Yelemiya 19:1-15
19 Yehova ambile ngwenyi: “Yako ukalande mulondo waunonga kuli muka-kutenga vyuma vyaunonga.+ Mbata vakulwane javatu navakulwane javapilishitu uyenga navo.
2 Yako kuChinema chaMwanaHinome,+ kuChikolo chaVipazu vyaUma. Kahomu nauheta kuze, ukavilike mazu nangukakulweza.
3 Ukavilike ngwove, ‘Enu vamyangana javaYuta nayenu vatu vamuYelusalema, ivwenu vyuma nahanjika Yehova. Yehova wamayongomena, Kalunga kaIsalele nambe ngwenyi:
“‘“Kalinwomu ngunehe lupi hachihela chino, kaha weshowo mwevwa lupi kana mwalikomokela.*
4 Nanguneha lupi kana mwomwo vananguseze,+ kaha vanenyeka chihela chino nakuchilingisa chisoloke mweka.+ Vali nakulumbila tulunga veka vimuna vakuvatula. Vatu kana, chipwe vakakuluka javo, chipwe vamyangana javaYuta kavatachikijile tulunga kanako. Vanazalisa nawa chihela chino namanyinga avatu vakuzeneka mulonga.+
5 Vanatungila Mbale vihela vyakulunduka mangana valumbenga vana vavo vamalunga navava vamapwevo kupwa mawana akulumbila Mbale.+ Kangwavalwezele kulinga chuma kanako, kaha nawa kangwachishinganyekele mumuchima wamiko.”’*+
6 “‘Shikaho Yehova nambe ngwenyi, “Talenu! Makumbi ali nakwiza omu navakazeneka kuvuluka chihela chino ngwavo Tofwete, chipwe ngwavo Chinema chaMwanaHinome. Oloze navakachivulukanga ngwavo Chinema Chakujihila.+
7 Nangukahonesa vyuma vanajinyi vaYuta navatu vamuYelusalema muchihela chino, kaha nangukavalingisa vakalindwomwoke kujipoko jamikwale kumeso avaka-kole javo. Nangukalingisa nawa vakavalindumune kuli vaze vali nakusaka kuvajiha. Mijimba yavo nayikapwa kulya chatujila vakutuka mwilu, natunyama vahamavu.+
8 Nangukalingisa nganda yino yikakomwese vatu nakulihahayo. Weshowo mwakahichilako mwakalikomokela nakulihaha havipupu vyosena vinasolokela nganda kana.+
9 Nangukavalingisa vakalye nyama yavana vavo vamalunga navava vamapwevo. Mutu himutu mwakalya nyama yamukwavo mwomwo yakuvahaka muchingombela, nakilika navakamona hakuvakuchikila mukachi kuli vaka-kole javo nakuli vaze vali nakusaka kuvajiha.”’+
10 “Jino ove ukachika uze mulondo kumeso avakulwane vaze nauya navo.
11 Kufumaho ukamba kuli vakiko ngwove: ‘Yehova wamayongomena nambe ngwenyi: “Nanguchika ava vatu nanganda yino nganomu mutu mwachika chuma chaunonga chize kaveshi kuhasa kuwahisa chekako. Navafunda vafu muTofwete palanga nomu namuzala mwosena nakuhona kwakuvafunda.”’+
12 “Yehova nambe ngwenyi, ‘Omu mukiko nangulinga kuchihela chino nakuvatu vatwamamo. Nangulingisa nganda yino yipwenga nge Tofwete.
13 Jizuvo jamuYelusalema najizuvo javamyangana javaYuta najipihya ngana mwaTofwete.+ Jizuvo josena jize jikwechi milungu yize valumbililengaho vimuna vakuvatwila mayongomena osena amwilu,+ yize nawa vahingunwinyinengaho mawana avinyo kutulunga veka najipihya.’”+
14 Omu Yelemiya afumine kuTofwete kuze amutumine Yehova akapolofwete, emanyine muchipango chazuvo yaYehova, kaha ambile kuli vatu vosena ngwenyi:
15 “Yehova wamayongomena, Kalunga kaIsalele nambe ngwenyi, ‘Talenu! Nanguneha lupi lwosena luze ngunavulukila nganda yino najimbongi jayo josena, mwomwo vatu vatwamamo vananjinjavala* nakukana kwononoka mazu ami.’”+
Kwinyikila Chamwishi
^ Hepe., “matwitwi enyi nawawemuna.”
^ Chipwe “kachapwile muvishinganyeka vyamiko.”
^ Hepe., “vanakakamisa jishingo javo.”
