Wavaka-Loma 8:1-39
-
Kuyoya nakulihehwa mwomwo yashipilitu (1-11)
-
Shipilitu yakumitavila kupwa muvana nayihana unjiho (12-17)
-
Vyuma vyakutenga vili nakuvandamina lwola lwakusolola vana vaKalunga (18-25)
-
‘Shipilitu yeji kutulembelelangako’ (26, 27)
-
Vavatongwele chimweza kuli Kalunga (28-30)
-
Kufungulula nazangi yaKalunga (31-39)
8 Shikaho vaze valikata naKulishitu Yesu kaveshi nahakuvapayishilako.
2 Mwomwo lushimbi lwashipilitu yize yeji kuhananga kuyoya hakulikata naKulishitu Yesu, lunamilingisa lyehi kupwa vakulihehwa+ kulushimbi lwashili nakufwa.
3 Chuma chize jahonene Jishimbi kulinga+ mwomwo yakuhehela chamujimba,+ Kalunga achilingile hakutuma Mwanenyi+ muchifwanyisa chamujimba washili+ mangana afumiseko shili, nakupayisa shili mumujimba,
4 mangana vyuma vyakwoloka vyaJishimbi vitesemo muli etu+ tweji kutambukanga mwaya shipilitu, keshi nge omu mwaya mujimbako.+
5 Mwomwo vaze vayoya mwaya mujimba, vajika vishinganyeka vyavo havyuma vyamujimba,+ oloze vaze vayoya mwaya shipilitu, vajika vishinganyeka vyavo havyuma vyashipilitu.+
6 Mwomwo kujika vishinganyeka havyuma vyamujimba cheji kunehanga kufwa,+ oloze kujika vishinganyeka havyuma vyashipilitu cheji kunehanga kuyoya nakuunda,+
7 mwomwo kujika vishinganyeka havyuma vyamujimba cheji kunehanga kole naKalunga,+ mwomwo mujimba kawaliluula kujishimbi jaKalungako, kaha kaweshi kukaliluulako.
8 Ngocho vaze vayoya mwaya mujimba kaveshi kuhasa kumwivwisa Kalunga kuwahako.
9 Oloze nge shipilitu yaKalunga yatwama chikupu muli enu, kaha enu kamweshi nakuyoya mwaya mujimbako, shina mwaya shipilitu.+ Oloze kachi nge mutu keshi nashipilitu yaKulishituko, kaha mutu kana kapwa wakuli ikiyeko.
10 Oloze kachi nge Kulishitu alikata nayenu,+ kaha mujimba unafu mwomwo yashili, oloze shipilitu yinapu kuyoya mwomwo yakwoloka.
11 Jino kachi nge shipilitu yayauze asangwile Yesu kuvafu yatwama muli enu, kahou asangwile Kulishitu Yesu kuvafu,+ mwakayoyesa namijimba yenu nawa yize yeji kufwanga+ kuhichila muli shipilitu yenyi yize yatwama muli enu.
12 Ngocho jino, enu vandumbwami, tuli nachilika, keshi chakumujimba mangana tuyoyenga mwaya mujimbako, nduma.+
13 Mwomwo kachi nge namuyoyanga mwaya mujimba, kaha chikupu vene namufwa, oloze kachi nge vilinga vyamujimba namuvijiha+ nashipilitu, kaha namuyoyanga.+
14 Mwomwo vosena vaze vatwaminyina nashipilitu yaKalunga, vapwa chikupu vana vaKalunga.+
15 Mwomwo enu kamwatambwile shipilitu yaundungo yakumivwisa cheka womako, oloze mwatambwile shipilitu yakumitavila kupwa muvana, yize tweji kutambakananga nayo ngwetu: “Apa,* Ove Tata!”+
16 Shipilitu yivene yeji kuhananga unjiho nashipilitu yetu+ ngwayo tuvana vaKalunga.+
17 Jino kachi nge tuvana, kaha tunapu tuvaswana nawa, vaswana jaKalunga chikupu, oloze vaswana vakuswana naKulishitu hamwe,+ chikalu kaha tuli nakuyanjila hamwe+ mangana vatutohwesele nawa hamwe.+
18 Mwomwo ngunamono ngwami vihuli viliko lwola luno, vinakuminamo hakuvyesekesa naupahu uze naveza kukasolola muli etu.+
19 Mwomwo vyuma vyakutenga vyosena vili nakuvandamina nakutalilila chikuma lwola lwakusolola vana vaKalunga.+
20 Mwomwo vyuma vyakutenga vyaluukile kuufwefwelekete,+ keshi nge vivene vyaliluwileko, oloze kuhichila muli uze aviluwile mangana halutalililo,
21 vyuma vyakutenga navikiko nawa vakavilingise kupwa vyakulihehwa+ kuundungo wakuya nakupola, nakwingila mukulihehwa chaupahu chavana vaKalunga.
