WaYowano 1 2:1-29
2 Enu vana vami ngwazanga, nguli nakumisonekela evi vyuma mangana muhone kulinga shili. Oloze nge mutu mwalinga shili, kaha tuli namuka-kutukafwa* wakwoloka+ uze ali naSetu, ikiye Yesu Kulishitu.+
2 Kaha ikiye apwa wana+ wakufwika hajishili jetu,+ keshi jayetu kahako, oloze najeji jakaye kosena nawa.+
3 Kachi nge natulamanga lika jishimbi jenyi, kaha nachisolola nge tunamutachikiza.
4 Ou mwamba ngwenyi, “Ami ngunamutachikiza,” oloze keshi kulama jishimbi jenyiko, napu muka-kwonga, kaha muli ikiye kamweshi muchanoko.
5 Oloze weshowo mwalamanga mazu aKalunga, kaha zangi yenyi yakuzanga Kalunga yinakupuka lyehi+ chikupu muli mutu kanou. Kaha aha hakiko tunatachikijila ngwetu twalikata naikiye.+
6 Ou mwamba ngwenyi alikata naikiye, atela kutambukanga ngana muze atambukilenga ikiye.+
7 Enu ngwazanga, elu lushimbi nguli nakumisonekela kalweshi lwaluhyako, oloze lushimbi lwamwaka elu munapunga nalwo kufuma vene kukuputuka.+ Elu lushimbi lwamwaka lukiko vene mazu aze mwevwile.
8 Kaha nawa nguli nakumisonekela lushimbi lwaluhya, luze akavangijile ikiye, luze muli nakukavangiza nayenu nawa, mwomwo milima yili nakukuma, kaha musana wamwenemwene uli nakutamuka.+
9 Ou mwamba ngwenyi ali mumusana, oloze ahunga+ ndumbwenyi, achili lika mumilima.+
10 Ou azanga ndumbwenyi, ali mumusana,+ kaha kuli ikiye kakweshi chuma chakuhukanyisako.
11 Oloze ou ahunga ndumbwenyi, ali mumilima, kaha ali nakutambuka nawa mumilima,+ kaha katachikijile oku ali nakuyako+ mwomwo milima yinelavisa meso enyi.
12 Enu vana vami ngwazanga, nguli nakumisonekela mwomwo jishili jenu vanamikonekelajo lyehi mwomwo yalijina lyenyi.+
13 Enu vatata, nguli nakumisonekela mwomwo munamutachikiza uze afuma kukuputuka. Enu vakweze, nguli nakumisonekela mwomwo munamufungulula uze wakuhuka.+ Enu vana vavandende, ngunamisonekela mwomwo munamutachikiza Setu.+
14 Enu vatata, ngunamisonekela mwomwo munamutachikiza uze afuma kukuputuka. Enu vakweze, ngunamisonekela mwomwo munapu muvakujikiza,+ kaha mazu aKalunga ali muli enu+ ngocho munafungulula uze wakuhuka.+
15 Kanda namuzanga kaye chipwe vyuma vyamukayeko.+ Kachi nge mutu mwazanga kaye, kaha zangi yakumuzanga Setu kayeshi muli ikiyeko,+
16 mwomwo vyuma vyosena vili mukaye, kufwila chamujimba,+ nakufwila chameso,+ nakutembesa vyuma atwama navyo mutu mukuyoya chenyi,* kavyafuma kuli Setuko, oloze vyapwa vyahano hakaye.
17 Kaha nawa kaye kali nakuhita hamwe nakufwila chako,+ oloze ou eji kulinganga mwaya muchima waKalunga mwatwamanga haya myaka yosena.+
18 Enu vana vavandende, luno hilwola lwakukuminyina, nganomu munevu ngwavo muka-kole waKulishitu ali nakwiza,+ numba oholyapwa vaka-kole jaKulishitu vavavulu vanasoloka lyehi,+ kaha hakiko vene tunatachikijila ngwetu elu hilwola lwakukuminyina.
19 Vafumine muli etu, mwomwo kavapwile vetuko,*+ mwomwo kachi nge vapwile vetu, kachi vatwaminenga lika nayetu. Oloze vayile mangana chisoloke hatoma ngwavo keshi nge vosena vapwa vetuko.+
20 Oloze enu vamiwavisa lyehi kuli ou wajila,+ kaha enu muvosena munatachikiza muchano.
21 Ngunamisonekela, keshi mwomwo ngwami kamwatachikiza muchanoko,+ nduma. Oloze mwomwo mwautachikiza, kaha mwomwo kakweshi makuli afuma kumuchanoko.+
22 Iyaze napu muka-kwonga? Kumana keshi ou mwakana ngwenyi Yesu keshi ikiye Kulishituko nyi?+ Ou mwakana Setu naMwana, ikiye vene muka-kole waKulishitu.+
23 Weshowo mwakana Mwana, kaha naSetu keshi naikiyeko.+ Oloze weshowo mwetavila Mwana,+ kaha naSetu ali naikiye.+
24 Oloze enu kwenu, ocho mwevwa lyehi kufuma kukuputuka chitwamenga muli enu.+ Kachi nge ocho mwevwa lyehi kufuma kukuputuka nachitwamanga muli enu, kaha namulikatanga naMwana nakulikata nawa naSetu.
25 Kaha nawa echi chikiko chuma atushikile ivene, kuyoya chahaya myaka yosena.+
26 Ngunamisonekela vyumevi vyakuvuluka vatu vaze vali nakusaka kumihungumwisa.
27 Oloze enu kwenu, kuwavisa chize amiwavishile+ muchili lika nacho, ngocho kamweshi nakusakiwa mutu wakuminangulako, mwomwo kuwavisa amiwavishile chili nakuminangula vyuma vyosena,+ kaha nawa chapwa chamuchano, kacheshi chamakuliko. Kaha nganomu chinaminangula, likatenunga naikiye.+
28 Shikaho, enu vana vami ngwazanga, likatenunga naikiye mangana omu mwasoloka, etu tuhase kuhanjika nakukasunuka,+ nakuzeneka kusosoloka kuli ikiye nasonyi hakupwako chenyi.
29 Kachi nge mwatachikiza ngwenu ikiye apwa wakwoloka, kaha mwatachikiza nawa ngwenu weshowo eji kulinganga mwakwoloka nasemuka kuli ikiye.+
Kwinyikila Chamwishi
^ Chipwe “namuka-kutwimanyinako.”
^ Chipwe “nakulitukwojola havyuma aheta mutu.”
^ Chipwe “kavapwile vakuli etuko.”
