayiveneko.
8 Mwomwo chipwe nge natuyoya, natuyoya mwomwo yaYehova,*+ kaha chipwe nge natufwa, natufwa mwomwo yaYehova.* Shikaho, numba nge natuyoya numba nge natufwa, tunapu vakuli Yehova.*+
9 Mwomwo vikiko vene Kulishitu afwililile nakuyoya cheka, mangana apwenga Mwata wavafu navava vavatonyi.+
10 Nyi mwomwo ika weji kusopeselanga ndumbwove?+ Chipwe ikaze weji kulumbilishilanga ndumbwove? Mwomwo tuvosena natukemana kulutwe lwachitwamo chaKalunga chakusopela.+
11 Mwomwo vasoneka ngwavo: “Yehova* nambe ngwenyi, ‘Omu ngwayoya tu,+ mutu himutu mwakangufukaminanga, kaha vatu vosena navakalitavila hatoma kuli Kalunga.’”+
12 Ngocho etu tuvosena mutu himutu mwakalyambulula ivene kuli Kalunga havilinga vyenyi.+
13 Shikaho kanda natulisopesanga cheka navakwetuko,+ oloze tuzatenu nangolo mangana tuzeneke kuhaka chimbunji chakuhukanyisa ndumbwenu mujila yenyi, chipwe chuma chakumulimbwisa.+
14 Ami ngunatachikiza nakwitavila chikupu muli Mwata Yesu ngwami, kakweshi chuma nachimwe chalipihila chiveneko,+ kuvanga kaha nge mutu ivene mwachimona ngwenyi chinapihi, kaha kuli ikiye chinapihi vene.
15 Mwomwo kachi nge ndumbwove ali nakunyengetela mwomwo yakulya chove, kaha kaweshi nakutambuka cheka kweseka namwaya zangiko.+ Ou vafwililile kuli Kulishitu kanda naumwenyeka* mwomwo yakulya choveko.+
16 Shikaho kanda namulingisa chuma chamwaza mweji kulinganga vachambe ngwavo chachipiko.
17 Mwomwo Wangana waKalunga keshi nge kulya nakunwako nduma,+ oloze kwoloka nakuunda nakuwahilila kuhichila mushipilitu yajila.
18 Mwomwo weshowo mwazachila Kulishitu mujila kaneyi, Kalunga mwamwitavila kaha nawa navamwivwila kuwaha kuli vatu.
19 Ngocho jino, tukavangizenunga vyuma vyakuneha kuunda,+ navyuma vize vyakulitunga navakwetu.+
20 Litwaminenu kwenyeka milimo yaKalunga mwomwo yavyakulya.+ Chamuchano vene, vyuma vyosena vinatomo, oloze nachipihya chikuma kachi nge mutu mwalya chuma chize nachihukanyisa mukwavo.+
21 Chinawahe kukana kulya nyama chipwe kunwa vinyo chipwe kulinga chuma chimwe chize nachihukanyisa ndumbwove.+
22 Olwo lufwelelo kana uli nalwo, lulamenga ove ivene kumeso aKalunga. Awahilila mutu ou mwazeneka kulisopesa ivene havyuma vize netavila kulinga.
23 Kachi nge ali nakuhuhwasana, oloze himwalya, kaha nalipayisa lyehi, mwomwo kalile nalufweleloko. Chikupu vene, cheshocho mwalinga mutu chakuzeneka lufwelelo chinapu shili.
Kwinyikila Chamwishi
^ Chipwe pamo, “hakulihwojola mumuchimako.”
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Chipwe “naumunongesa.”
