Wavaka-Ngalesha 4:1-31
4 Jino nangwamba ngwami shimbu swana achili mwana wamundende, kalihandunwine nandungoko, numba tuhu napu mwata wavyuma vyosena,
2 oloze mwapwa mumavoko avaka-kumulama namumavoko atuselwa palanga nakulikumbi kana lize vatongola lyehi kuli ise.
3 Ngocho nayetu nawa, omu twapwilenga tuvana vavandende, twapwilenga muundungo muvyuma vyamaputukilo vyakukaye.+
4 Oloze omu lwalingile lwola lunatemo lyehi, Kalunga atumine Mwanenyi uze asemukile kuli pwevo+ uze apwile mujishimbi,+
5 mangana alande vaze vali mujishimbi+ nakuvasokolamo, mangana nayetu vahase kutwitavila kupwa tuvana.+
6 Jino hakuwana nge munapu muvana, Kalunga natumu lyehi shipilitu+ yaMwanenyi mumichima yetu,+ kaha yili nakusanyika ngwayo: “Apa,* Ove Tata!”+
7 Shikaho kamweshi cheka muvandungoko, oloze muvana. Jino kachi nge muvana, kaha munapu muvaswana nawa kuhichila muli Kalunga.+
8 Omu mwazenekele kutachikiza Kalunga, mwapwile muundungo wakuzachila vaze kavapwa chikupu tulungako.
9 Oloze jino hakuwana nge munamutachikiza lyehi Kalunga, mokomoko ngwetu vanamitachikiza lyehi kuli Kalunga, nyi ngachilihize muli nakukindulukila cheka kuvyuma vyamaputukilo+ vyaufwefwelekete, vyamokomoko, nakusaka kwingila muundungo wakuvizachila cheka?+
10 Enu muli nakulamanga chikuma makumbi, natukweji,+ najingonde, namyaka.
11 Kaha ngunalizakamina hali enu ngwami, pamo ngunamyenyekela kaha ngolo jami.
12 Enu vandumbwami, ngunamilembelela ngwami, pwenunga nganomu ngwapwa ami, mwomwo nayami nawa ngwapwilenga nganomu munapu enu.+ Enu kamwangulingile chuma chachipi numba chimweko.
13 Oloze munatachikiza ngwenu kuviza chami chikiko changulingishile ngumyambulile mujimbu wamwaza halwola lwatete.
14 Numba tuhu kuviza chami chapwile cheseko kuli enu, oloze kamwangulumbilishileko,* chipwe kungwivwila unyengweko. Mwangutambwile kwijiva nge ngukangelo kaKalunga, kwijiva nge nguKulishitu Yesu.
15 Uno kuwahilila chize mwapwile nacho chili kulihi? Mwomwo nangumilweza muchano ngwami, kachi nge chapwile chachashi, kachi mwatombongonyele meso enu nakunguhanawo.+
16 Kutala ngunapu jino ngumuka-kole wenu mwomwo ngweji kumilwezanga muchano tahi?
17 Vakiko vali nakufwila kuminganyala, keshi nge hachuma chamwazako, oloze vali nakusaka kumifumisa kuli ami, mangana muvakavangizenga vakiko.
18 Chapwa chamwaza shimbu yosena mutu kufwila kuminganyala hachuma chamwaza, oloze keshi nge kuvanga nguli nayenu hamwe kahako,
19 enu vana vami vavandende,+ enu nguli nakwivwila cheka misongo yakusema palanga nomu Kulishitu mwalumbunuka* muli enu.
20 Oloze ngunasake kachi kupwa nayenu hamwe oholili, mangana nguhanjike mujila yeka, mwomwo ngunalikomokela hali enu.
21 Ngulwezenu, enu munakusaka ngwenu mupwenga mujishimbi. Uno Jishimbi kamweshi kujivwako tahi?
22 Chakutalilaho, vasoneka ngwavo Apalahama apwile navana vamalunga vavali, umwe wakuli ngamba wapwevo,+ kaha mukwavo wakuli pwevo wakulihehwa.+
23 Ou wakuli ngamba wapwevo asemukile nge mwavatu vosena,*+ kaha ou wakuli pwevo wakulihehwa asemukile kuhichila mulushiko.+
24 Vyumevi vinapu chimweso chavyuma vimwe, mwomwo ava mapwevo vemanyinako jishiko jivali, lumwe lwakuPili Shinai,+ lwakusema vana nakuvengisa muundungo, lukiko vene Hangale.
25 Jino Hangale emanyinako Shinai,+ pili yamuAlavya, kaha emanyinako Yelusalema makumbi ano, mwomwo ali muundungo navana venyi hamwe.
26 Oloze Yelusalema yamwilu yapwa yakulihehwa, kaha yikiko vene netu.
27 Mwomwo vasoneka ngwavo: “Ove mumba, ove wazeneka kusema, wahilila. Ove pwevo uze kanda achivwengaho lyehi misongo yakusema, wahilila nakutwa jingunda. Mwomwo vana vapwevo uze vanaseze kuli lunga lyenyi vanavulu kuhambakana vana vayauze ali nalunga lyenyi.”+
28 Jino enu vandumbwami, etu tunapu tuvana valushiko, nganomu apwile Isaka.+
29 Oloze nge muze chapwile halwola luze, uze asemukile nge mwavatu vosena* aputukile kuyanjisa uze asemukile mwaya shipilitu,+ kahomu mukiko chili noholili nawa.+
30 Chipwe ngocho, chisoneka chahanjika ngachilihi? Ngwacho, “Muhange ou ngamba wapwevo namwanenyi hamwe, mwomwo mwana wayou ngamba keshi kukapwa swana namwana wayou pwevo wakulihehwako.”+
31 Ngocho enu vandumbwami, etu katweshi tuvana vayou ngamba wapwevoko, oloze tuvana vayou pwevo wakulihehwa.
Kwinyikila Chamwishi
^ Lizu lyachiHepeleu chipwe chiAlamayiki lize lyalumbununa, “Ove Tata.”
^ Chipwe “oloze kamwangufwijilile malejiko.”
^ Chipwe “mwakola.”
^ Hela., “asemukile kweseka namujimba.”
^ Hela., “asemukile kweseka namujimba.”
