Wavaka-Loma 4:1-25
4 Hakuwana nge chili ngocho, natwamba ngwetu vyuma muka anganyalile Apalahama, ou apwa kakuluka yetu kumujimba?
2 Chakutalilaho, kachi nge Apalahama vamuvulukilile kwoloka hamilimo yenyi, kachi ali nahakulisashila, oloze keshi kumeso aKalungako.
3 Uno chisoneka chahanjika ngachilihi? Chahanjika ngwacho, “Apalahama afwelelele Yehova,* kaha vamuvulukile kupwa wakwoloka.”+
4 Jino mutu uze eji kuzatanga, fweto yenyi kaveshi kuyimona kupwa hilikoji lyalineneko, oloze hichuma chize vatela kumuhana.*
5 Jino kumutu uze keshi kuzatako, uze mwafwelela Ou eji kuvulukilanga kwoloka muka-kuzamukila Kalunga, halufwelelo lwenyi navamuvuluka kupwa wakwoloka.+
6 Omu mukiko nawa ahanjika naNdavichi hakuwahilila chamutu uze navavulukila kwoloka kuli Kalunga chakuzeneka milimo ngwenyi:
7 “Vawahilila vaze vanakonekela lyehi vilinga vyavo vyaupapwoki, vaze vanafwikila* lyehi jishili javo.
8 Awahilila mutu uze Yehova* mwazeneka kutala hashili yenyi.”+
9 Uno echi kuwahilila kana veji kuchivwanga kuli vangalami kaha tahi, nyi nakuli vilima?+ Mwomwo tweji kwambanga ngwetu: “Apalahama vamuvulukile kupwa wakwoloka halufwelelo lwenyi.”+
10 Jino apwile ngachilihi halwola vamuvulukile kupwa wakwoloka? Apwile ngalami tahi, nyi chilima? Kapwile ngalamiko oloze apwile chilima.
11 Kaha atambwile chinjikizo+ chakumujihana, chize chapwile katachikijilo kakusolola nge apwile wakwoloka kuhichila mulufwelelo luze apwile nalwo shimbu apwile chilima, mangana apwenga sevo yavosena vaze vatwama nalufwelelo+ numba tuhu vilima, mangana navakiko vavavuluke kupwa vakwoloka,
12 mangana apwenga nawa ise yavangalami, keshi kuli vaze valama ungalami kahako, oloze nakuli vaze veji kutambukanga mukulonga mwaya lufwelelo luze apwile nalwo kakuluka yetu Apalahama+ shimbu apwile chilima.
13 Mwomwo lushiko luze vamushikile Apalahama ngwavo mwakapwa swana wakuswana kaye,+ kavaluhanyine kuli ikiye chipwe kuli vaka-tanga* yenyi kuhichila mujishimbiko, oloze kuhichila mukwoloka chenyi hakupwa nalufwelelo.+
14 Mwomwo kachi nge vaze valama jishimbi vanapu vaswana, kaha lufwelelo lunapu lwamokomoko, nalushiko nawa lunajimbangana.
15 Mwomwo Jishimbi jeji kunehanga utenu,+ oloze kuze kakweshi lushimbiko, nakuzomboka lushimbi nawa kacheshikoko.+
16 Shikaho, lufwelelo lukiko lwalingishile numba lushiko luze vamushikile lukahase kupwako kweseka nalikoji lyalinene lyaKalunga,+ mangana lushiko kana lukazame mbe kuli vaka-tanga* yenyi vosena,+ keshi kuli vaze veji kulamanga Jishimbi kahako, oloze nakuli vosena vaze vakwechi lufwelelo ngana luze lwaApalahama uze apwa setu tuvosena.+
17 (Nge muze vasoneka ngwavo: “Ami ngunakutongola upwenga usevo yavaka-mafuchi amavulu.”)+ Echi chasolokele kumeso aKalunga uze vafwelelele kuli Apalahama, Kalunga uze eji kulingisanga vafu vayoye, nakuvuluka nawa vyuma vyazeneka kupwako kwijiva nge kuvili.*
18 Numba tuhu kakwapwile vyuma vyakumulingisa apwenga nalutalililoko, oloze hakupwa nalutalililo, apwile nalufwelelo ngwenyi mwapwa sevo yavaka-mafuchi amavulu nge omu vahanjika ngwavo: “Mukiko navakavula vaka-tanga* yove.”+
19 Numba tuhu ikiye kazeyele kulufweleloko, oloze amwene mujimba wenyi kwijiva nge wakufwa, (mwomwo apwile namyaka yakusemuka kafwe 100),+ nakumona nawa ngwenyi Sala nahituka lyehi.*+
20 Oloze mwomwo yalushiko lwaKalunga, kakakasanyine nakuhona kufwelelako, oloze akwachile ngolo halufwelelo lwenyi, nakumutohwesa Kalunga,
21 kaha enjikijile ngwenyi omu nashiki lyehi Kalunga mwahasa nakulingamo nawa.+
22 Shikaho “vamuvulukile kupwa wakwoloka.”+
23 Ngocho lizu lyakwamba ngwavo “vamuvulukile” kavalisonekelele ikiye kahako,+
24 oloze valisonekelele nayetu nawa, etu vatelele kuvuluka kupwa vakwoloka, mwomwo twetavila muli Ou asangwile Mwata wetu Yesu kuvafu.+
25 Ikiye vamwechele mwomwo yavilinga vyetu vyakuhenga,+ uze vasangwile nawa mangana vatuvuluke kupwa tuvakwoloka.+
Kwinyikila Chamwishi
^ Tala Chihande A5.
^ Chipwe “oloze himukuli.”
^ Chipwe “vaze vanakonekela.”
^ Tala Chihande A5.
^ Hela., “kumbuto.”
^ Hela., “kumbuto.”
^ Chipwe pamo, “nakulingisa vyuma vize kavyeshiko vipwengako.”
^ Hela., “mbuto.”
^ Chipwe “nahambakana lyehi haseteko yakusema.”
