Wavaka-Tesolonyika 2 3:1-18
3 Kukuminyinako, enu vandumbwetu, tulombelenungako lika,+ mangana mazu aYehova* ayenga lika nakutanda washiwashi,+ nakuwalisa nganomu muli nakulinga nayenu nawa,
2 kaha nawa mangana vatupululule kuli vatu vaukenya, vakuhuka,+ mwomwo lufwelelo kalweshi kuli vatu vosenako.+
3 Oloze Mwata apwa wakushishika, kaha mwamijikijisanga nakumikinganga kuli uze wakuhuka.
4 Kaha nawa tunafwelela Mwata kutalisa kuli enu ngwetu, muli nakukavangizanga jindongi jetu, kaha namujikavangizanga lika.
5 Kaha Mwata amikafwenga lika muzangenga Kalunga+ nakupwa nalukakachila+ hali Kulishitu.
6 Jino enu vandumbwetu, tuli nakumihana jindongi mulijina lyaMwata wetu Yesu Kulishitu ngwetu, mulihende kuli ndumbwetu waliwayanga,+ uze keshi nakutambuka mwaya jindongi jize mwatambwile* kuli etuko.+
7 Mwomwo enu munatachikiza omu mwatela kutulondezeza etu,+ mwomwo katwapwilenga valiwayanga omu twatwaminenga nayenu,
8 kaha katwalile vyakulya vyamutu chawanako.*+ Oloze hakukilikita nakufulyangila, twazachilenga ufuku namusana kuchina kulemuwisa mutu umwe hali enu.+
9 Keshi nge katweshi nangoloko,+ oloze twasakile tumihane chakutalilaho mangana mutulondezezenga.+
10 Mwomwo omu twapwilenga nayenu, twapwilenga nakumilweza ngwetu: “Kachi nge mutu kate kuzata milimo, kaha kanda alyako.”+
11 Mwomwo tunevu ngwavo vatu vamwe muli enu vali naliwayanga,+ ngwavo kaveshi nakuzata chipwe chachindendeko, oloze vali nakulingisa muvyuma vize kavyeshi vyavoko.+
12 Vatu vangocho tuli nakuvahana lushimbi elu nakuvalembelela muli Mwata Yesu Kulishitu ngwetu, vatwamenga nakuliunjika nakulya vyakulya vyavo vize veji kulizachilanga vavene.+
13 Mwomwo enu vandumbwetu, enu kanda namuzeya kulinganga mwamwazako.
14 Oloze kachi nge mutu umwe mwakana kwononoka mazu etu ali mumukanda uno, nyingililenu mutu kana nakulitwamina kulikata nenyi+ mangana evwenga sonyi.
15 Chipwe ngocho, kanda kumumona nge muka-koleko, oloze muhuhumunenunga lika+ hakupwa ndumbwenu.
16 Jino ivene Mwata wakuunda amihanenga kuunda lwola lwosena muvyuma vyosena.+ Mwata apwenga nayenu muvosena.
17 Ami Paulu ngunamimeneka namazu awa ngunasoneka nalivoko lyami.+ Echi kusoneka chikiko chinjikizo chamikanda yami yosena. Omu mukiko ngweji kusonekanga.
18 Likoji lyalinene lyaMwata wetu Yesu Kulishitu lipwenga nayenu muvosena.
Kwinyikila Chamwishi
^ Tala Chihande A5.
^ Chipwe pamo, “jize vatambwile.”
^ Chipwe “chakuzeneka kuvifwetelako.”
