WaYowano 1 1:1-10
1 Nguli nakusoneka vyauze apwa lizu lyakuyoya, uze apwileko kufuma vene kukuputuka, uze tunevu, uze tunamono nameso etu, uze tunashishika kanawa nakukwata namavoko etu,+
2 (kuyoya chahaya myaka yosena vatusolwelelecho hatoma, kaha tunachimono nakuchambulula+ nakumilwezacho. Echi kuyoya chahaya myaka yosena+ chafuma kuli Setu, kaha vatusolwelelecho),
3 uze tunamono nakwivwa tuli nakumwambulula nawa kuli enu,+ mangana nayenu nawa muhase kulikata* nayetu. Kaha echi kulikata chetu chinapu kulikata naSetu naMwanenyi Yesu Kulishitu.+
4 Ngocho, tuli nakusoneka vyuma kana evi mangana tuwahilile chikuma.
5 Ou ukiko mujimbu twevwile kuli ikiye, uze tuli nakumyambulila ngwetu, Kalunga ikiye musana,+ kaha muli ikiye kamweshi milima chipwe yayindendeko.
6 Kachi nge natwamba ngwetu, “Tuli nakulikata nenyi,” oloze chitutambuka lika mumilima, kaha tuli nakulyonga, katweshi nakukavangiza muchanoko.+
7 Oloze kachi nge tuli nakutambuka mumusana nganomu atwama ikiye mumusana, kaha tunalikate navakwetu, kaha manyinga aMwanenyi Yesu nawatutomesa kushili yosena.+
8 Kachi nge natwamba ngwetu, “Etu katweshi nashiliko,” kaha tuli nakulyonga etu vavene,+ ngocho muli etu kamweshi muchanoko.
9 Kachi nge natwitavila jishili jetu, kaha nahase kutukonekelajo nakututomesa kuvilinga vyakuhenga mwomwo ikiye apwa wakushishika kaha nawa wakwoloka.+
10 Kachi nge natwamba ngwetu, “Katwalingile shiliko,” kaha tuli nakumusolola nge apwa muka-kwonga, kaha mazu enyi kaweshi muli etuko.
Kwinyikila Chamwishi
^ Chipwe “muhase kwazana.”
