Yelemiya 1:1-19
1 Awa akiko mazu aYelemiya* mwanaHilikiya, uze apwile kapilishitu havapilishitu vaze vapwilenga muAnatote+ mungalila yavaMbenjamine.
2 Yehova ahanjikile kuli Yelemiya hamakumbi aYoshiya+ mwanaAmone+ mwangana wavaYuta. Ahanjikile kuli ikiye mumwaka wakusokesa 13 wachiyulo chaYoshiya.
3 Ahanjikilenga nawa kuli ikiye hamakumbi aYehoyakime+ mwanaYoshiya mwangana wavaYuta, palanga nakusongo yamwaka wakusokesa 11 wachiyulo chaZetekiya+ mwanaYoshiya mwangana wavaYuta, swi namukakweji wamuchitanu uze vatwalile vatu vamuYelusalema muufunge.+
4 Yehova ahanjikile kuli ami Yelemiya ngwenyi:
5 “Ngwakutachikijile* shimbu kanda ngukutenge mujimo lyanoko,+Ngwakujilikile* shimbu kanda usemuke.*+Ngwakutongwele upwenga ukapolofweto kuli vaka-mafuchi eka.”
6 Oloze ami ngwambile ngwami: “Mama lelo, ove Mwata Wakulitulaho Yehova!Ami kangwatachikiza kuhanjikako+ mwomwo ngukanyike wamundende.”+
7 Jino Yehova ambile kuli ami ngwenyi:“Kanda nawamba ngwove, ‘Ngukanyike wamundendeko.’Watela kuya kuli vatu vosena vaze nangukutuma,Kaha ukahanjika vyeshovyo nangukulweza.+
8 Kanda nauvevwa womako+Mwomwo ami Yehova ngunambe ngwami, ‘Ami nguli nayove, nangukulwila.’”+
9 Jino Yehova olwele livoko lyenyi nakulinangika hakanwa kami.+ Yehova ambile kuli ami ngwenyi: “Ngunakuhake mazu ami mukanwa.+
10 Tala, likumbi lyalelo ngunakuhane wata hali vaka-mafuchi nahamawangana, mangana uvunye nakupuzula, unongese nakushiula, utunge nakutumba.”+
11 Yehova ahanjikile cheka kuli ami ngwenyi: “Ove Yelemiya, chuma muka uli nakumona?” Kaha ngwambile ngwami: “Nguli nakumona mutango wamumonde.”
12 Yehova ambile kuli ami ngwenyi: “Mukiko, chuma unamono chikiko vene. Ami kangweshi kusavala tuloko mangana ngutesemo mazu ami.”
13 Yehova ahanjikile kuli ami kamuchivali ngwenyi: “Chuma muka uli nakumona?” Kaha ngwambile ngwami: “Nguli nakumona ndeho* yize yili nakusava.* Ndeho kana yatengaminanga kunote, oloze yinatengamina jino kusulo.”
14 Kaha Yehova ambile kuli ami ngwenyi:“Lupi nalufuminyina kunoteNakwiza hali vatu vamulifuchi lino vosena.+
15 Mwomwo ami Yehova ngunambe ngwami, ‘Nangusanyika miyachi yosena yamuwangana wakunote,+Naveza, kaha navatunga matanda avo awanganaKuvikolo vyaYelusalema,+Navatunga matanda avo kukembwe yaYelusalema yosena jingulwishiNamujinganda jamuYuta josena.+
16 Nangusopesa vatu vamulifuchi lino mwomwo yavilinga vyavo vyavipi,Nanguvasopesa hakuwana nge vananguseze,+Vali nakulumbila tulunga veka vimuna vakuvatula mangana vakakumuke wishi,+Vali nakulifukula kuvyuma vize vanatenge namavoko avo.’+
17 Shikaho ove lizange,*Katuka uvalweze vyuma vyosena ngunakulweze.Kanda naulizuzukila mwomwo yavakikoko,+Kuchina nangukuzuzwisa kumeso avo.
18 Likumbi lyalelo ngunakulingisa kupwa unganda yakujingulwisa kembwe,Ngunakulingisa kupwa upanda yafwelu nakembwe yaunengu kuli vatu vamulifuchi vosena,+Nakuli vamyangana vamuYuta, nakuli vilolo vamuYuta,Nakuli vapilishitu vamuYuta, nakuli vatu vamulifuchi.+
19 Navalwa nayove,Oloze kaveshi kukufungululako,Mwomwo ami Yehova ngunambe ngwami, ‘Ami nguli nayove,+ nangukulwila.’”
Kwinyikila Chamwishi
^ Kulumbununa pamo, “Yehova Eji Kuzezulanga.”
^ Chipwe “Ngwakusakwile.”
^ Chipwe “Ngwakuhandwile.”
^ Hepe., “shimbu kanda ulovoke mujimo.”
^ Chipwe “ndeho yakanwa kakanene.”
^ Hepe., “yize vali nakufutumwina,” kulumbununa yize yili nakakahya mwishi.
^ Hepe., “likase hajitungi jove.”