Yelemiya 17:1-27
17 “Shili yavaYuta vayisoneka nasonekeso yafwelu.Vayisoneka mumichima yavo nandayamonde yakusongoloka,Vayisoneka kujimbinga jamajiko avo akulumbila.
2 Navana vavo vali nakushinganyeka lika majiko avo akulumbila, najipanda javo jajila jamitondo*+Jize jili mumitondo yakujika mafwo, nahajipili jajindende jajisuku,+
3 Nahajipili jajinene jamulifuchi.Luheto lwenu navikumba vyenu nangukavihana kuvatu vakavipupe,+Nangukavahana navihela vyenu vyakulunduka mwomwo yajishili jenu muli nakulinga mujingalila jenu josena.+
4 Uswana wenu uze ngwamihanyine namukautokesa mukusaka chenu.+Nangukamilingisa mukazachile vaka-kole jenu mulifuchi lize kamwatachikizako,+Mwomwo munepula utenu wami kwijiva nge kakahya.*+Kaha nawenyanga lika haya myaka yosena.”
5 Yehova nambe ngwenyi:“Weshowo* mwafwelela vatu+Ou mwapendamina hangolo javatu,*+Ou nawa mwalumuna muchima wenyi nakuseza Yehova apwenga wakwangula.
6 Mutu kana mwapwanga nge mutondo uze wasoka hauka wawo mulikundu.Keshi kumona omu naviza vyuma vyamwazako,Oloze mwatwamanga mujingalila jaumu mupambo,Mwatwamanga mulifuchi lyamungwa muze kamweshi kuhasa kutwama mutuko.
7 Weshowo* mwafwelela Yehova,Ou mwajika muchima hali Yehova apwenga wakukisula.+
8 Mutu kana mwapwanga nge mutondo uze vatumba kumeya,Uze weji kutanjilanga miji yawo kukalwiji.Keshi kwivwa musanako,Mafwo enyi nawafukilanga lika.+Keshi kulizakaminako nge kuli changa,Keshi kulitwamina kwima mihakoko.
9 Muchima wapwa uka-kutangisa* kuhambakana vyuma vyosena, kaha wafwila kulinga cheshocho unasake.*+Iyaze mwahasa kutachikiza omu wapwa?
10 Ami Yehova ngweji kuhehwojolanga michima,+Ngweji kukekesanga vishinganyeka* vyavatuMangana ngushishishilemo mutu himutu kweseka najijila jenyiNamilimo yenyi.+
11 Mutu uze eji kuhetanga luheto mulizangamina+Napu nge ngwali uze mwautamina maulu aze nazeneka kumbilila.Luheto kana nalumukumina hakachi,Kaha kutwala muze mwasoloka nge hichileya.”
12 Chihela chetu chajila+Chinapu litanda lyaupahu lize vazezula kufumisa vene kukuputuka.
13 Ove Yehova, ove vafwelela vaIsalele,Vosena vaze navakuseza navakavevwisa sonyi.Vaze navalikanga kuli ove* navakavasoneka hamavu,+Mwomwo vanakuseze ove Yehova, ove kaselwoke kameya akuyoya.+
14 Ove Yehova, nguke, kaha nanguyoya.Ngulwile, kaha nangupuluka,+Mwomwo ove yove ngweji kwalisanga.
15 Tala! Vatu vali nakungwihula ngwavo:“Mazu aYehova anahonena ika kutesamo?+Atesemo tumone.”
16 Oloze ami kwami kangwalitwaminyine kukukavangiza ove kafungako,Kangwatalililile likumbi lyalupiko.Ove unatachikiza kanawa vyuma vyosena ngunahanjika nakanwa kami.Ngunavihanjikila kumeso ove.
