WaYowano 1 3:1-24
3 Talenu omu yatohwa zangi atusolwela Setu,+ hakutulingisa vatuvuluke ngwavo tuvana vaKalunga.+ Kahomu mukiko vene mutwapwa. Shikaho kaye kahonena kututachikiza,+ mwomwo kaye kakamutachikiza Kalungako.+
2 Enu ngwazanga, tunapu jino tuvana vaKalunga,+ oloze omu natukapwa kanda lyehi muchisoloke.+ Oloze tunatachikiza ngwetu omu mwakasoloka, natukapwa ngana mwaikiye, mwomwo natukamumona omu apwa.
3 Kaha weshowo atwama nalutalililo elu muli ikiye, eji kulitomesanga+ nganomu atoma ikiye.
4 Weshowo eji kulinganga shili, eji kulinganga upapwoki, kaha shili yapwa upapwoki.
5 Munatachikiza nawa ngwenu Yesu vamusolwele mangana afumise jishili jetu,+ kaha muli ikiye kamweshi shiliko.
6 Weshowo alikata naikiye keshi kulinga lika shiliko,+ kaha weshowo eji kulinganga lika shili kamumona chipwe kumutachikizako.
7 Enu vana vami ngwazanga, kanda vamihungumwisa kuli mutu naumweko. Ou eji kulinganga mwakwoloka napu wakwoloka, nganomu apwa ikiye wakwoloka.
8 Ou eji kulinganga lika shili napu wakuli Liyavolo, mwomwo Liyavolo nalinginga lika shili kufuma vene kukuputuka.*+ Shikaho vamusolwele MwanaKalunga mangana enyeke* milimo yaLiyavolo.+
9 Weshowo nasemuka kuli Kalunga, keshi kulinga lika shiliko,+ mwomwo mbuto* yakuli Kalunga nayitwamanga muli mutu kana, kaha keshi kuhasa kulinga lika shiliko, mwomwo nasemuka kuli Kalunga.+
10 Vana vaKalunga navana vaLiyavolo vavamwena aha: Weshowo keshi kulinga mwakwolokako nauze azeneka kuzanga ndumbwenyi kavapwa vakuli Kalungako.+
11 Mwomwo ou ukiko mujimbu mwevwa lyehi kufuma kukuputuka ngwavo, tulizangenga navakwetu,+
12 keshi ngana mwaKenako uze apwile wakuli uze wakuhuka, kaha ajihile ndumbwenyi.+ Uno amujihilile ika? Mwomwo vilinga vyaKena vyapwilenga vyakuhuka,+ oloze vize vyandumbwenyi vyapwilenga vyakwoloka.+
13 Enu vandumbwami, kanda namulikomokelako hakuwana nge kaye kamihunga.+
14 Etu tunatachikiza ngwetu tunafumu lyehi kukufwa, kaha tunayi kukuyoya,+ mwomwo twazanga vandumbwetu.+ Ou azeneka kuzanga vandumbwenyi achili kukufwa.+
15 Weshowo ahunga ndumbwenyi napu muka-kujiha vatu,+ kaha munatachikiza ngwenu muka-kujiha vatu keshi nakuyoya chahaya myaka yosenako.+
16 Tunatachikiza zangi mwomwo ikiye echele mwono wenyi hali etu,+ kaha etu nawa twatela kwecha myono yetu hali vandumbwetu.+
17 Weshowo ali navyuma vyahano hakaye, kaha himwamona ndumbwenyi nakalikiza, oloze mwakana kumwivwila keke, kaha zangi yenyi yakumuzanga Kalunga yili halihi?+
18 Enu vana vami ngwazanga, katwatela kuzanganga vakwetu namazu chipwe hakanwako,+ oloze muvilinga+ namumuchano.+
19 Hakiko vene natutachikijila ngwetu twapwa tuvaka-muchano, kaha natukunyula michima yetu kumeso enyi
20 havyuma vyosena vize nayihasa michima yetu kutuhanyina milonga, mwomwo Kalunga ahambakana michima yetu, kaha atachikiza vyuma vyosena.+
21 Enu ngwazanga, kachi nge michima yetu kayeshi nakutuhana milongako, kaha natuhanjika nakukasunuka kuli Kalunga.+
22 Kaha cheshocho chuma natulomba kuli ikiye mwatuhanacho,+ mwomwo tweji kulamanga jishimbi jenyi, nakulinganga vyuma vize vyeji kumwivwisanga kuwaha.
23 Elu lukiko lushimbi lwenyi ngwenyi: tufwelele lijina lyaMwanenyi Yesu Kulishitu,+ ngwenyi tulizangenga navakwetu+ nganomu lwaya lushimbi atuhanyine.
24 Kaha nawa, ou eji kulamanga jishimbi jenyi mwalikatanga naikiye, kaha ikiye nawa mwalikatanga namutu kana.+ Tunatachikiza ngwetu nalikate nayetu mwomwo yashipilitu yize atuhanyine.+
Kwinyikila Chamwishi
^ Chipwe “kufuma vene haze aputukile.”
^ Chipwe “anongese.”
^ Kulumbununa, mbuto yize yinahase kwima chipwe kulovola mihako.
