Yelemiya 18:1-23
18 Yehova ambile kuli Yelemiya ngwenyi:
2 “Katuka uyenga kuzuvo yamuka-kutenga vyuma vyaunonga,+ kaha nangukahanjika nayove kuze.”
3 Ngocho ngwayile kuzuvo yamuka-kutenga vyuma vyaunonga, kaha ngwamuwanyine ali nakutenga chuma chaunonga hatufumbo.
4 Oloze chize chuma apwile nakutenga chapuzukile mumavoko enyi. Ngocho ambachile uze unonga nakutenga chuma cheka, kweseka nomu mwayile vishinganyeka vyenyi.*
5 Jino Yehova ambile kuli ami ngwenyi:
6 “‘Enu vakuzuvo yaIsalele, kutala kangweshi kuhasa kumilinga nganomu alinganga ou muka-kutenga vyuma vyaunongako nyi?’ Omu mukiko mwanambe Yehova. ‘Enu vakuzuvo yaIsalele, talenu, nganomu unapu unonga mulivoko lyamuka-kutenga vyuma vyaunonga, mukiko munapu nayenu mulivoko lyami.+
7 Kachi nge nanguhanjika ngwami nanguvunya wangana chipwe muyachi nakuupuzula nakuunongesa,+
8 kaha muyachi kana hinauseza vilinga vyawo vyakuhuka vize ngunauhanjikila, ngocho nayami nawa nangwalumuna vishinganyeka vyami ngwapwanga navyo vyakuunehela lupi.*+
9 Jino kachi nge nanguhanjika ngwami nangutunga nakutumba wangana chipwe muyachi,
10 oloze muyachi kana hinaulinga vyuma vyavipi kumeso ami, nauzeneka kwononoka mulizu lyami, kaha nayami nawa nangwalumuna vishinganyeka vyami vyakuulingila vyuma vyamwaza.’*
11 “Jino ove hanjika kuli vaYuta navatu vamuYelusalema ngwove, ‘Yehova nambe ngwenyi: “Nguli nakushinganyeka kuminehela* lupi, nguli nakujina kumilinga mwamupi. Ngocho sezenu jijila jenu jajipi, alumunenu jijila jenu navilinga vyenu.”’”+
12 Oloze vakiko vambile ngwavo: “Ovyo vyamokomoko!+ Etu natulinga mwaya vishinganyeka vyetu, kaha mutu himutu mwanjinjavala nakulinga mwaya muchima wenyi wakuhuka.”+
13 Ngocho Yehova nambe ngwenyi:“Hulisenu vaka-mafuchi.Iyaze evwaho lyehi vyuma kanevi?MwanaIsalele wapwevo nalingi chuma chakukomwesa chikuma.+
14 Kutala meya akulikonda aze ali hamalolwa akumikandu yakuLevanone anahase kuyengunuka numba?Kutala meya atuta aze ali nakufuma kwakusuku anahase kuma numba?
15 Oloze vatu jami vananguvulyama.+Vali nakulumbila chuma chamokomoko vimuna vakuvatula,*+Vali nakuhukanyisa vatu vaze vali nakutambuka mujijila javo jakushikulu,+Nakuvalingisa vatambukenga mujijila jakupunda, jakuzeneka kuhweka nakusalama.*
16 Ngocho lifuchi lyavo nalikomwesa vatu,+Kaha navalihahalyo haya myaka yosena.+Weshowo mwakahichila kulifuchi kana mwakalikomokela nakunyengesa mutwe wenyi.+
17 Nangukavapekumuna kumeso amuka-kole yavo nge muze peho yakumututuko yeji kupekumunanga visachi.Halikumbi navakamona luyando, nangukavatalisa nyima mukutela kuvatalisa meso.”+
18 Vakiko vambile ngwavo: “Twayenu tumutwame punga Yelemiya,+ mwomwo mutunwa twavapilishitu jetu namulovokanga lika jishimbi,* kaha vaka-mangana navakafwanga lika vatu, vapolofweto nawa navapolofwetanga lika mazu. Tumuvangijikilenu,* kaha kanda natwivwilila vyuma mwahanjikako.”
19 Ove Yehova, tengeleka matwitwi ove kuli ami,Ivwa vyuma vali nakuhanjika vaka-kole jami.
20 Kutala chakutamo kushishishilamo mutu upi havyuma vyamwaza nalingi nyi?Anuka omu ngwemanyine kumeso ove nakuhanjika vyuma vyamwaza hali vakikoMangana ove upeule utenu wove hali vakiko.Oloze vakiko vanangufulila wina ngufwengamo.+
21 Ngocho echa vana vavo vafwenga kuzala yakalombolombo,Vafwenga kupoko yamukwale.+Mapwevo javo vafwise vana vavo namalunga javo.+Malunga javo nawa vafwenga kumusongo wachihita waupi,Vakweze javo vavajihe napoko yamukwale kujita.+
22 Mujizuvo javo mwivwakane mitetoOmu nauvanehela lizavu lize nalivalukuka mukukasumuna.Mwomwo vanangufulila wina mangana vangukwate,Vanangutela miheto mangana ngufwengamo.+
23 Oloze ove Yehova,Ove unatachikiza kanawa punga vanangutwame yakusaka kungujiha.+Kanda naufwika mulonga wavoko,Kanda naujimbangana shili yavo kumeso oveko.Mana vahukane kumeso ove+Omu nauvazangamisa mwomwo yautenu wove.+
Kwinyikila Chamwishi
^ Hepe., “kweseka nomu muka-kutenga vyuma vyaunonga amwene ngwenyi chinatemo.”
^ Chipwe “nangwivwa kupihya halupi ngwasakanga kuunehela.”
^ Chipwe “nangwivwa kupihya havyuma vyamwaza ngwasakanga kuulingila.”
^ Hepe., “kutenga.”
^ Chipwe “vimuna vakuvatula mangana vakakumuke wishi.”
^ Chipwe “jakuzeneka kutunga.”
^ Hepe., “tumuvetenu namalimi etu.”
^ Chipwe “jindongi.”
