WaYakova 2:1-26
2 Enu vandumbwami, kumana muli nakulama lufwelelo lwaMwata wetu waupahu Yesu Kulishitu oku nawa muli nakutala vatu kumeso?+
2 Kachi nge muze munalikungulwila namwingila mutu navwale tuzeya vaulu nauvwalo waluvaji, kaha hinamwingila nawa muka-kuhutwa nauvwalo wamajilo,
3 kutala mweji kwivwilanga uselewa uze navwale uvwalo waluvaji nakumwamba ngwenu, “Ove twama hano hachihela chamwaza,” nakwamba kuli uze muka-kuhutwa ngwenu, “Ove imana kaha,” chipwe ngwenu, “Twama hamavu kuchitwamo chakulyata mahinji ami” tahi?+
4 Kachi nge omu mukiko muli nakulinga, kaha kumana kamweshi nakulitala kumeso+ nakupwa nawa muvaka-kusopesa vaze vali nakuyulanga mwakuhengako nyi?+
5 Ivwililenu enu vandumbwami ngwazanga. Kumana Kalunga kasakwile vaka-kuhutwa mukaye mangana vapwenga valuheto kulufwelelo+ nakupwa nawa vaswana vakuswana Wangana uze ashikile vaze vamuzangako nyi?+
6 Oloze enu munasaula vaka-kuhutwa. Kumana keshi vaka-luheto vakiko veji kumishinyinyikanga+ nakumikokela kujizango jakusopelako nyi?
7 Kutala kaveshi kusaula lijina lyamwenemwene lize vamivulukila enuko nyi?
8 Jino kachi nge namutesamo lushimbi lwawangana kweseka nachisoneka chakwamba ngwavo, “Zangenunga vakwenu nganomu mwalizanga enu vavene,”+ kaha muli nakulinga kanawa.
9 Oloze kachi nge namutalanga lika vatu kumeso,+ kaha muli nakulinga shili, ngocho lushimbi elu lunamisolola hatoma kupwa* muvaka-kuzombwojoka jishimbi.+
10 Mwomwo kachi nge mutu mwalama Jishimbi josena, oloze mwahokolaho lumwe, kaha mutu kana nahokola josena.+
11 Mwomwo uze ambile ngwenyi, “Kanda mukalinga ukojiko,”+ ambile nawa ngwenyi, “Kanda mukajiha mutuko.”+ Jino kachi nge kaweshi kulinga ukojiko, oloze mujiha mutu, kaha unapu umuka-kuzombwojoka jishimbi.
12 Hanjikenunga nakulinganga nge vatu vaze navakasopesa najishimbi javatu vakulihehwa.*+
13 Mwomwo weshowo keshi kutetela vakwavoko, navakamusopesa chakuzeneka kumutetela.+ Kutetela cheji kufungululanga kusopesa.
14 Enu vandumbwami, kuwaha mukaze chiliho kachi nge mutu mwamba ngwenyi ali nalufwelelo, oloze keshi navilingako?+ Kutala lufwelelo kana naluhasa kumulwila numba?+
15 Kachi nge ndumbwove walunga chipwe wapwevo ali nauvu* kaha nawa nahono kulya chakutamo chahalikumbi,
16 oloze mutu umwe hali enu mwamba kuli ikiye ngwenyi, “Yakonga mukuunda, ivwanga yuku, kaha lyakonga nakwikuta,” oloze enu kamweshi kumuhana vyuma mwasaka kumujimba wenyiko, kaha kuwaha mukaze chiliho?+
17 Ngocho nawa, lufwelelo hauka walwo lwakuzeneka vilinga, lunapu lwakufwa.+
18 Oloze mutu umwe mwamba ngwenyi: “Ove uli nalufwelelo, kahami nguli navilinga. Ngulweze lufwelelo lwove lwakuzeneka vilinga, kahami nangukulweza lufwelelo lwami havilinga vyami.”
19 Kutala wetavila ngwove kwatwama Kalunga umwe kaha nyi? Uli nakulinga kanawa. Navandemone nawa vetavila ngocho, kaha veji kulichikiminanga.+
20 Oloze ove mutu wamokomoko, nausaka utachikize ngwove lufwelelo lwakuzeneka vilinga lwapwa lwamokomoko tahi?
21 Kutala kakuluka yetu Apalahama kavamuvulukile kupwa wakwoloka havilinga vyenyi omu alingile hanahane lyehi mwanenyi Isaka halijiko lyakulumbilako nyi?+
22 Unamono jino ngwove lufwelelo lwenyi lwapwile lwalukangule hamwe navilinga vyenyi, kaha lufwelelo lwenyi lwakupukile navilinga vyenyi,+
23 kaha chisoneka chateselemo chakwamba ngwacho: “Apalahama afwelelele Yehova,* kaha vamuvulukile kupwa wakwoloka,”+ ngocho vamuvulukile nawa ngwavo sepa lyaYehova.*+
24 Munamono jino ngwenu mutu navamuvulukila kwoloka mwomwo yavilinga, keshi mwomwo yalufwelelo kahako.
25 Chochimwe naLahave nawa, uze pwevo muka-ujila, kutala kavamuvulukile kupwa wakwoloka havilinga vyenyi omu alingile hanatambula lyehi vaze tunganda nachisambo nakuvalweza vayenga mujila yekako nyi?+
26 Chikupu vene, nganomu mujimba wakuzeneka shipilitu* unapu wakufwa,+ ngocho nalufwelelo lwakuzeneka vilinga nawa lunapu lwakufwa.+
Kwinyikila Chamwishi
^ Chipwe “lunamihanjikila hakupwa.”
^ Hela., “najishimbi jakulihehwa.”
^ Hela., “ali uselesele.”
^ Tala Chihande A5.
^ Tala Chihande A5.
^ Chipwe “wakuzeneka kuhwima.”
