Wavaka-Loma 16:1-27
16 Ngunajimbula ndumbwetu wapwevo Fwivi kuli enu, uze eji kuzachilanga chikungulwilo chize chili muKenekeleya,+
2 mangana muhase kumutambula muli Mwata nge omu mwatela kuli vaka-kujila, nakumukafwako muvyuma vyosena navisakiwa kumukafwa kuli enu,+ mwomwo naikiye nawa apwa muka-kukafwa vavavulu, nayami kumwe.
3 Ngumenekelenuko Pilishila naAkwila,+ vakwetu mutwazachila muli Kulishitu Yesu,
4 vaze vanahake kuyoya chavo* muponde mwomwo yayami.*+ Keshi nge yami kaha ngunavasakwililako, oloze navikungulwilo vyavaka-mafuchi eka nawa.
5 Kaha menekenu nawa chikungulwilo chize chili muzuvo yavo.+ Menekenu mukwetu ngwazanga Epenetu uze napu muhako watete waKulishitu kuAja.
6 Menekenu Maliya uze amizachililile milimo yayivulu.
7 Menekenu vausoko wami vaAndolonyiku naYunya,+ vakwetu vafunge, malunga vaze vanatachikiza kanawa kuli vaposetolo, vaze nawa vanalikatenga naKulishitu halwola lwalusuku kuhambakana yami.
8 Ngumenekelenuko Apilyatu, mukwetu ngwazanga muli Mwata.
9 Menekenu Uluvanu, mukwetu mutwazachila hamwe muli Kulishitu, namukwetu ngwazanga nawa Satake.
10 Menekenu Apele, ou vetavila muli Kulishitu. Menekenu vaze vakuzuvo yaAlishitovulu.
11 Menekenu kausoko kami Helochone. Menekenu vaze vakuzuvo yaNalashisu vaze vali muli Mwata.
12 Menekenu Tulufwina naTulufwosa, mapwevo vaze vali nakuzata chikuma muli Mwata. Menekenu Pelese uze twazanga, mwomwo azachile nangolo muli Mwata.
13 Menekenu Lufuse uze vasakula muli Mwata, nanaye uze ngwamona kupwa mama.
14 Menekenu Asukulitu, naFwelengone, naHelemese, naPatolova, naHelemase, navandumbwetu vaze vali navo hamwe.
15 Menekenu Fwilolongu naYulya, naNeleu nandumbwenyi wapwevo, naOlumupa, navaka-kujila vosena vaze vali navo hamwe.
16 Limenekenu navakwenu nakulisweswenya chajila. Vikungulwilo vyosena vyaKulishitu vinamimenekako.
17 Jino nguli nakumilembelela enu vandumbwami ngwami, zangamenu navaze veji kunehanga vihandwa navyuma vyakuhukanyisa vakwavo, vize vyalimbalaka nakunangula chize mwalinangula, kaha lihendenu kuli vakiko.+
18 Mwomwo vatu kana kavapwa vandungo jaMwata wetu Kulishituko, oloze vapwa vandungo vakuzachila majimo avo,* kaha hakuhanjika nachilembekeshi nahakuhanjika mazu akulambisa, veji kutangisanga michima yavava vazeneka kuvanguluka.
19 Kwononoka chenu chinasoloka kuvatu vosena, shikaho ngunawahilila hali enu. Oloze ngunasake ngwami enu mupwenga namangana akutachikiza vyuma vyamwaza, oloze mupwenga vakuzeneka kutachikiza vyuma vyavipi.+
20 Kaha Kalunga uze eji kuhananga kuunda kalinwomu achikile Satana+ mwishi yavilyachilo vyenu. Likoji lyalinene lyaMwata wetu Yesu Kulishitu lipwenga nayenu.
21 Mukwetu mutwazachila Chimoteu namimenekako, kaha navausoko wami vaLushiu naYasone naSosepate nawa vanamimeneka.+
22 Ami Telechiu, ami ngunasoneka mukanda uno, ngunamimeneka muli Mwata.
23 Ngayu+ ou eji kungutambulanga ami nachikungulwilo chosena, namimenekako. Elasatu, muka-kulama luheto lwanganda* namimenekako, nandumbwenyi Kwalatu nawa namimenekako.
24 *——
25 Jino kuli Uze nahase kumizamisa kweseka namujimbu wamwaza uze ngweji kuvilikanga ami, nakwambulula kana chakwambulula vyaYesu Kulishitu, nge omu chaya kusolola kana chakusolola vyuma vyajila vyakusweka+ vize vanalamenga muuholela hamyaka yayivulu chikuma,
26 oloze jino vanavisolola lyehi, kaha vanavijimbula kuli vaka-mafuchi osena kuhichila muVisoneka vyaupolofweto kweseka nalushimbi lwaKalunga wahaya myaka yosena, mangana chinehe kwononoka chakufuma halufwelelo.
27 Kuli Kalunga, ou apwa wamangana uka wenyi,+ kupwenga upahu kuhichila muli Yesu Kulishitu haya myaka yosena. Amene.
Kwinyikila Chamwishi
^ Hela., “vanahake jishingo javo.”
^ Chipwe “mwomwo yamwono wami.”
^ Chipwe “vakuzachila vipepa vyavo.”
^ Chipwe “kaselwa wanganda.”
^ Tala Chihande A3.
