WaYakova 3:1-18
3 Enu vandumbwami, enu vavavulu kamwatela kupwa muvaka-kunangulako hakutachikiza ngwenu navakatusopesa chikuma.+
2 Mwomwo tuvosena tweji kuhukananga* kakavulu.+ Kachi nge mutu keshi kuhengesa hakuhanjikako, kaha napu wakukupuka mwosena, nahase nawa kwononona namujimba wenyi wosena.
3 Kachi nge natukasa jimingo kutunwa twatuvalu mangana vononoke kuli etu, kaha natupingulula nawa namijimba yavo yosena.
4 Achishinganyekenu nawa hamato: Numba tuhu apwa amanene chikuma kaha nawa eji kupekumukanga najipeho jajinene, oloze veji kuwapingululanga nachilapo chachindende chikuma nakuwatalisa kweshokwo najinyi kuya mutu uze nakwate kuchilapo.
5 Ngocho nalilimi nawa linapu kachuma kakandende kamujimba, oloze lyeji kulitukwojolanga chikuma. Achishinganyekenu omu kakahya kakandende kanahase kwepula kakahya nakwocha chipapa chachinene.
6 Lilimi nalikiko linapu kakahya.+ Lilimi lyapwa kaye kakuzala navilinga vyakuhenga havilyo vyamijimba yetu, mwomwo lyeji kupihisanga mujimba+ wosena nakwocha kuyoya chamutu chosena, kaha nalikiko veji kulyochanga kuNgehena.*
7 Mwomwo miyachi yosena yatunyama vamuchipapa, natujila, navyuma vyakuhalala hamavu, navyuma vyamukalungalwiji, veji kuvihombolanga, kaha vavihombolaho lyehi kuli vatu.
8 Oloze kakweshi mutu mwahasa kuhombola lilimiko. Lyapwa lyalikalu kulyolola, lyalipi, lyazala naulembe wakuneha kufwa.+
9 Tweji kumwalisanga nalyo Yehova* Setu, kaha tweji kwangulanga nalyo vatu vaze vatenga “muchifwanyisa chaKalunga.”+
10 Mukanwa kokamwe mweji kulovokanga kukisula nakwangula.
Enu vandumbwami, vyumevi kavyatela kusolokanga ngochoko.+
11 Kutala kaselwoke youmwe nahase kuvweluka meya ayema nameya amasasu numba?
12 Enu vandumbwami, kutala mukuyu nauhasa kwima jilive, chipwe muvinyo kwima jikuyu numba?+ Numba meya amungwa kaweshi kuhasa kulovola meya ayemako.
13 Iyaze napu wamangana wakunangakana muli enu? Kaha mutwamiso yenyi yamwenemwene, asolole vilinga vyenyi vize eji kulinganga namuchima wauvwovu uze wafuma hakupwa namangana.
14 Oloze kachi nge muli nalwiso+ lwalupi nakulikindukila*+ mumichima yenu, kanda namupwanga nakulitukwojola,+ nakuhanjikanga makuli akulimbalaka namuchanoko.
15 Awa mangana keshi akufuma mwiluko, apwa ahamavu,+ aunyama, aundemone.
16 Mwomwo kweshokwo kuli lwiso nakulikindukila,* nakupwa nawa liuya navyuma vyaunyengwe vyosena.+
17 Oloze mangana akufuma mwilu chatete apwa atoma,+ kaha akuunda,+ akwashiwisa muchima,+ akulyononona washi, akuzala nakutetela namihako yamwaza,+ kaweshi kuhandulako,+ kaweshi kulyongako.+
18 Kaha nawa, mihako yakwoloka veji kuyikuvanga mukuunda+ kuli vaze vali nakuneha kuunda.+
Kwinyikila Chamwishi
^ Chipwe “tweji kulimbenjanga.”
^ Tala Mukana waMazu.
^ Tala Chihande A5.
^ Chipwe pamo, “nakufwila vyuma.”
^ Chipwe pamo, “nakufwila vyuma.”
