Yelemiya 16:1-21
16 Yehova ahanjikile cheka kuli ami ngwenyi:
2 “Kanda naumbata pwevo, chipwe kusemena vana vamalunga navava vamapwevo muchihela chinoko.
3 Yehova nahanjika kutalisa kuvana vamalunga navava vamapwevo vaze vali nakusemukila muchihela chino, nakuli manevo namasevo vaze vali nakuvasema mulifuchi lino ngwenyi:
4 ‘Navafwa kumusongo wachihita,+ kaha kakweshi mutu mwavalila chipwe kuvafundako. Navapwa wilo hamavu.+ Navanonga kupoko yamukwale nakuzala yakalombolombo,+ kaha mijimba yavo yakufwa nayipwa kulya chatujila vakutuka mwilu, natunyama vahamavu.’
5 Yehova nambe ngwenyi, ‘Kanda nawingila muzuvo muze vali nakulingila chiwanyino chavaka-kulishonako,Kanda nauya nakulishona navo chipwe kuvavendejekako.’+Yehova nambe ngwenyi,‘Ava vatu ngunavatambula kuunda chami,Ngunalitwamina kuvasolwela zangi yami yakwilila nakuvatetela.+
6 Vatu vavalemu navava vamokomoko vosena navafwila mulifuchi lino.Kaveshi kuvafundako.Kakweshi umwe mwavalilako.Kakweshi umwe mwalichata jichato chipwe kuliteula kakongo mwomwo yakulishona hali vakikoko.*
7 Naumwe wauchi mwahana vyakulya vaze vali nakulishonaMangana avavendejeke havafu javo.Naumwe wauchi mwavahana vyakunwaMangana avavendejeke hakufwisa masevo chipwe manevo.
8 Kanda nawingila muzuvo muze vali nakulingila chiwanyinoMangana utwame navo nakulya nakunwako.’
9 “Yehova wamayongomena, Kalunga kaIsalele nambe ngwenyi, ‘Hamakumbi enu, namulimwena nameso enu kapu omu nanguholesa vyema vyakulisamba, navyema vyakuwahilila, navyema vyamwenyamwenga, navyema vyamwenga muchihela chino.’+
10 “Omu naulweza ava vatu mazu osenawa, navakuhulisa ngwavo, ‘Mwomwo ika Yehova nahanjikila vyakutumwenesa lupi lwalunene ngana? Mulonga muka tunavulumuna kuli Yehova Kalunga ketu, kaha nawa shili muka tunalingi kuli ikiye?’+
11 Ove uvakumbulula ngwove, ‘Yehova nambe ngwenyi: “Vakakuluka jenu vangusezele,+ kaha valemeselenga tulunga veka, nakuvazachila, nakulifukula kuli vakiko.+ Vangusezele, kaha valitwaminyine kukavangiza jishimbi jami.+
12 Enu munapihisa chikuma kuhambakana vakakuluka jenu,+ mutu himutu nanjinjavala nakukavangiza mwaya muchima wenyi waupi mukutela kungwononoka ami.+
13 Shikaho nangumifumisa mulifuchi lino nakumihangila kulifuchi lize munazeneka kutachikiza enu chipwe vakakuluka jenu.+ Kangweshi kukamivwila uselewako, ngocho namukazachilanga tulunga veka kuze musana naufuku.”’+
14 “Yehova nambe ngwenyi, ‘Makumbi ali nakwiza omu vatu kana navakazeneka kwamba ngwavo: “Omu ayoya Yehova tu, ou alowele vaIsalele mulifuchi lyaEjipitu.”+
15 Oloze navakamba jino ngwavo: “Omu ayoya Yehova tu, ou alowele vaIsalele mulifuchi lyakunote namumafuchi eka osena muze avamwangilile.” Jino ami nangukavakindulwisa kulifuchi lyavo lize ngwahanyine vakakuluka javo.’+
16 Yehova nambe ngwenyi, ‘Nangutuma vaka-kuta vaishi vavavulu,Kaha navakavata.Kufumaho nangukatuma vinyanga vavavulu,Kaha navakavazomba kujipili jajinene najeji jajindende josena,Namumyaji yamumalolwa.
17 Mwomwo meso ami ali nakumona vyuma vyosena vali nakulinga.*Kavaswamine kumeso amiko,Namilonga yavo nawa kayaswamine kumeso amiko.
18 Nangukavangila kuvazangamisa hamilonga yavo nahajishili javo,+Mwomwo vanajilulula lifuchi lyami namakombelo avo aunyengwe akuzeneka kuyoya,*Vanazalisa uswana wami navyuma vyavo vyaunyengwe.’”+
19 Ove Yehova, ove ngolo jami, ove chihela chami chakukola,Ove chihela chami chakuchinyina halwola lwaluyando,+Vaka-mafuchi naveza kuli ove kufuma kusongosongo yamavu kwosena.Kaha navamba ngwavo: “Vakakuluka jetu vaswanyine tulunga vamakuli,*Navyuma vyaufwefwelekete, navyuma vyamokomoko vyakuzeneka nganyo.”+
20 Uno mutu nahase kutenga tulunga,Okunyi tulunga kana kavapwa vamwenemweneko nyi?+
21 “Shikaho nanguvalingisa vatachikize.Halwola luno nanguvalingisa vatachikize ngolo jami naundume wami.Navatachikiza ngwavo lijina lyami yami Yehova.”
Kwinyikila Chamwishi
^ Kulishona chavaka-mafuchi eka chize valishonenenga vaIsalele vakulikanga.
^ Hepe., “nakumona jijila javo josena.”
^ Hepe., “akufwa.”
^ Hepe., “vaswanyine vyuma vyamakuli.”
