Yelemiya 11:1-23
11 Yehova ahanjikile kuli Yelemiya ngwenyi:
2 “Enu vatu, ivwenu mazu alushiko elu.
“Hanjika* mazu alushiko elu kuli vaYuta nakuli vatu vamuYelusalema
3 ngwove, ‘Yehova Kalunga kaIsalele nambe ngwenyi: “Weshowo mwazeneka kwononoka mazu alushiko elu apwenga wakwangula.+
4 Awa himazu alushiko aze ngwalwezele vakakuluka jenu halikumbi lize ngwavalowele mulifuchi lyaEjipitu,+ mulilungu lyakakahya lyakuyengunwina fwelu,+ ngwami, ‘Ivwililenunga mulizu lyami, lingenunga vyuma vyosena vize nangumilweza, kaha namupwa muvatu jami, kahami nawa nangupwa nguKalunga kenu.+
5 Nge namulinganga ngocho, kaha nangutesamo lushingo luze ngwalishingile kuli vakakuluka jenu lwakuvahana lifuchi lyakumbwambumuka mavele nauchi.’+ Kahenu munatwamenga mulifuchi kana palanga nakulelo lino.”’”
Jino ami ngwambile ngwami: “Amene,* Ove Yehova.”
6 Yehova ambile kuli ami ngwenyi: “Vilika mazu osena awa mujinganda javaYuta namujijila jamuYelusalema ngwove: ‘Ivwililenu mazu alushiko elu nakuwalama.
7 Mwomwo vakakuluka jenu ngwavahuhumwine halikumbi lize ngwavalowele mulifuchi lyaEjipitu, kaha chingulinga lika ngocho palanga nakulelo lino. Ngwavahuhumwinenga mapapa kakavulu* ngwami: “Ononokenu mulizu lyami.”+
8 Oloze kavevwililile chipwe kutengeleka matwitwi avoko. Mutu himutu anjinjavalile nakukavangiza mwayile muchima wenyi waupi.+ Ngocho ngwavalingile nge kutesa namazu alushiko elu ngwavalwezele kulama. Oloze vakanyine kuwalama.’”
9 Yehova ambile cheka kuli ami ngwenyi: “VaYuta navatu vamuYelusalema vanalikase chivwasano.
10 Vanakinduluka kuvilinga vyakuhenga vyavakakuluka javo vaze vakanyine kwononoka mazu ami.+ Navakiko vali nakukavangiza tulunga veka nakuvazachila.+ Vaze vakuzuvo yaIsalele navaze vakuzuvo yaYuta vanajihi lushiko lwami luze ngwalishikile navakakuluka javo.+
11 Ngocho Yehova nambe ngwenyi, ‘Nanguvanehela lupi+ luze navahona kuchina. Kaha kangweshi kuvevwililako omu navatwa kawelele kuli ami.+
12 Jino vatu vamujinganda jaYuta navatu vamuYelusalema navakaya kutulunga twavo vaze vali nakulumbila vimuna vakuvatula* nakutwa kawelele+ kuli vakiko, oloze kaveshi kukavalwila kulupi lwavoko.
13 Enu vaYuta, tulunga twenu vanavulu chikuma nge jinganda jenu. Munatungila chuma chaunyengwe* majiko akulumbila amavulu chikuma kwijiva nge jijila jamuYelusalema. Munatungila Mbale majiko akumulumbila vimuna vakuvatula.’+
14 “Jino ove* kanda naulombela ava vatuko. Kanda nauvatwila kawelele, chipwe kuvalombela kuli amiko.+ Kangweshi kuvevwililako nge navatwa kawelele kuli ami halupi lwavo.
15 Vatu jami ngwazanga vakwechi lisesa muka lyakutwama muzuvo yamiOkunyi vavavulu vali nakulinga vyuma vyavipi?Uno nge lupi luneza hali vakiko, kutala vanahase kuluhonesa nanyama yajila yavimuna javo vakuvatula* nyi?Kutala navalisamba halwola kana nyi?
16 Kushikulu Yehova avavulukile ngwenyi, ‘Mulive uze uli nakufukila,Mulive wamwaza wakwima mihako yamwaza.’Oloze mulive kana nauswamika kakahya nachivumo chachinene,Mitango yawo nawa vanayihokola.
17 “Yehova wamayongomena uze amitumbile+ nahanjika ngwenyi lupi nalwiza hali enu mwomwo yavyuma vyavipi vize munalingi enu vakuzuvo yaIsalele nayenu vakuzuvo yaYuta, enu munamwivwisa kupihya kumuchima hakulumbila Mbale vimuna vakuvatula.”+
18 Ove Yehova, wangulwezele mangana ngutachikize.Halwola kana wangulingishile ngumone vyuma valingilenga.
19 Ngwapwile nge mwanamukoko wakuhola uze navaya nakujiha.Kangwatachikijile ngwami vanangutwame pungako nakwamba ngwavo:+“Twenyekenu ou mutondo namihako yawo,Tumunongesenu afume hano hamavu,Mangana lijina lyenyi vakazeneke kulyanuka.”
20 Oloze ove Yehova wamayongomena weji kuyulanga mwakwoloka.Weji kukekesanga vishinganyeka* namuchima wamutu.+Nangutalilila ngumone omu nauvalinga sambanjinga,Mwomwo ove yove ngunahane chihande chami uchitale.
21 Ngocho Yehova nahanjika vyuma navisoloka kuli vatu vamuAnatote+ vaze vali nakusaka kukujiha, vaze vali nakwamba ngwavo: “Kanda naupolofweta mulijina lyaYehovako+ kuchina natukujiha.”
22 Yehova wamayongomena nambe kuli vakiko ngwenyi: “Nanguvasopesa. Vakweze javo navafwa kupoko yamukwale,+ kaha vana vavo vamalunga navava vamapwevo navafwa kuzala yakalombolombo.+
23 Kakweshi umwe mwasalaho hali vatu vamuAnatoteko,+ mwomwo nanguneha lupi hali vakiko hamwaka uze nanguvasopesa.”
Kwinyikila Chamwishi
^ Chili nakusoloka nge vali nakuvuluka Yelemiya.
^ Chipwe “Chipwenga vene ngocho.”
^ Hepe., “Ngwahindukilenga chimenemene nakuvahuhumuna.”
^ Chipwe “vimuna vakuvatula mangana vakakumuke wishi.”
^ Chipwe “kalunga waunyengwe.”
^ Kulumbununa, Yelemiya.
^ Kulumbununa, vaze valumbililenga mutembele.
^ Hepe., “kukekesanga jiso.”
