Wavaka-Tesolonyika 1 3:1-13
3 Ngocho omu twahonene kuunda muchima, twamwene ngwetu nachiwaha tuchitwame vene kuno kuAtene+ uka wetu.
2 kaha twatumine ndumbwetu Chimoteu,+ muka-kuzachila Kalunga* mumujimbu wamwaza wakuvuluka Kulishitu, mangana amijikijise,* nakumivendejeka halufwelelo lwenu,
3 mangana kuzeneke kupwa mutu mwevwa woma luyando kanelu. Mwomwo enu munatachikiza ngwenu, etu katweshi kuhasa kuhonesa luyando kaneluko.*+
4 Mwomwo numba vene omu twapwilenga nayenu, twamilwezelenga chimweza ngwetu etu natukamona luyando, kaha omu mukiko vene muchinasoloka nganomu munatachikiza nayenu.+
5 Shikaho, omu ngwahonene kuunda muchima, ngwatumine mutu mangana ngwami ngutachikize kushishika chenu,+ ngwami pamo Muka-kweseka+ namyeseka lyehi, kaha kukilikita chetu pamo chinayi mwamokomoko.
6 Oloze Chimoteu hakiko nahete kuli etu kufuma okwo kuli enu,+ kaha natwambulila mujimbu wamwaza wakushishika chenu nazangi yenu, kaha ngwenyi mweji kutwanukanga chikuma shimbu yosena, kaha muli nakufwila kutumona nganomu tuli nakufwila nayetu kumimona.
7 Shikaho enu vandumbwetu, numba tuhu tuli nakumona vihuli naluyando, oloze tunapu vakuvendejeka mwomwo yayenu nakushishika chenu.+
8 Etu tunakwate ngolo* mwomwo munazame mbe muli Mwata.
9 Uno natusakwilila ngachilihi Kalunga hali enu hakuwahilila chosena echi tuli nakwivwa hali enu kumeso aKalunga ketu?
10 Ufuku namusana tuli nakulembelela, omu tuli nakufwila chikuma ngwetu tumimone,* nakutesamo vyuma vize vinalihono kulufwelelo lwenu?+
11 Jino Kalunga ketu, ivene Setu, naMwata wetu Yesu, vatuwahishile jila yetu yakwiza kuli enu.
12 Kaha nawa, Mwata amilingise mumbwambumuke muzangi yenu yakulizanga navakwenu+ navatu vosena, nganomu twamizanga nayetu nawa,
13 mangana azamisenga michima yenu mbe, muzeneke chuma chakumihanyina mulonga, muvajila kumeso aKalunga ketu,+ Setu, halwola lwakupwako chaMwata wetu Yesu+ navatu jenyi vajila vosena hamwe.
Kwinyikila Chamwishi
^ Chipwe pamo, “uze azachila naKalunga hamwe.”
^ Chipwe “mangana amikolezeze.”
^ Chipwe “etu vatutongwela luyando kanelu.”
^ Hela., “Etu tweji kuyoyanga.”
^ Hela., “ngwetu tumone vihanga vyenu.”