Wavaka-Loma 15:1-33
15 Shikaho etu vakujikiza, twatela kukafwa vaze vakuhona kujikiza mukuhehela chavo,+ keshi kulisuulwisanga etu vaveneko.+
2 Etu tuvosena mutu himutu asuulwisenga mukwavo hakumulingila vyuma vyamwaza vyakumutunga.+
3 Mwomwo numba Kulishitu kalisuulwishile iveneko,+ kweseka namuze vasoneka ngwavo: “Kutoleka chavaze veji kukutolekanga chineza hali ami.”+
4 Mwomwo vyuma vyosena vize vasonekele hakavanga vavisonekelele kutunangula etu,+ mangana kuhichila mukukakachila chetu+ namukuvendejeka chamuVisoneka tuhase kupwa nalutalililo.+
5 Jino Kalunga uze eji kutukafwanga tukakachile, uze nawa eji kutuvendejekanga, amihane muvosena muchima umwe ngana uze apwile nawo Kulishitu Yesu,
6 mangana mulinunge hamwe,+ kaha nawa nalizu limwe* mutohwese Kalunga, Ise yaMwata wetu Yesu Kulishitu.
7 Ngocho litambulenunga* navakwenu,+ nge muze amitambwile Kulishitu nawa,+ mangana Kalunga vamutohwesenga.
8 Mwomwo nangwamba ngwami Kulishitu vamulingishile kupwa muka-kuzachila vangalami+ mwomwo yamuchano waKalunga, mangana azamise jishiko jize Kalunga ashikile vakakuluka javo,+
9 mangana vaka-mafuchi eka vatohwese Kalunga hakutetela chenyi.+ Nge muze vasoneka ngwavo: “Nangukwalisanga hatoma muli vaka-mafuchi eka, nakwimbanga myaso yakwalisa lijina lyove.”+
10 Kaha nambe cheka ngwenyi: “Enu vaka-mafuchi, wahililenunga navatu jenyi hamwe.”+
11 Kaha ambile nawa ngwenyi: “Enu vaka-mafuchi muvosena, mwalisenunga Yehova,* kaha vatu veka naveka vosena vamwalisenga.”+
12 Isaya nambe cheka ngwenyi: “Nakukapwa mwiji waYese,+ kaha kuukiko nakukapwa umwe mwakakatuka nakuyula vaka-mafuchi.+ Hali ikiye hakiko navakajika vaka-mafuchi lutalililo lwavo.”+
13 Kaha Kalunga uze eji kuhananga lutalililo amilingise muwahilile chikuma nakumihana kuunda hakumufwelela, mangana mupwenga nalutalililo chikuma kuhichila mungolo jashipilitu yajila.+
14 Jino ami ngunakunyuka ngwami enu vandumbwami, nayenu nawa mwalizanga kulinga mwamwaza, nakuzala nachinyingi chosena, kaha munahase kulihuhumuna* navakwenu.
15 Oloze ngunamisonekela hatoma havyuma vimwe ngwami ngumyanukise cheka, mwomwo yalikoji lyalinene eli vanangusolwela kuli Kalunga
16 mangana ngupwenga ngungamba yaKulishitu Yesu wakuzachila vaka-mafuchi eka.+ Ami nguli nakuzata mulimo wajila wakwambulula mujimbu wamwaza waKalunga,+ mangana ava vaka-mafuchi eka vahase kupwa wana uze etavila Kalunga, uze vanajilika nashipilitu yajila.
17 Shikaho nguli nakulisambila muli Kulishitu Yesu havyuma vyakutalisa kuli Kalunga.
18 Mwomwo kangweshi kulusuka nakuvuluka vyuma vyekako, shina vize kaha nalingi Kulishitu muli ami mangana vaka-mafuchi vononoke, kuhichila mumazu ami namuvilinga vyami,
19 nakuhichila nawa mungolo javinjikizo navyuma vyakukomwesa,+ namungolo jashipilitu yaKalunga. Ngocho kufuma kuYelusalema nakujinguluka mbwe nakuIlulikume, ngunambulula kanawa mujimbu wamwaza wakuvuluka Kulishitu.+
20 Shikaho ngwalikashile chikupu ngwami kangweshi kuvilika mujimbu wamwaza kuze vatachikiza lyehi lijina lyaKulishituko, kuchina nangutungila hachihela chamutu weka.
21 Oloze nge muze vasoneka ngwavo: “Vaze kavatambwile mujimbu wakuvuluka ikiyeko navakamona, kaha vaze vazenekele kwivwa, navakatachikiza mwalumbunukila vyuma.”+
22 Shikaho ngwahonenenga kakavulu kwiza kuli enu.
23 Oloze jino kakweshi ngalila yimwe ngunazeneka kwambulwila mujingalila jinoko, kaha nawa hamyaka yayivulu* ngunafwilanga chikuma kwiza kuli enu.
24 Kahomu nanguya kuSepanya, ngunafwelela ngwami nangukamimona, kaha namukangushinjikizako hakuya kuze omu nangukalinga nge hingunasuuluka lyehi hakutwamako nayenu katando kamwe.
25 Oloze muholyapwa nguli nakusaka kuya kuYelusalema mangana ngukazachile vaka-kujila.+
26 Mwomwo vaze vali kuMasetonya nakuAkaya vanevu kuwaha kukungulula vyuma vyavo nakuvihana kupwa wana kuli vaka-kujila vamwe vakuhutwa muYelusalema.+
27 Pundu vene, vanevu kuwaha kulinga ngocho, oloze vapwile vene namukuli wakuvalingila vyuma kana, mwomwo kachi nge vaka-mafuchi eka vanazana muvyuma vyakushipilitu vyavaka-kujila, kaha chatela nakuli vaka-mafuchi eka nawa kuvazachila vakiko navyuma vyavo vyakumujimba.+
28 Ngocho omu nangukalinga hingunakumisa lyehi vyumevi nakuhetesa kanawa wana ou* kuli vakiko, numbanyi ngukahichile okwo kuli enu hakuya kuSepanya.
29 Kaha ngunatachikiza nawa ngwami, omu nangukeza kuli enu nangukeza najikisu jakutamo jakuli Kulishitu.
30 Jino enu vandumbwami, nguli nakumilembelela kuhichila muli Mwata wetu Yesu Kulishitu nakuhichila nawa muzangi yashipilitu ngwami, ngulombelenuko chikuma kuli Kalunga ngana omu nguli nakulinga ami ivene,+
31 mangana ngukapuluke+ kuli vatu vaze kavetavako muYuleya, kaha nawa mangana mulimo wami wakuzachila vaze vali muYelusalema vakawitavile kuli vaka-kujila,+
32 mangana nge Kalunga netavila ngukeze kuli enu nakuwahilila, ngukahizumuke nayenu hamwe.
33 Kalunga uze eji kuhananga kuunda apwenga nayenu muvosena hamwe.+ Amene.
Kwinyikila Chamwishi
^ Hela., “nakanwa kamwe.”
^ Chipwe “litavilenunga.”
^ Tala Chihande A5.
^ Chipwe “kulinangula.”
^ Chipwe pamo, “hamyaka yimwe.”
^ Hela., “nakuhetesa kanawa mihako eyi.”
