Wavaka-Loma 6:1-23
6 Shikaho, natwamba ngwetu ika? Uno tutwamenga lika mushili mangana ngwetu likoji lyalinene livule tahi?
2 Nduma. Hakuwana nge etu twafwa lyehi kushili,+ natuhasa ngachilihize kutwama lika mushili?+
3 Nyi munahono kutachikiza ngwenu etu tuvosena vambapachishile muli Kulishitu Yesu+ vatumbapachishile mukufwa chenyiko tahi?+
4 Shikaho, etu vatufunjilile naikiye hamwe kuhichila mulumbapachiso lwetu mukufwa chenyi,+ mangana nge muze vasangwile Kulishitu kuvafu kuhichila muupahu waIse, nayetu nawa tutambukenga mujila yayihya yakuyoya.+
5 Kachi nge vanatunungu hamwe naikiye mukufwa chakufwana nge chize chenyi,+ kaha navakatununga nawa naikiye hamwe mukusanguka chakufwana nge chize chenyi.+
6 Mwomwo tunatachikiza ngwetu mutu wetu wamwaka vamupapalilile naikiye hamwe hachitondo,+ mangana mujimba wetu washili uzeneke kupwa nangolo hali etu,+ mangana tuzeneke kupwanga lika tuvandungo jashili.+
7 Mwomwo ou nafu lyehi, nasambe lyehi* kushili yenyi.
8 Kaha nawa kachi nge tunafwila naKulishitu hamwe, kaha tunafwelela ngwetu natuyoyelanga nawa naikiye hamwe.
9 Mwomwo tunatachikiza ngwetu Kulishitu, omu vanamusangula lyehi kuvafu,+ keshi kukafwa chekako,+ kufwa kacheshi cheka nangolo hali ikiyeko.
10 Mwomwo kufwa chize afwile, afwile kamwe kaha kunahu kushili,*+ oloze kuyoya chize ayoya, ayoyela Kalunga.
11 Ngocho nayenu nawa, limonenunga enu vavene kupwa muvakufwa lyehi kushili, oloze mwayoyela Kalunga kuhichila muli Kulishitu Yesu.+
12 Shikaho kanda namwechelela shili yiyulenga lika nge mwangana mumijimba yenu yize yeji kufwanga+ nakumilingisa mwononokenga kukufwila chayoko.
13 Kaha nawa kanda namuhananga lika mijimba yenu* kushili kupwa vitwa vyamilimo yakuhengako, oloze lihanenu enu vavene kuli Kalunga nge vaka-kuyoya vaze vanafumu kuvafu, nakuhana nawa mijimba yenu* kuli Kalunga kupwa vitwa vyamilimo yakwoloka.+
14 Mwomwo shili kayatela kupwa nangolo hali enuko, hakuwana nge enu kamweshi mujishimbiko,+ oloze muli mulikoji lyalinene.+
15 Kaha twambenga ngachilihi? Uno tulinge tuhu shili mwomwo ngwetu katweshi mujishimbiko, oloze tuli mulikoji lyalinene tahi?+ Nduma.
16 Uno kamwatachikijile ngwenu nge namulihana enu vavene kumutu umwe nge vandungo vakwononoka, kaha munapu muvandungo jamutu uze munononoka,+ chipwe vashili+ yakutwala kukufwa,+ chipwe vakwononoka chakutwala kukwolokako nyi?
17 Oloze tunakusakwilila Kalunga hakuwana nge halwola lumwe mwapwilenga muvandungo jashili, oloze mwononokele namichima yenu kukunangula chize vamihanyine.
18 Hakuwana nge vamilingishile kupwa vakulihehwa kushili,+ mwapwile jino muvandungo kukwoloka.+
19 Ami nguli nakuzachisa hanjikiso yayashi yize navevwa vatu mwomwo yakuhehela chenu kumujimba. Mwomwo nge muze mwahanyine vilyo vyamijimba yenu vipwenga vandungo kumajilo nakuupapwoki wakutwala kuupapwoki, ngocho jino hanenu vilyo vyamijimba yenu vipwenga vandungo kukwoloka chakutwala kukujila.+
20 Mwomwo omu mwapwilenga muvandungo jashili, mwapwilenga vakulihehwa kukwoloka.
21 Jino mihako muka mwapwilenga nakwima halwola kana luze? Vyuma vize muli nakwivwila sonyi oholili. Mwomwo makumishilo avyuma kana, hikufwa.+
22 Oloze omu vanamilingisa lyehi kupwa vakulihehwa kushili nakupwa jino muvandungo kuli Kalunga, muli nakwima mihako yakutwala kukujila,+ kaha hakukuminyina hikuyoya chahaya myaka yosena.+
23 Mwomwo fweto yashili kufwa,+ oloze wana uze Kalunga eji kuhananga ukiko vene kuyoya chahaya myaka yosena+ kuhichila muli Kulishitu Yesu Mwata wetu.+
Kwinyikila Chamwishi
^ Chipwe “nasokoka; vanamukonekela.”
^ Kulumbununa, afwile mangana afumise shili.
^ Hela., “vilyo vyenu.”
^ Hela., “vilyo vyenu.”
