Wavaka-Ngalesha 3:1-29
-
Milimo yamujishimbi hakuyesekesa nalufwelelo (1-14)
-
Muka-kwoloka mwayoyanga hakupwa nalufwelelo (11)
-
-
Lushiko vashikile Apalahama kalwapendaminyine haJishimbiko (15-18)
-
Kulishitu, muka-tanga yaApalahama (16)
-
-
Okwo kwafumine Jishimbi novyo vajihakilileko (19-25)
-
Kupwa vana vaKalunga mwomwo yalufwelelo (26-29)
-
Vaze vakuli Kulishitu vapwa vaka-tanga yaApalahama (29)
-
3 Enu vaka-Ngalesha vakuhona mangana, iyaze namihungumwisa+ ngana okunyi Yesu Kulishitu vamusolwele hatoma kumeso enu wakupapalila hachitondo?+
2 Ngunasake ngumihulise chumechi ngwami:* Uno shipilitu mwayitambwile kuhichila mumilimo yamujishimbi tahi, nyi mwomwo yakufwelela vyuma mwevwile?+
3 Uno munahono ngachilihi mangana? Enu hakuputuka mwaputukile nge omu mwaya shipilitu, uno muli nakusaka mukumise nge omu mwaya mujimba tahi?+
4 Kutala evi vihuli vyavivulu, munavimono chakulishina tuhu nyi? Kuvanganyi nge mwavimwene chakulishina tuhu.
5 Kutala ou eji kumihananga shipilitu nakuzata milimo yangolo+ muli enu, eji kulinganga ngocho mwomwo yamilimo yamujishimbi tahi, nyi mwomwo yakufwelela vyuma mwevwile?
6 Chili nge muze Apalahama “afwelelele Yehova,* kaha vamuvulukile kupwa wakwoloka.”+
7 Pundu vene munatachikiza ngwenu vaze vakakachila kulufwelelo vakiko vene vanapu vana vaApalahama.+
8 Jino chisoneka hakumona chimweza ngwacho Kalunga mwakavulukila kwoloka vatu vakumafuchi eka kuhichila mulufwelelo, chalivangile kwambulila Apalahama mujimbu wamwaza wakuvuluka ngwavo: “Vaka-mafuchi osena navakavakisula kuhichila muli ove.”+
9 Ngocho vaze veji kukakachilanga kulufwelelo vali nakuvakiswila hamwe naApalahama uze apwile nalufwelelo.+
10 Vosena vaze vapendamina hamilimo yamujishimbi vavangula lyehi, mwomwo vasoneka ngwavo: “Weshowo mwakana kukavangiza nakulinga vyuma vyosena vize vasoneka mumukanda wakuvunga waJishimbi, apwenga wakwangula.”+
11 Kaha nawa, chinasoloka hatoma nge kakweshi mutu navavulukila kwoloka hajishimbi kuli Kalungako,+ mwomwo “muka-kwoloka mwayoyanga hakupwa nalufwelelo.”+
12 Kaha Jishimbi kajapendamina halufweleloko. Oloze jamba ngwajo: “Weshowo mwalinga vyumevi mwayoyanga.”+
13 Kulishitu atulanjile+ nakutusokola+ kukwangula chaJishimbi hakupwa wakwangula mukutela kutwangula etu, mwomwo vasoneka ngwavo: “Weshowo vanasukika hachitondo napu wakwangula.”+
14 Chapwile ngocho mangana kisu yaApalahama yikahase kwiza hali vaka-mafuchi eka kuhichila muli Kulishitu Yesu,+ mangana etu tukahase kutambula shipilitu+ yize vatushika hakupwa chetu nalufwelelo.
15 Enu vandumbwami, nanguhanjika nachifwanyisa chavyuma vyeji kusolokanga mukuyoya chavatu ngwami: Lushiko nge vanalushiki lyehi, numba lupwa lwakushika kumutu umwe, kakweshi mutu mwalukasununa chipwe kuhakilako vyekako.
16 Jino jishiko vajishikile Apalahama nakuli muka-tanga*+ yenyi. Chisoneka kachamba ngwacho: “nakuli vaka-tanga* yove” kwijiva nge vavavuluko. Oloze chamba ngwacho: “nakuli muka-tanga* yove,” kulumbununa umwe kaha, ikiye Kulishitu.+
17 Kaha nawa, nangwamba ngwami: Jishimbi jize jejile nakupwako omu mwahichile myaka 430,+ kajahashile kufumisako lushiko luze vashikile kunyima kuli Kalunga, nakulingisa lushiko lujimbanganeko.
18 Mwomwo kachi nge uswana wapendaminyine hajishimbi, kahanyi kawapendaminyine halushikoko, oloze Kalunga namuhanewo Apalahama mujila yalikoji kuhichila mulushiko.+
19 Nyi Jishimbi jaka? Vajihakileko mangana kuzombwojoka jishimbi chisoloke hatoma+ palanga nomu mwakeza+ muka-tanga* ukwechi lushiko vashikile. Kaha jejile kuhichila muli vangelo+ nakujihana kulivoko lyamuka-kuwanyisa.+
20 Jino muka-kuwanyisa keshi kuhasa kupwakoko kachi nge kuli mutu umwe kaha, oloze Kalunga apwa uka wenyi kaha.
21 Uno Jishimbi jalimbalaka najishiko jaKalunga tahi? Nduma. Mwomwo kachi nge vahanyine lushimbi luze lunahase kuhana kuyoya, chikupu vene kwoloka kachi cheza kuhichila mujishimbi.
22 Oloze Visoneka vyatwalile vyuma vyosena hamwe muufunge washili, mangana lushiko luze lwapendamina hakupwa nalufwelelo muli Yesu Kulishitu vakaluhane vaze vali nalufwelelo.
23 Olozenyi omu lwapwile lufwelelo kana kanda luchize, vatulaminenga tuvakukasa mujishimbi, vatutwalile tuvosena hamwe muufunge nakuvandamina lufwelelo luze lwapwile kwakamwihi nakusoloka.+
24 Ngocho Jishimbi japwile muka-kutulama* wakututwala kuli Kulishitu,+ mangana vahase kutuvulukila kwoloka kuhichila mulufwelelo.+
25 Oloze jino omu luneza lyehi lufwelelo,+ katweshi cheka mumavoko amuka-kutulamako.*+
26 Enu muvosena, chikupu vene munapu muvana vaKalunga+ hakupwa chenu nalufwelelo muli Kulishitu Yesu.+
27 Mwomwo enu muvosena vambapachishile muli Kulishitu, munamuvwale lyehi Kulishitu.+
28 Kakweshi cheka kaYuleya chipwe kaHelaseko,+ kakweshi cheka ndungo chipwe muka-kulihehwako,+ kakweshi cheka lunga chipwe pwevoko,+ mwomwo muvosena munapu umwe kaha hakulikata naKulishitu Yesu.+
29 Kaha nawa, kachi nge munapu vakuli Kulishitu, kaha munapu chikupu vaka-tanga* yaApalahama,+ muvaswana+ nganomu lwaya lushiko.+
Kwinyikila Chamwishi
^ Hela., “Ngunasake ngulinangule kuli enu.”
^ Tala Chihande A5.
^ Hela., “mbuto.”
^ Hela., “nakujimbuto.”
^ Hela., “nakumbuto.”
^ Hela., “mbuto.”
^ Chipwe “muka-kutunangula.”
^ Chipwe “amuka-kutunangulako.”
^ Hela., “mbuto.”