22 Mwomwo tunatachikiza ngwetu vyuma vyakutenga vyosena vili nakulikemenena hamwe mikemo nakwivwila hamwe kukola palanga nakulelo lino.
23 Kaha keshi ngocho kahako, oloze nayetu nawa, etu tuli lyehi namihako yatete, yikiko vene shipilitu, tuli nakulikemenenanga mikemo mujitulo jetu,+ shimbu tuli nakuvandamina namuchima wosena kutwitavila kupwa tuvana,+ chikiko vene kutusokola kumijimba yetu nandando yakusokola.
24 Mwomwo vatulwililile mulutalililo kanelu, oloze lutalililo luze lunatesamo lyehi kalweshi kupwa cheka lutalililoko. Mwomwo kachi nge mutu namono lyehi chuma apwanga nakutalilila, kutala mwachitalilila lika nyi?
25 Oloze kachi nge tuli nakutalilila+ ocho chichili kanda tumone,+ kaha natuchivandamina lika nalukakachila.+
26 Chochimwe nawa nashipilitu, yeji kutukafwangako muvyuma twahehela,+ mwomwo ukalu twatwama nawo shina wakuhona kutachikiza vyuma twatela kulomba kweseka nomu twatela kuvilomba, oloze shipilitu yivene yeji kutulembelelangako hakulyonyinga chetu natuhona kutufula mazu.
27 Ou eji kutalatalanga mumichima+ natachikiza omu yinatwale shipilitu, mwomwo yili nakuvalembelelako vaka-kujila kweseka nomu mwaya muchima waKalunga.
28 Tunatachikiza ngwetu Kalunga eji kulingisanga milimo yenyi yosena yilikwatasane hamwe mangana yinganyalise vaze vazanga Kalunga, vaze asanyika kweseka nomu mwaya kujina chenyi,+
29 mwomwo vaze atachikijile chatete avatongwele chimweza vakapwenga vakufwana nganomu afwana Mwanenyi,+ mangana ikiye akapwenga twatwa+ muli vandumbwenyi vavavulu.+
30 Kaha nawa, vaze atongwele chimweza,+ vakiko vene vaze asanyikile nawa,+ kaha vaze asanyikile, vakiko vene vaze avulukilile kwoloka nawa.+ Kukuminyinako, vaze avulukilile kwoloka, vakiko vene vaze atohwesele nawa.+
31 Jino natwamba ngwetu ika havyumevi? Kachi nge Kalunga ali kuli etu, kaha iyaze mwatwimanyina nakole?+
32 Hakuwana nge Kalunga katetelele Mwanenyiko, oloze amwechele hali etu tuvosena,+ kaha mwahona ngachilihi hamwe naMwanenyi kutuhana vyuma vyosena mulikoji?
33 Iyaze mwahasa kuhana mulonga ava asakula Kalunga?+ Kalunga Ikiye eji kuvavulukilanga kwoloka.+
34 Nyi iyaze mwavapayisa? Kulishitu Yesu ikiye vene uze afwile, ikiye vene uze vasangwile kuvafu, uze ali kulivoko lyachilyo lyaKalunga,+ uze nawa eji kutulembelelangako.+
35 Nyi iyaze mwatuhandununa kuzangi yaKulishitu?+ Luyando tahi, nyi vihuli, nyi luyanjisa, nyi zala, nyi uvu, nyi ponde, nyi poko yamukwale?+
36 Chinapu vene nge muze vasoneka ngwavo: “Vali nakutujihajiha lwola lwosena mwomwo yayove, vali nakutumona nge tumikoko navasaka kujiha.”+
37 Olozenyi muvyuma vyosenevi tuli nakufungulula chikupu+ kuhichila muli ou atuzangile.
38 Mwomwo ngunenjikiza chikupu ngwami, chipwe kufwa, chipwe kuyoya, chipwe vangelo, chipwe jifulumende, chipwe vyuma viliko, chipwe vyuma navikeza kulutwe, chipwe jingolo,+
39 chipwe kujindama helu, chipwe kukunama, chipwe chuma cheka chakutenga, kavyeshi kuhasa kutuhandununa kuzangi yaKalunga eyi yili muli Kulishitu Yesu Mwata wetuko.
Kwinyikila Chamwishi
^ Lizu lyachiHepeleu chipwe chiAlamayiki lize lyalumbununa, “Ove Tata.”
