WaYakova 4:1-17
4 Uno jijita navikokojola evi vili muli enu vili nakufuminyina kulihi? Uno kavyeshi nakufuminyina kukufwila chenu chamujimba chize cheji kulwanga jita muli enuko* nyi?+
2 Enu mweji kufwilanga vyuma, oloze munahono kupwa navyo. Mweji kujihanga vakwenu, nakwivwanga lwiso, oloze kamwahashile kuwanako. Mweji kuzunganga nakulwa jita.+ Munahono kupwa navyo, mwomwo kamweshi kuvilombako.
3 Omu mweji kulombanga, kamweshi kutambulako mwomwo mweji kulombanga muvizachise mujila yakuhenga, mangana muvyenyekele kuvyuma yafwila mijimba yenu.
4 Enu mapwevo vaka-ukoji,* kamwatachikijile ngwenu kulikwata usepa nakaye chinapu kulikokela kole naKalungako nyi? Shikaho weshowo mwasaka ngwenyi apwenga sepa lyakaye, ali nakulilingisa kupwa muka-kole waKalunga.+
5 Uno munashinganyeka ngwenu chisoneka chinayi mwanganavene hakwamba ngwacho: “Shipilitu yalushiushiu yize yatwama muli etu yeji kufwilanga vyuma vyeka navyeka” tahi?+
6 Oloze likoji lyalinene lize eji kuhananga Kalunga lyahambakana kutohwa. Shikaho chisoneka chamba ngwacho: “Kalunga eji kwimanyina vaka-kulivwimba nakole,+ oloze eji kuhananga likoji lyalinene kuli vaka-kulinyisa.”+
7 Shikaho liluulenu kuli Kalunga,+ oloze mwimanyinenu Liyavolo+ nakole, kaha mwamichina.+
8 Pandamenu kuli Kalunga, kaha mwapandama kuli enu.+ Enu vaka-shili, tomesenu kumavoko enu,+ kaha enu vaka-michima yivali, tomesenu michima yenu.+
9 Lyonyingenu, lishonenu, lilenu.+ Lishonenu mukutela kuseha, kaha hombenu mukutela kuwahilila.
10 Linyisenu kumeso aYehova,*+ kaha mwamitohwesa.+
11 Enu vandumbwami, litwaminenu kulifulililanga navakwenu.+ Weshowo mwafulilila ndumbwenyi, chipwe kusopesa ndumbwenyi, ali nakufulilila jishimbi nakulumbilisa jishimbi. Jino kachi nge naulumbilisa jishimbi, kaha kaweshi umuka-kulinga mwaya jishimbiko, oloze umuka-kusopesa.
12 Kwatwama umwe kaha uze apwa Muka-kuhana Jishimbi kaha nawa Muka-kusopesa,+ ikiye vene ou nahase kulwila nakunongesa.+ Oloze ove yove iyaze numba usopese mukwenu?+
13 Jino ivwenu, enu mweji kwambanga ngwenu: “Lelo, chipwe hamene, natuya kunganda yanganji, natukatwamako mwaka umwe, kaha natukasekasana nakuwana nganyo,”+
14 okunyi kamwatachikijile munachipwa kuyoya chenu hameneko.+ Mwomwo enu munapu nge mbundu yize yeji kusolokanga hakatando kakandende, kaha nganomu yinalelangana lyehi.+
15 Enu mwatela kwamba ngwenu: “Kachi nge Yehova* netava,+ kaha natuyoya, natulinga nawa mungaji mukananga.”
16 Oloze enu mwasaka kulitukwojola. Kulitukwojola changocho chapwa chachipi.
17 Shikaho, kachi nge mutu natachikiza kulinga mwakwoloka, oloze keshi kulingamoko, nalingi shili.+
Kwinyikila Chamwishi
^ Hela., “kulwanga jita navilyo vyamijimba yenuko.”
^ Chipwe “Enu vatu vakuhona kushishika.”
^ Tala Chihande A5.
^ Tala Chihande A5.
