Wavaka-Tesolonyika 1 4:1-18
4 Kukuminyinako enu vandumbwetu, nge muze mwatambwile jindongi kuli etu jamwakutambukila mangana mwivwise Kalunga kuwaha,+ nganomu vene muli nakutambuka, tunamilombo nakumilembelela muli Mwata Yesu ngwetu mutwaleho lika kulingangamo chikuma.
2 Mwomwo enu munatachikiza jindongi jize twamihanyine jakuli Mwata Yesu.
3 Mwomwo omu mukiko mwaya muchima waKalunga ngwenyi mupwenga muvajila,+ nakulihenda kuujila.*+
4 Mutu himutu atachikize mwakulamina mujimba wenyi ivene+ mukujila+ namukavumbi,
5 keshi nachipululu napeha yayipi yakusaka kulisavalako,+ ngana mwavaka-mafuchi vaze vahona kutachikiza Kalunga.+
6 Kanda nakupwa mutu atela kuhambakana haseteko yatelako chipwe kulinga ndumbwenyi mwamupi havyuma kaneviko, mwomwo Yehova* eji kuzangamishilanga havyuma vyosenevi, nge muze twamilwezele chimweza nakumihuhumuna.
7 Mwomwo Kalunga natusanyikila kukujila keshi kumajiloko.+
8 Ngocho jino, ou mwaleununa vyumevi keshi nakuleununa mutuko, oloze ali nakuleununa Kalunga+ uze eji kumihananga shipilitu yenyi yajila.+
9 Kaha hakuvuluka zangi yakuzanga vandumbwetu,+ kamweshi nakusakiwa kumisonekela chekako, mwomwo enu vaminangula lyehi kuli Kalunga mangana mulizangenga navakwenu.+
10 Kaha muli nakulingangamo kuli vandumbwenu vosena vaze vali kuMasetonya kwosena. Oloze enu vandumbwetu, tunamilembelela ngwetu mutwaleho lika kulingangamo chikuma.
11 Fwilenunga kutwama nakuliunjika,+ nakuhaka mangana kuvyuma vyenu,+ nakuzata namavoko enu+ ngana muze twamilwezele,
12 mangana mutambukenga mwamwenemwene kumeso avatu vaze vali kuweluka,+ nakuzeneka kukalikiza chuma numba chimwe.
13 Kaha nawa enu vandumbwetu, etu katwasakile ngwetu muhone kutachikiza* vyavaze vali nakusavala tulo twakufwako,+ mangana muzeneke kulishona nge omu valinga vatu veka vaze vahona lutalililo.+
14 Mwomwo kachi nge tunafwelela ngwetu Yesu afwile kaha nawa asangukile,+ ngocho navaze nawa vanasavala tulo twakufwa muli Yesu,+ Kalunga mwakavaneha cheka naikiye hamwe.
15 Mwomwo echi chikiko natumilweza kweseka namazu aYehova* ngwetu, etu vavatonyi natuyoyanga palanga nakukupwako chaMwata, katweshi kukalivanga kulutwe lwavaze vanasavala lyehi tulo twakufwako,
16 mwomwo ivene Mwata mwakafuma mwilu namutambi wangolo, nalizu lyakangelo wakulitulaho+ naluneta lwaKalunga, kaha vaze vanafwila muli Kulishitu navakalivanga kusanguka.+
17 Kufumaho, etu vavatonyi tuchili nakuyoya, navakatuhukula mumavwi+ navakiko hamwe nakuliwana naMwata+ mupeho, kaha natukapwanga naMwata+ shimbu yosena.
18 Ngocho livendejekenunga navakwenu namazu awa.
Kwinyikila Chamwishi
^ MuchiHelase, por·neiʹa. Tala Mukana waMazu.
^ Tala Chihande A5.
^ Chipwe “muhone kupwa nge vaze kavalwezele.”
^ Tala Chihande A5.
