Yelemiya 12:1-17
12 Ove Yehova, weji kulinganga mwakwoloka+ nge nanguyayavala kuli ove,Chipwe nge nanguhanjika nayove havihande vyachiyulo.Oloze mwomwo ika vatu vakuhuka veji kufukilanga?+Kaha nawa mwomwo ika vaka-kumbembejeka vatwamina chakuzeneka kulizakamina?
2 Vatu kana wavatumbile, kaha vanajiki miji.Vanakolo nakwima mihako.Veji kukuvulukanga namivumbo yavo, oloze kaveshi kukushinganyeka numba hahandendeko.+
3 Oloze ove Yehova, ove wangutachikiza+ kaha nawa weji kungumonanga.Unakekesa muchima wami, kaha unawane nge unalitombola namwaya muchima wove.+Vahake hauka wavo nge mikoko vaze navaya nakujiha,Vahandule vavandamine likumbi lyakuvajiha.
4 Uno vyuma mulifuchi navizuza palanga nakumwaka uka?Uno vyuma vyakusoka hamavu navyuma palanga nakumwaka uka?+Tunyama natujila vananongoMwomwo yavilinga vyavipi vyavatu vatwama mulifuchi kana.Vanambe ngwavo: “Vyuma navitusolokela keshi kuvimonako.”
5 Kachi nge nauzeya hakulaha navaka-kutambuka hamahinji,Kutala nauhasa kulaha hamwe natuvalu nyi?+Numba tuhu uli nakutwama chakuzeneka kwivwa woma mulifuchi lyakuunda,Oloze naukevwa woma mumavunda akuchikulo chaYotau.
6 Mwomwo vandumbwove, vaze vakuzuvo yaiso navakikoVali nakukumbembejeka,+Vali nakukukuwa.Kanda nauvafwelelakoNumba nge navakulweza vyuma vyamwaza.
7 “Zuvo yami ngunayiseze,+ uswana wami ngunaumbili.+Ou ngwazanga chikuma* ngunamuhane mumavoko avaka-kole jenyi.+
8 Uswana wami nguli nakuumona nge ndumba uze ali mumusenge.Unangutahwokela,Ngocho ngunauhungu.
9 Uswana wami nguli nakuumona nge kajila wakulya nyama wamavalanga-mavalanga.Tujila veka vakulya nyama vanamujingilika nakumuchomona.+Enu visuma vamuchipapa muvosena, twayenu, kungulukenu,Twayenu mumulye.+
10 Tufunga vavavulu vanenyeka wande wami wamivinyo.+Vanalyatangila musuka wami wamavu.+Vanenyeka musuka wami wamwaza wamavu nakuulingisa kupwa pambo.
11 Unapu jino hingundu.Unomu chau.*Unalyenyeka kumeso ami.+Lifuchi lyosena vanalinongesa nakusala ngundu,Oloze naumwe wauchi nahakeko muchima.+
12 Vaka-kunongesa vaneza mujijila jakuhweka josena jamupambo.Poko yamukwale yaYehova yili nakujiha vatu kufuma kusongo yalifuchi nakutwala kusongo yikwavo.+Naumwe ali nakutwama mukuunda wauchi.
13 Vanakuu tiliku, oloze vanahe mingonga.+Vanalishinyi tuhu.Navevwa sonyi havyuma vanahe,Mwomwo yautenu waYehova.”
14 Yehova nambe ngwenyi:+ “Vatu vakuhuka ngwalihata navo vosena, vaze vali nakukwata hauswana ngwahanyine vatu jami vaIsalele nanguvavunya mulifuchi.+ Nanguvunya nawa vaze vakuzuvo yaYuta muli vakiko.
15 Oloze omu nangulinga hingunavavunyu lyehi, nangukavatetela cheka nakukindulwisa mutu himutu kuuswana wenyi namulifuchi lyenyi.”
16 “Kachi nge ava vaka-mafuchi navalinangula jijila javatu jami, nakulishinga lijina lyami ngwavo, ‘Omu ayoya Yehova tu!’ nganomu vakiko vanangwile vatu jami kulishinga Mbale, kaha navakatwama navatu jami.
17 Oloze nge navakana kungwononoka, kaha nangukavavunya cheka nakuvanongesa.” Omu mukiko mwanambe Yehova.+
