Wavaka-Ngalesha 1:1-24
1 Ami Paulu, ngukaposetolo, keshi wakufuma kuli vatuko, chipwe kuhichila muli mutuko, oloze kuhichila muli Yesu Kulishitu+ namuli Kalunga, Setu,+ ou amusangwile kuvafu.
2 Kaha ami navandumbwetu vosena ava vali nayami, tuli nakusonekela vikungulwilo vyakuNgalesha:
3 Likoji lyalinene nakuunda vyakuli Kalunga Setu naMwata Yesu Kulishitu vipwenga nayenu.
4 Ikiye alyechele ivene hajishili jetu+ mangana atupululule mukatwamino kamyaka yino*+ kakapi kweseka nomu mwaya muchima waKalunga ketu, Setu.+
5 Kuli ikiye kupwenga upahu haya myaka namyaka. Amene.
6 Ngunalikomokela mwomwo muli nakuseza washi Uze amisanyikile nalikoji lyalinene lyaKulishitu nakukavangiza mujimbu wamwaza weka.+
7 Kaha kakweshi mujimbu wamwaza wekako, oloze kuli vamwe vaze vali nakumiyanjisa+ nakusaka kutangisa mujimbu wamwaza wakuvuluka Kulishitu.
8 Oloze kachi nge umwe hali etu, chipwe kangelo wakufuma mwilu, mwamyambulila mujimbu wamwaza weka, wakulihandununa namujimbu wamwaza uze twamyambulilile etu, kaha apwenga wakwangula.
9 Nge omu tunambe lyehi, nangwambamo cheka nawa ngwami, Weshowo mwamyambulila mujimbu wamwaza weka, wakulihandununa nou mwetavilile, apwenga wakwangula.
10 Uno nguli nakusaka ngwami ngukunyule vatu tahi, nyi Kalunga? Kutala nguli nakusaka ngwami ngwivwise vatu kuwaha tahi? Nge ngwapwanga nakwivwisa vatu kuwaha, kachi kangwapwile ngundungo yaKulishituko.
11 Mwomwo enu vandumbwami, ngunakusaka mutachikize ngwenu, mujimbu wamwaza ou ngwamyambulilile, kaweshi wakuvatuko,+
12 mwomwo ami kangwautambwile kuli mutuko, chipwe kungunangulawoko, oloze kuhichila muvyuma vangusolwelele kuli Yesu Kulishitu.
13 Chikupu vene enu mwevwile twamiso yami yakunyima muKwitava chavaYuleya,+ omu ngwapwilenga nakuyanjisa chikuma chikungulwilo chaKalunga nakuchenyeka,+
14 kaha ngwapwile nakuzovoloka chikuma muKwitava chavaYuleya kuhambakana vahilanyo jami vavavulu vakumuyachi wami, mwomwo ngwapwile natwima yakulinga mwaya visemwa vyavakakuluka jami.+
15 Oloze Kalunga, uze anguhandwile mujimo lyamama, nakungusanyika kuhichila mulikoji lyenyi lyalinene,+ omu amwene kuwaha
16 kusolola Mwanenyi kuhichila muli ami mangana ngwenyi nguvilike mujimbu wamwaza wakuvuluka ikiye kuli vaka-mafuchi,+ ami kangwahulishile mutu* numba umwe angulweze manganako.
17 Kaha nawa kangwayile kuYelusalema kuli vaze vapwilenga vaposetolo shimbu kanda amiko, oloze ngwayile kuAlavya, kufumaho ngwakindulukile kuNdamashiku.+
18 Jino omu mwahichile myaka yitatu, ngwayile kuYelusalema+ nakumona Kefwase,*+ kaha ngwatwamine nenyi makumbi 15.
19 Oloze kangwamwene kaposetolo wekako, shina Yakova+ kaha, uze ndumbu yaMwata.
20 Jino kutalisa kuvyumevi nguli nakusoneka kuli enu, nguli nakumifwelelesa kumeso aKalunga ngwami, kangweshi nakulyongako.
21 Kaha kufumaho ngwayile mujingalila jaSulya naShilisha.+
22 Oloze kavangutachikijile kuvikungulwilo vyakuYuleya vize vyalikachile naKulishituko.
23 Vakiko vapwilenga kaha nakwivwa ngwavo: “Lunga uze atuyanjishilenga+ kunyima ali nakwambulula jino mujimbu wamwaza walufwelelo luze enyekele kunyima.”+
24 Ngocho vaputukile kumutohwesa Kalunga mwomwo yayami.
Kwinyikila Chamwishi
^ Tala Mukana waMazu.
^ Hela., “kangwahulishile mutu wanyama namanyinga.”
^ Vamuvuluka nawa ngwavo Petulu.
