Yelemiya 15:1-21
15 Jino Yehova ambile kuli ami ngwenyi: “Numba nge Mose naSamwele navemana kumeso ami,+ ava vatu kangweshi kuvevwila uselewako. Vahange kumeso ami vayenga.
2 Oloze nge navamba kuli ove ngwavo, ‘Natuya kulihi?’ Ove uvalweza ngwove, ‘Yehova nambe ngwenyi:“Ou mwafwa kumusongo wachihita, afwenga kumusongo wachihita.Ou mwafwa kupoko yamukwale, afwenga kupoko yamukwale.+Ou mwafwa nazala yakalombolombo, afwenga nazala yakalombolombo.Ou mwaya muufunge, ayenga muufunge.”’+
3 “Yehova nambe ngwenyi, ‘Nanguvatumina vyuma vyavipi viwana.*+ Nanguvatumina poko yamukwale yivajihe, navatuwa mangana vavakokangize, natujila vakutuka mwilu natunyama vahamavu mangana vavalye nakuvanongesa.+
4 Nanguvanongesa nakuvalingisa vakomwese mawangana ahamavu osena+ mwomwo yavyuma vize Manase mwanaHezekiya, mwangana wavaYuta alingile muYelusalema.+
5 Ove Yelusalema, iyaze mwakutetela?Iyaze mwakwivwila keke?Iyaze mwemana nakwihula chihindu chove?’
6 Yehova nambe ngwenyi, ‘Unanguseze,+Unangumbu nyima.*+Ngocho nangwolola livoko lyami nakukunongesa.+Jinanguhu kukwivwila keke.*
7 Vatu jami nanguvapepela muvikolo vyalifuchi ngana muze veji kupepanga mbuto jamanona.Nangujiha vana vavo.+Vatu jami nanguvanongesa,Mwomwo kavate kuseza jijila javo jajipiko.+
8 Vatuliwe javo vamapwevo navavula chikuma kumeso ami kuhambakana usekeseke wakukalungalwiji.Nanguneha muka-kunongesa musana weye mangana ajihe visemi vamapwevo navakweze.Nangulingisa chiwomawoma nakulizakamina vivawane mukukasumuna.
9 Pwevo uze asemene vana 7 nazeye,Ali nakutesukila.Likumbi lyenyi linalauka okunyi kuchili musana.Echi chinanehe sonyi nakusauka.’*Yehova nambe ngwenyi, ‘Vatu vavandende vaze vanasalehoNanguvahana kuli vaka-kole javo mangana vavajihe napoko yamukwale.’”+
10 Ove mama, lamba kuli ami, ikaze wangusemenene?+Vatu vamulifuchi vosena vali nakungukokojwesa nakunguzungisa.Ami kangwalevanyishile mutu chumako, kaha nawa kangwalevanyine chuma kuli mutuko,Oloze vatu vosena vali nakungwangula.
11 Yehova ambile ngwenyi: “Nangukakukafwa.Nangukakuhanjikilako halwola lwaluyando,Nangukakuhanjikilako kuli muka-kole wove halwola lwavihuli.
12 Kutala mutu nahase kuhokwojolaFwelu yakunote naunengu numba?
13 Luheto lwenu navikumba vyenu nangukavihana kuvatu vakavipupe,+Navakavimbata chakuzeneka fweto mwomwo yajishili jenu muli nakulinga mujingalila jenu josena.
14 Nangukavihana vaka-kole jenuVakavitwale kulifuchi lize kamwatachikizako.+Mwomwo utenu wami unepula kakahya,Kaha nakamyocha.”+
15 Ove Yehova, ove unatachikiza,Ngwanuke, ngwalakane.Ngulingile sambanjinga kuli vaka-kunguyanjisa.+Kanda naungwechelela ngunonge* mwomwo yakushipwokela chove kukwata utenuko.Tachikiza ngwove vali nakungutolekela hali ove.+
16 Ngwawanyine mazu ove, kaha ngwawalile.+Mazu ove angulingishile ngulisambe nakuwahilila mumuchima wami.Ove Yehova Kalunga wamayongomena, ami vanguvulukila lijina lyove.
17 Kangweshi kutwama hamwe navatu vasaka viseke nakuwahilila navoko.+Ngweji kutwamanga uka wami mwomwo livoko lyove lili hali ami,Mwomwo unangulingisa ngusave namatoto.*+
18 Ikaze kukola nguli nakwivwa chili nakutwalililaho lika? Ikaze mbandu yami yinapwila limbongola?Mbandu yami kayite kukanguka.Ikaze naupwila nge ulishima lyamakuliLize navazeneka kufwelela?
19 Ngocho Yehova nambe ngwenyi:“Kachi nge naukinduluka, kaha nangukwitavila,Nawimana kumeso ami.Kachi nge nauhandununa vyuma vyavilemu kuli evi vyamokomoko,Kaha naupwa nge ukanwa kami.*Vatu navakalumukila kuli ove,Oloze ove kaweshi kukalumukila kuli vakikoko.”
20 Yehova nambe ngwenyi: “Nangukulingisa kupwa ukembwe yakukola yaunengu kuli ava vatu.+Navalwa nayove,Oloze kaveshi kukufungululako,+Mwomwo ami nguli nayove, nangukulwila nakukupululula.
21 Nangukupululula mumavoko avaka-kuhuka,Nangukuyovola mumavoko avikenya.”
Kwinyikila Chamwishi
^ Chipwe pamo, “Nanguvatumina kusopesa chiwana.” Hepe., “Nanguvatumina jitanga jiwana.”
^ Chipwe pamo, “Uli nakutambuka ufutanyima.”
^ Chipwe “Jinanguhu kuliveya.”
^ Chipwe pamo, “Linevu sonyi, kaha vanalinyisa.”
^ Hepe., “Kanda naungufumisako.”
^ Chipwe “namujimbu waupi.”
^ Chipwe “nge umuka-kunguhanjikilako.”
