WaYakova 5:1-20
5 Ivwenu enu vaka-luheto, lilenu, kalwomwokenu havihuli vize vili nakwiza hali enu.+
2 Luheto lwenu lunapolo lyehi, kaha uvwalo wenu unaliwi kutututu.+
3 Ulu wenu napalata yenu vinakwate lyehi shingwe, kaha shingwe yavyo nayikapwa unjiho wakumipayisa enu, kaha nayikalya nyama yenu. Vyuma munalilunjikila navikapwa nge kakahya hamakumbi akukuminyina.+
4 Talenu! Fweto yize mwazenekele kufweta vaka-kuzata vaze vahile jimbuto mumande enu, yili nakuteta, kaha miteto yavaka-kwaha yakusaka kuvakafwa yinahete mumatwitwi aYehova* wamayongomena.+
5 Kuyoya chenu hamavu chinapunga chakufwila kutwama muuhando, nakulisuulwisa enu vavene. Munanunyisa michima yenu halikumbi lyakulalisa.+
6 Enu munapayisa, munajihi muka-kwoloka. Kutala keshi nakumimanyina nakoleko nyi?
7 Shikaho, enu vandumbwami, undenunga michima palanga nakukupwako chaMwata.+ Talenu! Njimi eji kuvandaminanga jimbuto jamwaza chikuma jahamavu, eji kutalililanga jimbuto palanga nomu mwamona vula yakulivanga nayeyi yakukuminyina.+
8 Nayenu nawa undenunga michima,+ zamisenunga michima yenu, mwomwo kupwako chaMwata chinapandama kwakamwihi.+
9 Enu vandumbwami, kanda namuyayavalanga* hali vakwenuko, mangana enu vahone kumisopesa.+ Talenu! Muka-kusopesa nemana kuvikolo.
10 Enu vandumbwami, hakumona lupi+ nahakupwa namuchima wakutalilila,+ kavangizenunga chakutalilaho chavapolofweto vaze vahanjikilenga mulijina lyaYehova.*+
11 Vaze vanakakachila twavamona kupwa vakuwahilila.*+ Enu mwevwa lyehi lukakachila lwaYopa,+ kaha munamono omu Yehova* alingile+ hakukuminyina ngwenu, Yehova* atwama nazangi chikuma, apwa muka-kutetela.*+
12 Chachinenenyi enu vandumbwami, litwaminenu kulishinganga, chipwe kulishinga lilu, chipwe kulishinga mavu, chipwe kulishinga chuma cheka. Oloze lizu lyenu lyakwamba ngwenu “Eyo” lipwenga vene eyo, kaha “Nduma,” nduma,+ mangana vahone kumisopesa.
13 Kutala hali enu hali umwe ali nakumona ukalu tahi? Kaha alombenga lika.+ Kutala kuli umwe nawahilila tahi? Kaha embenga jisamu.+
14 Kutala kuli umwe ali nakuviza hali enu tahi? Kaha asanyike vakulwane+ vachikungulwilo vezenga kuli ikiye, kaha vamulombele nakumukwita maji+ mulijina lyaYehova.*
15 Kulomba chalufwelelo nachiyoyesa uze naviji,* kaha Yehova* mwamuhindula. Kaha nawa nge nalingi jishili navamukonekelajo.
16 Shikaho litavilenunga hatoma jishili+ jenu kuli vakwenu nakulilombelangako navakwenu mangana muhinduke. Kulembelela chamuka-kwoloka chatwama nangolo.*+
17 Elija evwilenga nganomu tweji kwivwanga nayetu, kaha omu alombele ngwenyi kanda nakunoka vulako, vula kayanokeleko hamyaka yitatu natukweji 6.+
18 Kaha alombele cheka, ngocho melu anokesele vula, kaha mavu alowele mihako.+
19 Enu vandumbwami, kachi nge mutu umwe hali enu vanamuhungumwisa nakuseza muchano, kaha nge umwe mwamukindulwisa,
20 kaha tachikizenu ngwenu ou mwakindulwisa muka-shili kufuma mujila yenyi yakuhenga,+ mwalwila mutu* kana kukufwa, kaha mwafwika jishili jajivulu.+
Kwinyikila Chamwishi
^ Tala Chihande A5.
^ Hela., “kanda namulishimwokanga.”
^ Tala Chihande A5.
^ Chipwe “kaha nawa wakeke chikuma.”
^ Tala Chihande A5.
^ Tala Chihande A5.
^ Chipwe “kupwa vakukisula.”
^ Tala Chihande A5.
^ Chipwe pamo, “uze nazeye.”
^ Tala Chihande A5.
^ Hela., “chatwama nangolo jajinene hakuzata.”
^ Chipwe “mwalwila mwono.”
