Wavaka-Loma 3:1-31
3 Jino kaYuleya nawahila halihize? Nyi ungalami watwama nanganyo mukaze?
2 KaYuleya nahambakana vakwavo mwosena. Chatete, vavaselelele vihande vyajila vyaKalunga.+
3 Uno kachi chapwa ngachilihi? Kachi nge vamwe vazenekele lufwelelo, kutala kuzeneka chavo lufwelelo nachilingisa kushishika chaKalunga chiyenga muufwefwelekete tahi?
4 Nduma. Kalunga vamumonenga kupwa wamuchano,+ oloze vatu vosena vavamonenga kupwa vaka-kwonga,+ nge omu vasoneka ngwavo: “Mangana ove vakumone kupwa uwakwoloka kumazu ove, nakuhasa kusamba omu navakusopesa.”+
5 Oloze kachi nge vilinga vyetu vyakuhenga navisolola kwoloka chaKalunga, kaha natwamba ngwetu ika? Uno natwamba ngwetu Kalunga apwa wakuhenga hakusolola utenu wenyi tahi? (Ami nguli nakuhanjika nganomu vatwala vatu.)
6 Nduma. Kachi nge Kalunga apwa wakuhenga, nyi kaye mwakakasopesa ngachilihi?+
7 Oloze kachi nge makuli ami analingisa muchano waKalunga vautachikize chikuma nakuneha upahu kuli ikiye, nyi mwomwo ika vali nakungusopesela ngwavo ngumuka-shili?
8 Kaha natuhonena ika kwamba ngana muze veji kutuvangijikilanga malunga vamwe ngwavo etu tweji kuhanjikanga ngwetu, “Tulingenu vyuma vyavipi mangana vyuma vyamwaza visoloke”? Kusopesa navavasopesa vatu kana chinayi mwaya chiyulo chakwoloka.+
9 Jino natwamba ngachilihi? Kutala etu tunavahambakana vakiko tahi? Nduma. Mwomwo tunambe lyehi ngwetu vaYuleya navaHelase vosena vatwama mushili,+
10 nge omu vasoneka ngwavo: “Kakweshi mutu wakwolokako, numba vene umwe,+
11 kakweshi mutu anangakanako, kaha nawa kakweshi mutu eji kutondatondanga Kalungako.
12 Vatu vosena vanapyapumuka, vosena vanalumuka nakupwa vamokomoko. Kakweshi mutu numba umwe eji kusololanga likojiko, naumwe vene wauchi.”+
13 “Miliu yavo yinapu nge vimbumbe vyahululu, vanambembejeka vakwavo namalimi avo.”+ “Kumivumbo yavo kuli ulembe waviyenge.”+
14 “Mutunwa twavo munazale mbe namazu akwangula namazu amapi.”+
15 “Mahinji avo eji kulahilanga kukumwanga manyinga.”+
16 “Mujijila javo mwatwama lwenyeka naluyando,
17 kaha kavatachikijile jila yakuundako.”+
18 “Kaveshi kwivwa Kalunga womako.”+
19 Jino tunatachikiza ngwetu, vyeshovyo jeji kuhanjikanga Jishimbi, jeji kulwezanga ava vali muJishimbi, mangana tunwa twosena vatuholese kulu, mangana kaye kosena vakahase kukasopesa kuli Kalunga.+
20 Shikaho, kakweshi mutu umwe* navakavulukila kwoloka kumeso enyi hamilimo yamujishimbiko,+ mwomwo jishimbi jikiko jalingisa mutu apwenga nachinyingi chakwoloka chakutachikiza shili.+
21 Oloze jino kwoloka chaKalunga chinasoloka hatoma chakuzeneka jishimbi,+ nge omu Jishimbi naMazu aVapolofweto vyahana unjiho,+
22 chikiko vene kwoloka chaKalunga hakufwelela Yesu Kulishitu, chize chili navosena vaze vali nalufwelelo. Mwomwo kuli Kalunga chihandwa chauchiko.+
23 Mwomwo vosena vanalingi shili, kaha vanahono kuheta haseteko yaupahu waKalunga,+
24 kaha kwoloka chize vali nakuvavulukila chinapu chawana wakanyombo+ halikoji lyenyi lyalinene+ kuhichila mukuvasokola nandando yakusokola yaKulishitu Yesu.+
25 Kalunga amuhanyine kupwa wana wakufwika hajishili javaze*+ navafwelela mumanyinga enyi.+ Kalunga alingile ngocho mangana asolole kwoloka chenyi, mwomwo apwile nakuvatalilila chikoki nakuvakonekela jishili javo jize vavulumwine lyehi kushikulu.
26 Chapwile ngocho mangana asolole kwoloka chenyi+ nakumyaka yino nawa, mangana apwenga wakwoloka numba vene omu mwavulukila mutu kwoloka uze ali nalufwelelo muli Yesu.+
27 Jino chuma chakulisashila chilihize? Chauchi. Nalushimbi muka? Nalushimbi lwamilimo tahi?+ Nduma, nalushimbi lwalufwelelo.
28 Mwomwo tunamono ngwetu, mutu veji kumuvulukila kwoloka halufwelelo chakuzeneka milimo yamujishimbi.+
29 Uno Kalunga apwa Kalunga kavaYuleya kaha tahi?+ Uno kapwa nawa Kalunga kavatu vakumafuchi ekako nyi?+ Eyo, apwa nawa wavatu vakumafuchi eka.+
30 Hakuwana nge Kalunga apwa umwe kaha,+ ikiye vene uze mwavulukila vangalami kwoloka+ halufwelelo lwavo, nakuvulukila nawa vilima kwoloka+ halufwelelo lwavo.
31 Uno tuli nakujimbangana jishimbi mwomwo yalufwelelo lwetu tahi? Nduma. Oloze etu tuli nakulama jishimbi.+