17 Kanda naungwivwisa womako,Mwomwo ove yove uchinyino wami halikumbi lyalupi.
18 Vaka-kunguyanjisa vavevwise sonyi.Oloze ami kanda naungwechelela vangwivwise sonyiko.+Vaka-kunguyanjisa valizuzukile nawoma.Oloze ami kanda naungwechelela ngulizuzukile nawomako.Vanehele lupi,+Vachike chikichiki, vanongese ndolokoto.*
19 Yehova angulwezele ngwenyi: “Yako ukemane muchikolo chavana vavatu chize veji kwingililanga nakulovokela vamyangana javaYuta. Kufumaho, kemane nawa muvikolo vikwavo vyamuYelusalema vyosena.+
20 Uvalweza ngwove, ‘Ivwenu vyuma nahanjika Yehova enu vamyangana javaYuta, nayenu vaYuta muvosena, nayenu mwatwama muYelusalema muvosena, enu mweji kwingililanga muvikolo evi.
21 Yehova nambe ngwenyi: “Lilamenu, kanda namumbata chiteli halikumbi lyaSambata, chipwe kuchingisa muvikolo vyaYelusalemako.+
22 Kanda namulovola chiteli numba chimwe mujizuvo jenu halikumbi lyaSambatako. Kanda namuzata mulimo numba umweko.+ Lamenu likumbi lyaSambata nakulimona kupwa lyajila nge muze ngwalwezele vakakuluka jenu.+
23 Oloze vakakuluka jenu kavevwililileko, kavatengelekele matwitwi avo kuli amiko. Vanjinjavalile* nakukana kungwononoka, kaha nawa kavetavilile kuvazangamisako.”’+
24 “‘Yehova nambe ngwenyi: “Kachi nge enu namungwononoka, kachi nge kamweshi kwingisa chiteli muvikolo vyanganda yino halikumbi lyaSambatako, kachi nge namulamanga likumbi lyaSambata nakulimona kupwa lyajila hakuhona kuzata milimo,+
25 kaha vamyangana navilolo javo vaze vanatwame halitanda lyaNdavichi+ navakengila muvikolo vyanganda yino oku vali nakutambukila mumatemba nahatuvalu. Navakengila hamwe navaYuta navatu vamuYelusalema.+ Munganda yino namukatwamanga lika vatu haya myaka yosena.
26 Vatu vamujinganda javaYuta, navaze vakuvihela vyajingilika Yelusalema, navaze vakungalila yavaMbenjamine,+ nakuchana,+ nakungalila yajipili, nakuNengeve,* navakeza kuzuvo yaYehova+ vakanehe mawana akulumba,+ navimuna vakuvatula,+ namawana amanona,+ nalavona, namawana akusakwilila.
27 “‘“Oloze kachi nge kamweshi kwononoka mazu ngunamilweze ngwami mulamenga likumbi lyaSambata nakulimona kupwa lyajila, ngwami kanda namumbata viteli halikumbi lyaSambata chipwe kwingisa viteli kana muvikolo vyaYelusalema halikumbi kanako, kaha nanguswamika kakahya havikolo vyaYelusalema. Kakahya kana nakocha tuposhi vakukola vamuYelusalema,+ kaha naumwe mwahasa kukajima wauchi.”’”+
Kwinyikila Chamwishi
^ Tala Mukana waMazu.
^ Chipwe pamo, “Mwomwo vanamiwiki muutenu wami nge kakahya.”
^ Hepe., “Ou mwatenga ava vakwechi mijimba kupwa livoko lyenyi.”
^ Chipwe “Weshowo mutu wangolo.”
^ Chipwe “Weshowo mutu wangolo.”
^ Chipwe “uka-kwonga.”
^ Chipwe pamo, “kaha ukwechi musongo wakuhona kuka.”
^ Hepe., “kukekesanga jiso.”
^ Hepe., “kuli ami,” pamo kuvuluka Yehova.
^ Chipwe “vanongese kavali.”
^ Hepe., “Vakakamishile jishingo javo.”
^ Chipwe “nakusulo.”
