WaYowano 2 1:1-13
1 Ami mukulwane, nguli nakusonekela pwevo vasakula navana venyi. Vosena ngwavazanga chikuma, keshi nge ami kahako, oloze navosena nawa vaze vatachikiza muchano,
2 mwomwo yamuchano ou watwama muli etu, kaha naupwanga nayetu nawa haya myaka yosena.
3 Likoji lyalinene, nakutetela, nakuunda vyakufuma kuli Setu Kalunga, nakuli Yesu Kulishitu MwanaSetu, hamwe kaha namuchano nazangi navipwanga lika nayetu.
4 Ngweji kwivwanga kuwaha chikuma hakwijiva nge vana vove vamwe vali nakutambuka mumuchano,+ nge muze twatambwile lushimbi kuli Setu.
5 Ngocho nguli nakukulembelela ove pwevo ngwami, tulizangenga navakwetu. (Kangweshi nakukusonekela lushimbi lwaluhyako, oloze luze vatuhanyine kufuma vene kukuputuka.)+
6 Zangi yalumbununa nge twatela kutambukanga mwaya jishimbi jenyi.+ Elu lukiko lushimbi nge omu mwevwa lyehi kufuma kukuputuka mangana mutambukengamo lika.
7 Mwomwo vaka-kwonga vavavulu vanasoloka lyehi mukaye,+ vaze kaveshi kwitavila ngwavo Yesu Kulishitu ejile mumujimba.+ Mutu kana napu muka-kuhungumwisa, muka-kole waKulishitu.+
8 Zangamenunga, kuchina namutokesa vyuma vize tunawane lyehi hakukilikita chetu. Nge namulinga ngocho, kaha namukatambula fweto yakutamo.+
9 Weshowo mwatanguka nakuzeneka kutwama mukunangula chaKulishitu keshi naKalungako.+ Ou mwatwamanga mukunangula kanechi ikiye ali naSetu, naMwana nawa.+
10 Kachi nge mutu umwe mweza kuli enu nakunangula chize chalimbalaka nakunangula kanechi, kaha kanda kumutambula mujizuvo+ jenu chipwe kumumenekako.
11 Mwomwo ou mwamumeneka nalikate lyehi nenyi kuvilinga vyenyi vyakuhuka.
12 Numba tuhu nguli navyuma vyavivulu vyakumisonekela, kangweshi nakusaka kuvisoneka halipapilo naulomboko, oloze nguli nakufwila kwiza kuli enu mangana ngukahanjike nayenu meso nameso, mangana muwahilile chikuma.
13 Vana vandumbwove wapwevo uze vasakula vanakumeneka.
