WaYakova 1:1-27
1 Ami Yakova,+ ndungo yaKalunga naMwata Yesu Kulishitu, nguli nakumeneka miyachi 12 yize yinalimwangila kwosena.
2 Enu vandumbwami, wahililenu omu namumona vyeseko vyakulisezaseza,+
3 hakutachikiza ngwenu lufwelelo lwenu luze vaneseka lyehi naluneha lukakachila.+
4 Kaha echenu lukakachila lumanyise milimo yalwo, mangana mupwenga muvamuhwila, muvalambwe mwosena, muvakuzeneka katenga numba kamwe.+
5 Ngocho kachi nge mutu umwe hali enu nahono mangana, alombenga lika Kalunga,+ mwomwo eji kuhananga vosena namuchima umwe chakuzeneka kutoleka,*+ kaha mwamuhanawo.+
6 Oloze alombenga lika nalufwelelo,+ keshi nge nakuhuhwasanako,+ mwomwo ou mwahuhwasana nafwane nge likimba lyahakalungalwiji lyakupekwomwoka napeho nakunganjanga.
7 Mutu kana kanda ashinganyeka ngwenyi mwatambula chuma chimwe kuli Yehovako.*
8 Napu muka-michima yivali,+ wakuzeneka kuzama mujijila jenyi josena.
9 Ndumbwetu wakuzeneka ulemu awahilile* hakumuzezula helu,+
10 kaha muka-luheto awahilile hakumwinyisa+ mwomwo mwakanonga nge jitemo jamuchipapa.
11 Mwomwo nge omu likumbi lyeji kututukanga nakuzuma chalyo, nakuzujisa vyuma vyakusoka hamavu, kaha jitemo javyo hinajihuluka, nakuwaha chavyo hinachikuma, mukiko namuka-luheto mwakanongela hakukava vyuma afwila.+
12 Awahilila mutu uze mwakakachila lika hakuhita mucheseko,+ mwomwo omu navamwivwila kuwaha, kaha mwakatambula muchama wakuyoya+ uze ashikile Yehova* kuuhana kuli vaze navamuzanganga lika.+
13 Nge mutu ali mucheseko, kanda amba ngwenyi: “Vali nakungweseka kuli Kalungako.” Mwomwo Kalunga kaveshi kumweseka navyuma vyavipiko, kaha ikiye nawa keshi kweseka mutu naumweko.
14 Oloze mutu himutu eji kupwanga mucheseko omu kufwila chamumuchima wenyi ivene nachimwonga nakumuzondola.*+
15 Jino kufwila kana omu nachimita, cheji kusemanga shili, kaha shili omu navayilinga, yeji kusemanga kufwa.+
16 Enu vandumbwami ngwazanga, kanda navamihungumwisako.
17 Mawana amwaza osena namawana akukupuka osena eji kufumanga mwilu,+ eji kwizanga kufuma kuli Ise yavyuma vyakumunyika+ uze keshi kunungwojoka chipwe kwalumuka nge muvwimbimbi wakunungwojokako.+
18 Ikiye ajinyine kutusema namazu amuchano+ mangana tupwenga tumihako yatete kuvyuma vyenyi atenga.+
19 Enu vandumbwami ngwazanga, tachikizenu chumechi: Mutu himutu anguhwenga kwivwilila, ashipwokelenga kuhanjika,+ ashipwokelenga kukwata utenu,+
20 mwomwo utenu wamutu kaweshi kuneha kwoloka chaKalungako.+
21 Shikaho, sezenu majilo osena, naupi wosena,*+ kaha vwovuwisenu michima yenu nakwitavila mazu awa navatumba muli enu aze anahase kumilwila.*
22 Oloze pwenunga muvaka-kulinga mwaya mazu,+ keshi muvaka-kwivwa kaha, nakulitangisa enu vavene navishinganyeka vyamakuliko.
23 Mwomwo kachi nge mutu napu muka-kwivwa mazu kaha, oloze keshi muka-kulingako,+ ou nafwane nge mutu uze ali nakulitala kumeso enyi muchitalilo.
24 Mwomwo mwalitala ivene, kufumaho himwaya, kaha nakushimbula chiku himwavulyama omu ali nakusoloka.
25 Oloze ou mwashishika mujishimbi eji jakulihehwa jakukupuka mwosena+ nakukakachila kujikiko, mutu kana mwawahililanga navyuma mwalinganga, mwomwo napu muka-kulinga vyuma keshi muka-kwivwa nakuvulyamako.+
26 Kachi nge mutu nalimono ngwenyi apwa muka-kulemesa Kalunga,* oloze keshi kukasa lilimi+ lyenyiko,* kaha ali nakutangisa muchima wenyi, kaha nawa kulemesa chenyi chinapu chaufwefwelekete.
27 Kulemesa* chitoma chakuhona kujiluluka kumeso aKalunga Setu shina echi: Kulamanga kanawa vanginga+ navatuliwe+ muluyando lwavo,+ nakulilama chakuzeneka lipenga lyakufuma kukaye.+
Kwinyikila Chamwishi
^ Chipwe “chakuzeneka kuwanyina vatu tutenga.”
^ Tala Chihande A5.
^ Hela., “alisase.”
^ Tala Chihande A5.
^ Chipwe “nakumwoza kwijiva nge nandulo.”
^ Chipwe pamo, “nakuvula chaupi chosena.”
^ Chipwe “kulwila myono yenu.”
^ Chipwe “apwa muka-kwitava.”
^ Chipwe “kukasa lilimi lyenyi lumingoko.”
^ Chipwe “Kwitava.”
