Wavaka-Loma 9:1-33
9 Nguli nakuhanjika muchano muli Kulishitu, kangweshi nakulyongako, nge omu chivezu chami chili nakuhana unjiho hali ami muli shipilitu yajila,
2 ngwami, nguli nachinyengo chachinene navikola vyakuzeneka kukuma mumuchima wami.
3 Mwomwo ami ngunalizange kuhandunuka kuli Kulishitu nge mutu wakwangula mwomwo yavandumbwami, vausoko wami nge omu mwaya mujimba,
4 vaze vapwa vaIsalele. Vakiko vavetavila kupwa vana,+ nakuvahana upahu,+ navivwasano, naJishimbi,+ namulimo wajila,+ najishiko.+
5 Kuli vakiko kukiko kwafuma vakakuluka jetu,+ kaha kuli vakiko nawa kukiko vene kwafumine Kulishitu nge omu mwaya mujimba.+ Kaha Kalunga, ou ali helu lyavyosena, vamwalisenga haya myaka yosena. Amene.
6 Oloze kacheshi nge mazu aKalunga anayi mwamokomokoko. Mwomwo keshi nge vosena vaze vasemuka kuli Isalele vapwa chikupu “vaIsaleleko.”+
7 Mwomwo numba vanapu tuhu vaka-tanga* yaApalahama, keshi nge vosena hivanako,+ nduma, oloze, “Vaze navakavuluka ngwavo ‘vaka-tanga* yove’ navakafuma muli Isaka.”+
8 Echi chili nakulumbununa nge, vana vakumujimba keshi vakiko chikupu vana vaKalungako,+ oloze vana vakulushiko+ vakiko vene vamona kupwa vaka-tanga.*
9 Mwomwo mazu alushiko ambile ngwawo: “Nangukeza cheka halwola vene nge luno, kaha Sala mwakasema mwana walunga.”+
10 Keshi nge aha kahako, oloze naLaveka nawa omu emichile lijimo lyavapasa lyalunga umwe, kakuluka yetu Isaka.+
11 Mwomwo omu vapasa vapwile kanda vachisemuke kaha nawa kanda valinge chuma numba chimwe chamwaza chipwe chachipi, mangana kujina chaKalunga kutalisa kukusakula chipendamine lika hali Ou eji kusanyikanga, oloze keshi nge hamilimoko,
12 Laveka vamulwezele ngwavo: “Mwana wamukulwane mwakapwa ndungo kuli songo yenyi.”+
13 Nge muze vasoneka ngwavo: “Ngwazangile Yakova, oloze Esau ngwamuhungile.”+
14 Jino natwamba ngwetu ika? Uno Kalunga eji kuhengesanga numba? Nduma.+
15 Mwomwo ahanjikile kuli Mose ngwenyi: “Nangukatetela weshowo nangukasaka kutetela, kaha nangukevwila keke weshowo nangukasaka kwivwila keke.”+
16 Ngocho echi kachapendamina hakusaka chamutu, chipwe hakukilikita chenyiko,* nduma, oloze chapendamina hali Kalunga uze eji kutetelanga.+
17 Mwomwo chisoneka chamba kuli Fwalo ngwacho: “Shikaho ngunakweche mangana ngusolole ngolo jami kuhichila muli ove nakulingisa lijina lyami valivilike hamavu hosena.”+
18 Shikaho jino, Kalunga eji kutetelanga weshowo nasake kutetela, kaha eji kwechelelanga weshowo nanjinjavala anjinjavale.+
19 Shikaho nawamba kuli ami ngwove: “Mwomwo ika eji kuwanyinanga vatu tutenga? Uno iyaze nalikange kuvyuma ajina?”
20 Ove mutu, ove yove iyaze numba ulingulule Kalunga?+ Kutala chuma chakutenga nachamba kuli muka-kuchitenga ngwacho, “Mwomwo ika unangutengela ngana?”+
21 Kutala muka-kutenga vyuma keshi nangolo jakuumba ndambo+ nakuhasa kutenga chuma chimwe chamulimo waulemu, chikwavo chamulimo wakuhona ulemu kumuunga woumweko numba?
22 Nyi ngachilihi nge Kalunga asakile kusolola utenu wenyi nakulingisa ngolo jenyi vajitachikize, oloze ikiye omikile nakutalilila chikoki vyuma vyautenu evi vatela kunongesa?
23 Jino kachi nge alingile ngocho mangana upahu wenyi waunene akausolole havyuma vyakutetela+ vize awahishile chimweza mangana vikapwenga naupahu,
24 vikiko vene yetu, etu asanyikile, keshi muli vaYuleya kahako, oloze namuli vaka-mafuchi eka nawa,+ kaha yikaze?
25 Chili nganomu ahanjika nawa muli Hozeya ngwenyi: “Vaze kavapwile vatu jamiko+ nangukavavuluka ngwami ‘vatu jami,’ kaha pwevo uze vahonene kuzanga nangukamwamba ngwami, ‘ngwakuzanga,’+
26 kaha kuchihela kuze vavambilile ngwavo, ‘Enu kamweshi muvatu jamiko,’ kwakuze vene navakavavulukila ngwavo, ‘vana vaKalunga ou ayoya.’”+
27 Isaya ahanjikile hali vaIsalele ngwenyi: “Numba tuhu kuvula chavana vaIsalele nachikapwa nge usekeseke wakukalungalwiji, oloze vaze vasalaho vakiko kaha navakalwila.+
28 Mwomwo Yehova* mwakahituluka mumilonga hamavu, mwakayikukulula nakuyivatula washiwashi.”+
29 Kaha nganomu nawa ahanjikile chimweza Isaya ngwenyi: “Kachi nge Yehova* wamayongomena katusezelele vaka-tangako,* kachi tunapu nge Sotome, kachi tunafwane nge Ngomola.”+
30 Jino natwamba ngwetu ika? Natwamba ngwetu vatu vakumafuchi eka, numba tuhu vazenekele kukava kwoloka,+ vawanyine kwoloka chize chafuma halufwelelo,+
31 oloze numba tuhu vaIsalele vakavangijile lushimbi lwakwoloka, kavateselemo lushimbi kaneluko.
32 Mwomwo ika? Mwomwo kwoloka kavachiwanyine nalufweleloko, oloze vachiwanyine navilinga. Ngocho vahukanyine “kulilolwa lyakuhukanyisa,”+
33 nge muze vasoneka ngwavo: “Talenu! MuZeyone nguli nakwalamo lilolwa+ lyakuhukanyisa, lilolwa lyakulimbwisa, oloze ou mwafwelela lilolwa kana keshi kukapayako.”*+
Kwinyikila Chamwishi
^ Hela., “mbuto.”
^ Hela., “mbuto.”
^ Hela., “mbuto.”
^ Hela., “hali ou ali nakuchisaka chipwe hali ou mwachilahilako.”
^ Tala Chihande A5.
^ Tala Chihande A5.
^ Hela., “mbutoko.”
^ Chipwe “keshi kukevwa sonyiko.”
