Wavaka-Tesolonyika 1 1:1-10
1 Ami Paulu nguli hamwe naShilivanu*+ naChimoteu,+ kaha nguli nakusonekela chikungulwilo chavaka-Tesolonyika vaze valikata naKalunga Setu naMwata Yesu Kulishitu:
Likoji lyalinene nakuunda vipwenga nayenu.
2 Tweji kumusakwililanga Kalunga shimbu yosena omu tweji kumivulukanga enu muvosena mukulomba chetu,+
3 mwomwo tweji kwanukanga milimo mweji kuzatanga nakashishi, nakukilikita mweji kukilikitanga muzangi, nalukakachila lwenu mwomwo yalutalililo lwenu lwakutalilila+ Mwata wetu Yesu Kulishitu kumeso aKalunga ketu, Setu.
4 Mwomwo enu vandumbwetu vazanga kuli Kalunga, etu tunatachikiza kusakula chenyi amisakula,
5 mwomwo mujimbu wamwaza uze tweji kwambululanga kawejile kuli enu namazu amukanwa kahako, oloze wejile nangolo nawa, nashipilitu yajila, nakukunyuka chosena, nge omu mwatachikiza vyuma twalingile kuli enu mwomwo yayenu.
6 Kaha enu mwatulondezezele etu+ naMwata,+ hakuwana nge mwetavilile mazu nakuwahilila chashipilitu yajila numba tuhu mwapwile muluyando,+
7 kaha mwapwile muvakutalilaho kuli vaka-kwitava vosena kuMasetonya nakuAkaya.
8 Mwomwo keshi nge kuMasetonya nakuAkaya kaha kukiko munevwakanyisa mazu aYehovako,* oloze lufwelelo lwenu muli Kalunga lunevwakana kuvihela vyeka vyosena,+ ngocho katweshi kuhanjikaho chuma numba chimweko.
9 Mwomwo veji kwambululanga omu twamiwanyine hakavanga, nomu mwasele makombelo enu+ nakwalumukila kuli Kalunga mangana muzachilenga Kalunga ou ayoya kaha nawa wamuchano,
10 nakuvandamina Mwanenyi kufuma mwilu,+ uze asangwile kuvafu, ikiye vene Yesu uze mwatupululula kuutenu ou uli nakwiza.+
