Wavaka-Loma 2:1-29
2 Shikaho, ove mutu, numba upwa yove iya,+ kaweshi nomu mwakulipatungwilako kachi nge musopesa mukwenu, mwomwo nge nausopesa mukwenu, uli nakulipayisa ove ivene, mwomwo nayove uli nakusopesa vakwenu weji kulinganga vyuma vyovimwe.+
2 Tunatachikiza jino ngwetu Kalunga mwakasopesa vaze veji kulinganga vyuma kana kweseka namwaya muchano.
3 Ove mutu, unashinganyeka ngwove naukahasa kuchina kusopesa chaKalunga omu mwakasopesa vaze veji kulinganga vyuma kana okunyi nayove uli nakuvilinga tahi?
4 Uno weji kulumbilisanga kutohwa chalikoji lyenyi,+ nomu ashipwokela kutenuka,+ nomu eji kutalililanga chikoki+ hakuwana nge kawatachikiza ngwove Kalunga, mulikoji lyenyi, ali nakukulingisa upihilile nakwalumukako tahi?+
5 Oloze ove hakunjinjavala nahakupwa namuchima wakuhona kupihilila nakwalumuka, uli nakulikokela ove ivene utenu waKalunga halikumbi lyenyi lyautenu lyakusolola kusopesa chenyi chakwoloka.+
6 Ikiye mwakashishishilamo mutu himutu kweseka navilinga vyenyi.+
7 Kaha vaze vali nakusaka upahu naulemu namijimba yakuhona kupola,+ mwakavahana kuyoya chahaya myaka yosena hakukakachila kumulimo wamwaza.
8 Kaha vaka-vikokojola, vaze kavononoka muchanoko, oloze veji kulinganga vilinga vyakuhenga, navakamona utenu namatoto aKalunga.+
9 Luyando namalwa navikeza hamutu himutu* uze eji kulinganga vyuma vyavipi, chatete kuli vaYuleya, kaha nakuli vaHelase.
10 Oloze mutu himutu uze eji kulinganga vyuma vyamwaza, mwakapwa naupahu, naulemu, nakuunda, chatete vaYuleya,+ kaha navaHelase nawa.+
11 Mwomwo Kalunga keshi kutala vatu kumesoko.+
12 Vosena vaze valingile shili chakuzeneka jishimbi,+ navakanonga nawa chakuzeneka jishimbi, oloze vosena vaze valingile shili mujishimbi navakavasopesa najishimbi.+
13 Mwomwo vaka-kwivwilila jishimbi keshi vakiko vanapu vaka-kwoloka kumeso aKalungako, shina vaka-kukavangiza jishimbi vakiko navakavulukila kwoloka.+
14 Mwomwo vatu vakumafuchi eka vaze vahona jishimbi,+ omu veji kulinganga vyuma vyamujishimbi kweseka nachisemwa chavo, numba tuhu vatu kanava kaveshi najishimbiko, oloze vakiko vavene vanapu jishimbi.
15 Ava vakiko vene vaze veji kusololanga milimo yajishimbi vasoneka lyehi mumichima yavo, oku vivezu vyavo vili nakuhana unjiho hali vakiko, kaha vishinganyeka vyavo, navivahana milonga, chipwe kuvahakwila.
16 Echi nachikapwako halikumbi lize Kalunga mwakazachisa Kulishitu Yesu hakusopesa vyuma vyavatu vyakusweka,+ kweseka nomu waya mujimbu wamwaza ngweji kuvilikanga.
17 Jino kachi nge ove walivuluka ngwove ukaYuleya,+ kaha weji kupendaminanga hajishimbi nakulisashila muli Kalunga,
18 kaha nawa watachikiza mwaya muchima wenyi nakukundwiza vyuma vinahambakana kuwaha, mwomwo veji kukunangulanga mazu akufuma* muJishimbi,+
19 kaha unakunyuka nawa ngwove ove wapwa utwamina watupuputa, unapu umumunyi kuli vaze vali mumilima,
20 umuka-kwolola vaze vahona mangana, umuka-kunangula vana vavandende, kaha nawa unatachikizako mumwe mwaya chinyingi namwaya muchano muJishimbi—
21 jino ove weji kunangulanga mukwenu, kaweshi kulinangula ove iveneko tahi?+ Ove weji kwambululanga ngwove “Kanda kwivako,”+ uno weji kwivanga tahi?
22 Ove weji kwambanga ngwove “Kanda kulinga ukojiko,”+ uno weji kulinganga ukoji tahi? Ove weji kwivwilanga makombelo unyengwe, uno weji kwivanga vyuma vyamujitembele tahi?
23 Ove weji kulisashilanga jishimbi, uno weji kusaulanga Kalunga hakuzombwojoka Jishimbi tahi?
24 Mwomwo “lijina lyaKalunga vali nakulisaulanga muli vaka-mafuchi eka mwomwo yayenu,” nge omu vasoneka.+
25 Mwomwo ungalami+ naukunganyalisa kuvanga kaha nge mulinganga mwaya jishimbi.+ Oloze kachi nge umuka-kuzombwojoka jishimbi, kaha ungalami wove unalumuka lyehi kupwa ulima.
26 Shikaho kachi nge chilima+ eji kulamanga vyuma vyakwoloka vyaJishimbi, kutala ulima wenyi kaveshi kuumona ngwavo ungalamiko numba?+
27 Kahou napu chilima kumujimba hakukavangiza chenyi Jishimbi, mwakusopesa ove muka-kuzombwojoka jishimbi numba tuhu ukwechi jishimbi vasoneka kaha nawa ungalami.
28 Mwomwo kaYuleya keshi ou vamona kuvatu kupwa kaYuleyako,+ kaha nawa ungalami wenyi kaweshi ou wakumujimbako.+
29 Oloze kaYuleya shina ou napu kaYuleya mumuchima,+ kaha ungalami wenyi unapu ou wakumuchima+ kuhichila mushipilitu, keshi kuhichila mujishimbi vasonekako,+ nduma. Kaha mutu kanou veji kumwalisanga kuli Kalunga keshi kuli vatuko.+
Kwinyikila Chamwishi
^ Chipwe “hamwono wamutu himutu.”
^ Chipwe “kukunangulanga hakanwa namazu akufuma.”
