Wavaka-Loma 7:1-25
7 Enu vandumbwami, uno chinafwane nge kamwatachikizako (mwomwo nguli nakuhanjika kuli vaze vatachikiza jishimbi) ngwenu, Jishimbi jili nangolo hamutu shimbu achili wamutonyi nyi?
2 Chakutalilaho, pwevo wakusomboka akashiwa kuli lunga lyenyi kweseka najishimbi shimbu lunga lyenyi achili wamutonyi, oloze nge lunga lyenyi nafu, uze pwevo nakasunuka kulushimbi lwalunga lyenyi.+
3 Ngocho, kachi nge uze pwevo mwasomboka kuli lunga weka shimbu lunga lyenyi achili wamutonyi, kaha navamuvuluka ngwavo, pwevo muka-ukoji.+ Oloze nge lunga lyenyi nafu lyehi, kaha nalihehwe kulushimbi lwalunga lyenyi, ngocho keshi kupwa pwevo muka-ukojiko nge mwasomboka kuli lunga weka.+
4 Ngocho, enu vandumbwami, nayenu nawa vamilingishile kupwa muvafu kuJishimbi kuhichila mumujimba waKulishitu, mangana mupwenga vaweka,+ muvayou vasangwile kuvafu,+ mangana tumwiminenga Kalunga mihako.+
5 Mwomwo shimbu twayoyelenga kweseka nomu mwaya mujimba, jipeha javilinga vyashili jize vasangumwine naJishimbi, jazachilenga mumijimba yetu* mangana jimenga mihako yakuneha kufwa.+
6 Oloze jino tunakasunuka lyehi kuJishimbi,+ mwomwo tunafu lyehi kuvyuma vize vyatuhoneselenga, mangana tupwenga tuvandungo mujila yayihya kuhichila mushipilitu,+ keshi nge mujila yamwaka kuhichila mujishimbi vasonekako.+
7 Ngocho natwamba ngwetu ika? Uno Jishimbi jinapu shili tahi? Nduma. Chikupu vene, kachi nge kakwapwile Jishimbiko,+ kachi shili kangwayitachikijileko. Chakutalilaho, lwiso kachi kangwalutachikizako, nge Jishimbi kajambile ngwajo: “Kanda mukevwa lwisoko.”+
8 Oloze shili hakuwana kengililo kuhichila mujishimbi, yanehele lwiso lweka nalweka muli ami, mwomwo omu kwazenekele kupwa jishimbi, shili yapwile yakufwa.+
9 Halwola kwazenekele kupwa jishimbi, ami ngwapwile nguwamutonyi. Oloze omu jejile jishimbi, shili yayoyele cheka, oloze ami ngwafwile.+
10 Kaha jishimbi jize japwile jakutwala kukuyoya,+ ami ngwajimwene ngwami jakutwala kukufwa.
11 Mwomwo shili hakuwana kengililo kuhichila mujishimbi, yanguzondwele nakungujiha kuhichila mujishimbi kana.
12 Ngocho Jishimbi japwa jajila, kaha nalushimbi elu vanatulweze lwapwa lwajila, lwakwoloka, lwamwaza.+
13 Uno chuma chamwaza chikiko chinangunehela kufwa tahi? Nduma. Oloze shili yikiko yinanehe kufwa kuli ami, mangana shili yisoloke nge yikiko yinakuneha kufwa kuli ami kuhichila muvyuma vyamwaza,+ mangana shili yisweze chikuma kuhichila mujishimbi.+
14 Mwomwo tunatachikiza ngwetu, Jishimbi japwa jakushipilitu, oloze ami ngumutu wakumujimba, valanjisa lyehi muundungo washili.+
15 Mwomwo ami kangwatachikijile vyuma nguli nakulingako. Mwomwo kangweshi kulinga vyuma ngwasaka kulingako, oloze ngweji kulinganga vyuma ngwahunga.
16 Shikaho kachi nge ngweji kulinganga vyuma vize kangwasaka kulingako, kaha ngunetavila ngwami Jishimbi japwa jamwenemwene.
17 Oloze jino ami keshi yami ngweji kuvilingangako, shina shili yize yatwama muli ami.+
18 Mwomwo ngunatachikiza ngwami muli ami, mokomoko ngwami, mumujimba wami, kamwatwama chuma chamwazako, mwomwo nguli nakufwila kulinga vyuma vyamwenemwene, oloze kangweshi nangolo jakulinga vyuma kanako.+
19 Mwomwo kangweshi kulinga vyuma vyamwaza vize ngwasaka kulingako, oloze vyavipi vize kangwasaka kulingako, vikiko ngweji kulinganga.
20 Jino kachi nge ngweji kulinganga vize kangwasaka kulingako, kaha keshi yami nguli nakulinga vyuma kanako, shina shili yize yatwama muli ami.
21 Shikaho ngunawane lushimbi elu kuli ami ngwami: Omu nangusaka kulinga vyuma vyakwoloka, vyuma vyavipi vikiko naviza muli ami.+
22 Ami ngweji kwivwilanga kuwaha chikupu jishimbi jaKalunga kweseka namutu wami wamutulo,+
23 Oloze ngunamono lushimbi lweka mumujimba wami* luze luli nakulwa nalushimbi elu lwamuvishinganyeka vyami+ nakungutwalanga muufunge walushimbi lwashili+ elu luli mumujimba wami.*
24 Omu ngwavindama ami! Iyaze mwanguyovola kumujimba uno uli nakungutwala kukufwa kanechi?
25 Ngunamusakwilila Kalunga kuhichila muli Yesu Kulishitu Mwata wetu! Ngocho jino, muvishinganyeka vyami, ami ngwapwa ngundungo kujishimbi jaKalunga, oloze kumujimba ngwapwa ngundungo kulushimbi lwashili.+
