Wavaka-Tesolonyika 2 2:1-17
2 Oloze enu vandumbwetu, hakuvuluka kupwako chaMwata wetu Yesu Kulishitu+ nakutukungulwila hamwe kuli ikiye,+ tunamilombo
2 ngwetu kanda namuluwangana washiwashi muvishinganyeka vyenuko chipwe kulizakamina namazu vahwima,*+ chipwe namazu ahakanwa, chipwe namukanda uze nausoloka nge wakufuma kuli etu, ngwavo likumbi lyaYehova*+ lineza lyehi.
3 Kanda vamihungumwisa* numba hahandendeko, mwomwo likumbi kana kalyeshi kwiza kuvanga chatete kulikanga kuli Kalunga+ chineza, namutu waupapwoki+ nawa vanamusolola, uze apwa mwanakunonga.+
4 Ikiye emanyina nakole nakulizezula helu lyavosena vaze vavuluka ngwavo kalunga, chipwe chuma chize valemesa, mangana atwame mutembele yaKalunga nakulisolola hatoma ngwenyi apwa kalunga.
5 Uno kamweshi nakwanuka ngwenu ngwamilwezelenga vyumevi omu ngwapwilenga nayenuko nyi?
6 Ngocho munatachikiza jino chize cheji kutangikanga mutu waupapwoki, mangana vakamusolole halwola lwenyi lwatela.
7 Chamuchano vene, mangana akusweka awou upapwoki anaputuka lyehi kuzata,+ oloze nawapwanga lika akusweka palanga nomu navakamufumisako ou napu muka-kutangika oholili.
8 Kaha numba jino uze mutu waupapwoki vakamusolole, uze navakanongesa kuli Mwata Yesu nashipilitu yamukanwa kenyi+ nakumwenyeka hakusoloka+ chakupwako chenyi.
9 Oloze kupwako chayou mutu waupapwoki chapwa milimo yaSatana+ namilimo yangolo yosena navinjikizo vyamakuli navyuma vyakukomwesa+
10 nakuzachisa nawa jijila jakuhenga jakutangisa+ vaze vali nakuya nakunonga kupwa hifweto yakuvashishishilamo, mwomwo kavazangile muchano mangana vavalwileko.
11 Shikaho Kalunga etavishila vyuma vyakutangisa vivahungumwise, mangana vetavilenga makuli,+
12 mangana vosena vavasopese mwomwo kavetavilile muchanoko, oloze vawahilililenga navilinga vyakuhenga.
13 Oloze enu vandumbwetu vazanga kuli Yehova,* etu tuli nakumusakwililanga Kalunga shimbu yosena hali enu, mwomwo kufuma kukuputuka Kalunga amisakwilile+ kuulwilo hakumijilika+ nashipilitu yenyi, nahakufwelela chenu mumuchano.
14 Ikiye amisanyikilile kuchumechi kuhichila mumujimbu wamwaza tweji kuvilikanga, mangana mutambule upahu waMwata wetu Yesu Kulishitu.+
15 Ngocho jino, enu vandumbwetu, zamenunga mbe,+ lamenunga lika jindongi jize twaminangwile,+ numba twaminangwilejo namazu ahakanwa, chipwe namukanda wetu.
16 Kaha nawa Mwata wetu Yesu Kulishitu naKalunga Setu ou atuzangile+ nakutuhana kuvendejeka chahaya myaka yosena nalutalililo lwamwaza+ kuhichila mulikoji lyalinene,
17 vavendejeke michima yenu nakumijikijisa* muvilinga vyamwaza vyosena namumazu osena.
Kwinyikila Chamwishi
^ Chipwe “kulizakamina nashipilitu.” Tala Mukana waMazu, “Shipilitu.”
^ Tala Chihande A5.
^ Chipwe “Kanda vamizondola.”
^ Tala Chihande A5.
^ Chipwe “nakumizamikisa.”
