Yelemiya 13:1-27
13 Yehova angulwezele ngwenyi: “Yako ukalande muhya walihina, kaha uuvwale mumbunda. Oloze kanda nauumbwichika mumeyako.”
2 Ngocho ngwayile nakulanda uze muhya kweseka namuze angulwezele Yehova. Kaha ngwauvwalile mumbunda.
3 Jino Yehova ahanjikile kuli ami kamuchivali ngwenyi:
4 “Mbata ou muhya unalande, ou unavwale, yako nawo kuYufwalate ukausweke mumwaji walilolwa.”
5 Ngocho ngwayile, ngwakaswekele uze muhya kuYufwalate, nge muze angulwezele Yehova.
6 Omu mwahichile makumbi amavulu, Yehova ambile kuli ami ngwenyi: “Katuka, yako kuYufwalate mangana ukambate uze muhya ngwakulwezele kuya nakusweka kuze.”
7 Ngocho ngwayile kuYufwalate, kaha ngwafumishile uze muhya mulilolwa muze ngwauswekele. Jino ngwawanyine uze muhya unapolo, kawapwile namulimoko.
8 Jino Yehova ahanjikile kuli ami ngwenyi:
9 “Yehova nambe ngwenyi, ‘Omu mukiko nangukumisa kulivwimba chaYuta nakulivwimba chaYelusalema.+
10 Ava vatu vavapi, ava veji kukananga kwononoka mazu ami,+ ava vananjinjavala nakulinga mwaya michima yavo,+ ava vali nakulemesa tulunga veka, nakuvazachila, nakulifukula kuli vakiko, navapwa nge ou muhya unazeneka mulimo.’
11 Yehova nambe ngwenyi, ‘Vaze vakuzuvo yaIsalele vosena navaze vakuzuvo yaYuta vosena ngwavalingishile valamate kuli ami nganomu muhya weji kulamatanga mumbunda yamutu. Ngwalingile ngocho mangana vapwenga vatu jami,+ vapwenga fuma yami,+ vapwenga kwalisa chami, vapwenga chuma chami chamwaza. Oloze kavangwononokeleko.’+
12 “Ove uvalweze nawa mujimbu uno ngwove, ‘Yehova Kalunga kaIsalele nambe ngwenyi: “Milondo yayinene yosena vatela kuyizalisa navinyo.”’ Oloze vakiko navakukumbulula ngwavo, ‘Uno etu katwatachikiza ngwetu milondo yayinene yosena vatela kuyizalisa navinyoko numba?’
13 Kaha uvalweza ngwove, ‘Yehova nambe ngwenyi: “Talenu, vatu vamulifuchi lino vosena,+ vamyangana vaze vanatwame halitanda lyaNdavichi, navapilishitu, navapolofweto, navatu vamuYelusalema vosena nanguvanwisa vinyo vapende.”
14 Yehova nambe ngwenyi: “Nanguchikila mutu hali mukwavo, namasevo navana.+ Kangweshi kuvatetela, chipwe kuvevwila keke, chipwe kwivwa chinyengoko. Kakweshi chuma numba chimwe nachinguhonesa kuvanongesako.”’+
15 Ivwililenu, tengelekenu matwitwi enu.Kanda namulivwimbako mwomwo Yehova nahanjikamo lyehi.
16 Tohwesenu Yehova Kalunga kenu,Shimbu kanda anehe milima,Shimbu kanda muhukane hapili hakajimbavenyi.Namutalilila ngwenu kupwenga kumunyika,Oloze mwaneha milima yayinene.Kumunyika mwachalumuna kupwa milima wi.+
17 Kachi nge kamweshi kwivwililako,Kaha nangulilila kupenge mwomwo yakulivwimba chenu.Nangusotola masoji amavulu, mumeso ami namupwelumuka masoji,+Mwomwo utanga waYehova+ vanautwale muufunge.
18 Lweza mwangana nanaye yamwangana ngwove,+ ‘Twamenu hamavu,Mwomwo michama yenu yamwaza nayiholoka kumitwe yenu.’
19 Jinganda jakusulo vanajisoko,* kaha kakweshi umwe mwajisokololako.VaYuta vosena vanavatwale muufunge, vosena vanayi muufunge.+
20 Andula meso ove utale vaze vali nakufuminyina kunote.+Uno utanga wamikoko jove vamwaza uze vakuhanyine uli kulihi?+
21 Uno naukamba ngwove ika omu navakakuzangamisaKuli masepa jove wazanga vaze unalikatenga navo kufuma vene kumyaka yakunyima?+Naukevwa kukola ngana mwapwevo uze ali nakusapuluka.+
22 Kahomu naukamba mumuchima wove ngwove, ‘Ikaze nguli nakumwena vyumevi?’+Tachikiza ngwove kuhenga chove chinatoho, shikaho vanakuzulila vifunga vyove,+Shikaho unevwila kukola kutukukunya twove.
23 Kutala kaKushe* nahase kwalumuna chikova chenyi numba? Kutala chisupa nahase kwalumuna mapenga enyi numba?+Kachi nge vanahase, kaha nayenu mwalinangula kulinga vyuma vyavipiMunahase kulinga vyuma vyamwaza.
24 Ngocho nangukamimwanga ngana mwaviswaswa vize vinapekumuka napeho yamulikundu.”+
25 Yehova nambe ngwenyi: “Echi chikiko chazano chove chize ngunakuhane,Mwomwo unanguvulyama,+ kaha nawa unafwelela muvyuma vyamakuli.+
26 Ngocho nangukambula vifunga vyove nakukufwikavyo kumeso,Kaha vatu navamona usonyi wove,+
27 Navamona vilinga vyove vyaukoji,+ nakuhwimasana chove chapeha,Navilinga vyove vyaunyengwe* vyaujila.Ngunamono vilinga vyove vyaunyengwe+Vize uli nakulingila hajipili muchipapa.Ove Yelusalema, lamba kuli ove!Naupihyanga lika palanga nakumwaka uka?”+
Kwinyikila Chamwishi
^ Chipwe “vanajihake muchingombela.”
^ Chipwe “kaEchopa.”
^ Chipwe “vyakwivwisa sonyi.”
